YEREMIA 15:9 - KITAB NU TUMPU ALLA LELE MA'IMAI'

⁹ Tina nu anak, anu popitu' na anaknyo mo'ane sinilakamo pinoso'mo kalana binotmo na ningkinyonyoa. Kantumuu'annyo madi'mo binalasahaya ingoa'annyo ia madi'mo ingadatan ka' mule' ingambanganmo. Sampobali' nu belemiu pinalentah-ngKumo da mompateimo anu daagi tumuu' atina' hi belemiu. Aku, Tumpu, notataemo.”

YEREMIA 15:9 ပူးပေါင်းရင်းမြစ်များ

YESAYA 47:9

Panyo ola sasaingoni' i uno nu sansinaa, ohu-ohua' na han aijo' monsainjadi-jadimo hingga-hinggat. Maunyomo ahi' beleyum mompakemo ponsumbu'an tiba do'a-do'a, langkai' nu beleyum tiba anak nu beleyum ohahumbitakonmo ahi' hoso-hoson.

YEREMIA 19:7

Itampat aiya madi'mo Ku pojadi' na tanga'an iwi-iwi' nu aha mian Yehuda tiba mian anu jojoong i Yerusalem. Aha Ku popilayamo da nu patundu'mo nu to sampo-sampobali' nu aha ka' opateimo i uno nu pahampatean. Bangke' nu aha Ku pojohokmo da nu tolukmo nu to tomo-tomonsi' tiba binatang anu mahangas.

YEREMIA 21:7

Beleyum tiba aha mian anu kopangkatnyo ka' mule' anu madi' silaka i uno nu pahampatean, kasusa'an i anu okaan, tiba panyakit anu molele, iwi-iwi' Ku pojohokmo da nu hakop i Tomundo' Nebukadnezar tibamo sinin na sampobali' nu belemiu anu kahanda'mo mompatei belemiu. Nu pateimo i Nebukadnezar na belemiu iwi-iwi' madi'mo daagi' ko ampunnyo ka' mule' madi'mo daagi' kokalibosan. Aku, Tumpu notataemo.”

YEREMIA 44:27

Aku bala usahamo da belemiu silakamo ka' madi'mo mohumpak ka'ima'an i uno nu kantumuu'an, sampe belemiu silakamo iwi-iwi' mau pa' kalana pahampatean kabai kalana panyakit anu molele.

YEREMIA 50:12

Panyo belemiu timbalimo bansa anu madi'mo ko alati'nyo apa-apaa hi aha bansa iwi-iwi'. Kota' nu belemiu anu daka' aijo' o alumo ka' mule' opopo ambangmo. Lipu' nu belemiu timbalimo padang tampat anu mateges ka' kunmo ka' motismo.

YEREMIA 6:4

Aha motatemo, “Ya donganmo, posadia montumbuhimo Yerusalem! Imbo' otumbuhintomo sinaa aiya!” Panyo lapas mae aha motataeje mule', “Adoh tinalambatmo! Sinaa montampu'unimo pintung, lolung montampu'unimo mantan.

YEREMIA 7:19

Panyo sabenannyo ahi' misa' Aku na nu sakiti nu aha panyo posi butong nu aha ahi' sahingga aha ma ambangmo.

MOHAANGI 1:1

Talalomo hondo iliing na Yerusalem uuka aiya, kota' anu u'utu mae lame' hondo. U'utu mae talalo hondo mamba i mona hi aha to bansa-bansa, uuka aiya tinimbalimo susumo anu balu. U'utu mae kota' anu talalo hondo talasanggo hi aha to bansa-bansa uuka aiya tinimbalimo susumo balu.

MOHAANGI 4:10

Talalo hondo okabuhuk na balaa' aijo' anu nontuda'i mo mianku anu palesayamo sahingga to tina-tina anu ma'ima' na kinyonyoanyo nongunjangmo posi anaknyo da bau pongisi kompong.

YEHEZKIEL 5:12

Obagi totolu' na mian anu jojoong atina' hi beleyum sambagian na silakamo kalana panyakit anu molele ka' kalana balaa' kasusa'anmo i anu okaan na toka mae ikota' atina'. Sambagian opateimo nu bajak isambiha'nyo nu kota' ka' sambagian mule' Ku taumo mamba i iwi-iwi na tampat ka' Ku loloi'mo nu bajak.

YEHEZKIEL 5:13

Beleyum mongoa'imo tambuha'-Ku anu taha-tahahumo ka' mule' Aku mangamu'mo sampe Aku puasmo. Salatan iwi-iwi' aijo' jadimo atina'je ka beleyum palesaya taalu' Akumo ahi' na Tumpu anu notataemo hi beleyum kalana Aku notambuha'imo beleyum madi' tulu-tulutan.

1 SAMUEL 2:5

Mian anu u'utu mae mobosu, kalana manjoo' na kaanon, tempo' uuka aiya nongala tambomo, ola kalana da mohumpak anu okaan. Mian anu u'utu mae mo'ohop tempo uuka aiya na osamo kalana nanjoo'mo na anu okaan. Bengkele' anu lengke' tempo uuka aiya sinanangmo na kinyonyoanyo, popitu'mo na anaknyo na i hampe! Panyo bengkele' anu manjoo' na anaknyo, pinala ianmo, pinojohokmo da susa'.