YEREMIA 17:11 - KITAB NU TUMPU ALLA LELE MA'IMAI'

¹¹ Sumomo ahi' tomonsi' mongokobi anu misa' nggalau'nyo, sumo aijo'mo na mian anu tageo' na kinyonyoanyo nohumpak halata'nyo. Toka ipohintonga'anmo nu umunnyo mingkotmo na halata'nyo aijo' iwi-iwi'. Ipupuusnyomo nu kantumuu'annyo, onyata'je taalu' ia mian anu ponga' ahi' hondo.

YEREMIA 17:11 ပူးပေါင်းရင်းမြစ်များ

AYUB 20:21

De ia mongkaan iwi-iwi' nu ingkoti, kalana aijo' kasanangannyo madi' pinin.

MAZMUR 49:13

Manusia madi' moko ala tumuu' sidu-sidutu'i uno nu kakaya'annyo; susumo binatang ia suele ahi' saidi' mae silaka.

MAZMUR 55:23

De bata-batamo na beleyum kalana mabuhukmo asanakonmo hi Tumpu, sahingga Iaje na montulungi beleyum; kalana mian anu hodi' na kinyonyoanyo, madi' ola nu pojohok nu Tumpu na ia opatundu.

AMSAL 13:11

Kakaya'an anu ohumpak ola dengke-dengke malia' hondo maga'a; panyo halata' anu ohumpak toto sangkiding saidi mae mompaka pintuang.

AMSAL 15:27

Ihe na molio ka'untungan anu madi' halala' mompateimo posi auannyo; panyo ihe na mongka'ideki doi anu bau ponsogo' saidi' mae kantumuu'annyo sanang.

AMSAL 21:6

Kakaya'an anu i humpak kalana katageo'an nu kinyonyoa malia' hondo molapus ka' momboa mian i bolo' nu kubun.

AMSAL 23:5

Kalana, ola sangkinihap halata' nu beleyum aijo' lanyapmo sumomo ia anu ko polipiknyo ka' lumahap mokiita' i langa susumo bonyia'.

AMSAL 28:16

Anu balakuasa monsansalai mian sangga'at madi' ko pikilan anu ma'ima'; anu balakuasa mongkaddeki anu madi'adin mompalentah motau-taun.

AMSAL 28:20

Mian anu madi' tageo' na kinyonyoanyo nubalakati nu Tumpu, panyo mian anu kahanda' da malia' kaya, madi' nupala'i nu hukuman.

AMSAL 28:22

Mian anu mangoa mongka'oho' da malia' kaya; madi' nusumbu' saba' kasiasi malia'mo montokai ia.

AMSAL 28:8

Ihe na kinayamo kalana mongala bunganyo ka' talalo ahi' mongkekedi da ka'untungan, manjoo' kakaya'annyo aijo' saidi mae manabu' hi mian anu kokalibosan ka' hi mian anu kasiasi.

YEREMIA 22:13

Silakamo na mian anu mombau laigannyo panyo binau nu jalan anu madi' adin, ka' nompodaka'mo panyo pinodaka'mo nu jalan anu madi' hodi' na kinyonyoa. Silakamo na ia anu mompalentah mian mokalaja padahan madi' otamboi.

YEREMIA 22:17

Panyo beleyum, Yoyakim, sangalasan. Beleyum ola molio posi ka untungan nu beleyum. Beleyum nompateimo mian anu madi' ko sala'nyo ka' talalo ahi' monsakisa mian da'isan nu beleyum ka' talalo ahi' singgi.

YEREMIA 6:13

Aha iwi-iwi', anu tu'amo tiba anu daagi' anak, molio ka untungan tiba jalan anu madi' hodi'. Paka laus mule' nabi tiba imam suele nongakalimo miam.

YEREMIA 8:10

Kalana aijo' ale' nu aha Ku bee'mo hi tumpu nu tano' sangga'at, ka' mule' bengkele' nu aha Ku bee'mo hi mian sangga'at. Aha iwi-iwi' tu'anyo tiba anak molio ka untungan tiba jalan anu tageo'. Pakalaus mule' nabi tiba imam suele ahi' mongakali mian.

AMOS 3:10

Tumpu notatae, “Mian haha aijo', nongisi laigan nu aha nu to bala-balang anu ingala nu aha lewa' nompakisa ka' talalo buhingoson. Ka' mule' aha madi' ko anu monsumbu' mombau kahodi'an na kinyonyoa.

MIKHA 2:9

To bou-boune anu hi aha mian-Ku anu palesayamo i laa'mo nu belemiu da belemiu jojoongmo i laigan nu nu kalibosi nu aha, ka' belemiu nongagoi aijo' madi'mo daagi' osule'akon sampe toka sidu-sidutu' padahan aijo' anu binee'-Kumo salaku balakat hi to ana-anak nu aha.

MIKHA 7:3

Iwi-iwi' aijo' pande hondo na mombau palabuatan anu ma'idek. Mian anu ko pangkatnyo tiba mian kopian momoita doi bau ponsogo' ka' to tu'a-tu'anyo mompakisakon pongka'oho' nu aha, sumo aijo' na aha nombau kasangaja'an hingga-hinggat.

ZEFANYA 1:9

Ku hukumo na mian iwi-iwi' anu monsombah susumo mian anu madi' monsumbu' Aku, ka' anu mombuling ka' anu lewa' mompatei da bau pongalapan bau pomposukup isi nu laigan nu tuan nu aha tiba to bala-balang anu ingagoan.”

ZAKHARIA 5:4

Tumpu Anu Daka' na Kuasanyo notataemo tukoo-Nyo pongkutuki aijo' opokona i laigan nu mian anu lewa' mombuling ka' mule' i laigan nu mian anu basumpa' ihan anu madi' totu'u. Laigan haha aijo' saja'mo nu kona nu kutuk sampe timbalimo tambulan nu anu ihansunmo.”

MALEAKHI 3:5

Notatae na Tumpu Anu Daka' na Kuasanyo, “Aku tokamo mae hi belemiu da momputusimo. Aku malia'mo timbali sakisi de momputusimo to tukang-tukang sihir, to mia-mian anu lewa' masala', anu tinimbali sakisai baleko', hi anu madi' adin na mombee'i gaji kona hi aha mian anu mongala tambo, hi aha anu madi' ko ka'adilannyo kona hi aha to balu-balu, to ana-anak anu madi'mo ko tuumanyo ka' tinanyo, ka' aha mian nu salipu'an mae, ka' mule' kona hi aha mian iwi-iwi' anu madi' mongadati Aku.”

MATIUS 23:13

“Silakamo na komiu to gulu-gulu' agama ka' to mia-mian nu Farisi! Komiu saja' mombau pula-pula. Komiu ola monsaduakon da mian madi' totu-totu'u timbali mian anu palesayamo hi Tumpu Allah. Posi komiu pe'e madi' mongka'oho' mian anu palesayamo hi Tumpu, ka' mian sangga'at anu oka'oho', miu da boli palesaya. [

LUKAS 12:20

Panyo Tumpu notatae hi ia, ‘O anu ponga'! Pihi uuka mule' beleyum matemo, lantas ihemo ahi' na mohumpak iwi-iwi' kakaya'an anu ilimu'umo bau kapentingan nu butongum?’

1 TIMOTIUS 6:9

Panyo mian anu mongka'oho' timbali kaya, tagodamo ka' nusegotimo nu sagala lupa na anu oka'ima'i, anu ponga' ka' mongidei. Anu oka'ima'i haha aijo' mombau mian timbali magalis ka' silaka.

TITUS 1:11

Mian anu susumo haha aijo' tionyo ogintumi na nganga'nyo, kalana aha mompotasibu manjoo' na auwan kalana to panga-pangajalan anu madi' ko gunanyo. Aha mombau sumo aijo' ola kalana mongka'oho' molio kauntungan anu madi' pantas!

2 PETRUS 2:14

Aha madi' ko kapa'osannyo na mombau dosa', ka' anu nu ka'ima'i aha aijo'mo montoa boune anu lewa' masala'. Ka' mian anu sala'je palesaya ka' anu ma'isa talalo palesaya totu-totu'u, nugoda nu aha. Kinyonyoa nu aha inanayamo nu mangoa. Aha to mia-mian anu kinutukanmo!

2 PETRUS 2:3

Kalana aha mangoa, sahingga to gulu-gulu' anu madi' totu'u aijo' nonsisikakonmo hi belemiu to sisi-sisik anu o posi kalang da bau pohumpakan ka'untungan hi belemiu. Panyo anu momputusi monabu'akonmo hukuman hi aha pininmo na pinosadia, ka' kabinasa'an anu tinantukanmo bau bagi nu aha hau-haunyomo montanda'imo aha.