YEREMIA 1:17 - KITAB NU TUMPU ALLA LELE MA'IMAI'

¹⁷ Balasadiamo, Yeremia! Lako'mo ka' poto'imo hi aha, iwi-iwi' na anu pinalentahkon-Kumo hi beleyum. Boli mabuhuk hi aha da beleyum boli mule' Ku pojadi lebe mabuhuk de mompaha ahopmo tiba aha.

YEREMIA 1:17 ပူးပေါင်းရင်းမြစ်များ

1 TOMU-TOMUNDO' 18:46

Tempo'nyo aijo' i Elia nohumpakmo kahosonan lengkat mae hi Tumpu. Kinekesnyomo na juba'nyo nokiita' i kompongnyo lantas ia nopadeka'mo so' i liu-liunyo na i Ahab tinoka-toka i sabatan daka' nu kota Yizreel.

2 TOMU-TOMUNDO' 1:15

Tempo'nyo aitu malaikat nu Tumpu nompoto'imo hi Elia, “Boli mabuhuk batukimo na ia mintudun lengkat i bungkutnyo aiya.” Kalana aijo' nambamo na i Elia tiba suludadu haha aijo anu matangkas na pangkatnyo hi tomundo'.

2 TOMU-TOMUNDO' 4:29

I Elisa nosiloimo nokiijo' hi Gehazi lantas notatae “Palia-lia'! Ala mae na tokonku ka' lako'mo mamba hi laigan nu Pontina'on aiya. Boli okolilimi na monsalando'i mian anu nu kabot i jalan maumo pa' ihe. De mian monsalando'i beleyum boli o tanda'i pipin obalosije na salando'anyo. De beleyum tokamo i kiijo', sampa lia-lia' potimpas na tokonku aijo' i butong nu anak aijo'.”

2 TOMU-TOMUNDO' 9:1

Tempo'nyo aitu i Nabi Elisa nolagamo samian na nabi anu pinogulu'nyomo anu aijo' hi aha nabi sangga'at. “Posadiamo da mambamo i Ramot i da'erah Gilead, ka' boa na boton anu ko isinyo lanya' nu zaitun aiya.

AYUB 38:3

Uuka aiya, ahopi mae na aku de beleyum mo'ane, ka' soba taami mae na anu ku pokilawa aiya.

NOSABATMO 3:12

Tinaaman nu Tumpu Allah, “Ku tulungije na beleyum. Ka' de bansa aijo' nu boamo mosabat lengkat i Mesir, belemiu monsombahmo hi beleng-Ku i bungkutnyo aiya. Aijo'mo na pontoan taalu' aku nonsaimo beleyum.”

NOSABATMO 7:2

Potoka hi Harun iwi-iwi' apaa na anu pinalentahkon-Kumo hi beleyum. Pokau na i Harun mompoto'i hi tomundo tokoong-Ku i tomundo tionyo ahi' mompobee' mian nu Israel mompala'imo lipu' nu Mesir.

YEREMIA 1:18

Potombihing mae! Beleyum nu ka'idekimo nu mian anu jojoong ilipu' aiya, aijo'mo to tomu-tomundo' nu aha Yehuda, to paga-pagawe nu pamalentah, to ima-imam, ka' suele aha mian daisan. Panyo sinaa aiya Ku bee'imo kahosonan na beleyum da moko ala mongewa aha. Beleyum timbalimo susumo kota' anu ko bentengnyo, pokakanamo susumo ohi' besak, ka' pagan mesen tambaga. Aha madi' moko ala mohungku'i beleyum, kalana Aku na monsangalui ka' monjagai beleyum. Aku, Tumpu notataemo.”

YEREMIA 17:18

O'amalakon da anu mololoi' mae ka' anu momposansala' mae aku, nu popo ambangmo nu Belento ka' nu popo buhukmo hondo nu Belento. Panyo boli ahi' mombau sumo aijo' hi belengku, o Tumpu. Potokamo mae na balaa' hi aha sampe aha hansunmo ahi' silaka iwi-iwi.

YEREMIA 23:28

Nabi anu nongipimo sabenannyo ahi' mompoto'i, ‘Aiya ola anu ingipi.’ Panyo nabi anu nohumpakmo potuunon lengkat mae hi beleng-Ku na tionyo ahi' mompoto'i potuunon aijo' tiba sahondo-hondonyo. Gandum madi' timbali opokakanakon tiba hatinyo.

YEREMIA 26:12

Lantas aku notataemo, “Tumpu na nompalentahmo mae aku da mompoto'i potuunon mongka'ideki Laigan nu Tumpu tiba kota' aiya susumo anu ihongomo nu belemiu.

YEREMIA 26:2

Tumpu notataemo mae hi belengku, “Lako mamba tuminjo' ipopasan nu Laigan-Ku ka' potataemo hi aha mian anu jojoong Yehuda anu toka mae monsombah ikiijo'. Poto'i hi aha iwi-iwi' na anu Ku palentahkon hi beleyum da opoto'iakon hi aha. Boli oga'ai mau ola sangkiding.

YEREMIA 36:8

Sahingga binasa'akonmo i Barukh na potatae nu Tumpu i uno nu Laigan nu Tumpu, susumo anu pinalentahkonmo hi ia.

YUNUS 3:2

Ia notatae, “Lako'mo mamba i Ninewe, i kota' anu daka' aijo' ka' potokakon hi miannyo na potuunon-Ku anu Kupoto'i beleyum aiya.”

LUKAS 12:35

“Bajaga-jaga na mongahopi iwi-iwi' na han. Komiu tionyo saja' mosadia mipake ka' sulu'um tataap opomoak,

SISIKON NU TO RASUL-RASUL 20:20

Kita utus monsumbu' saba' saja'mo pinoto'ingku hi komiu apaa na anu ko gunanyo hi komiu. Aku mongajan komiu i posa'angu'an-posa'angu'an nu mian da'isan i to lai-laigan.

SISIKON NU TO RASUL-RASUL 20:27

Madi' toho' aku mompala'i pakalaja'anku montutuhakon hi komiu iwi-iwi' na tanga'an nu Tumpu.

1 KORINTUS 9:16

Kalana de aijo' ola han mompolele Lele Ma'ima' lengkat mae hi Tumpu, tantu aku madi' ko hak kobubuun, kalana Tumpu nompalentahmo aku, da mompojalan aijo'. Silaka na aku de aku madi' mompolele Lele Ma'ima' aijo'!

1 TESALONIKA 2:2

Komiu monsumbu' saba' ma'isa pe'e kami tinoka hi komiu i Tesalonika, kami po'ule'mo kinabisa'an ka' pinopo'ambang kiijo' mae i Filipi. Panyo mau mule' manjoo' na mian mombahakon kami, Tumpunto nombee'imo kami kabaanian da mompolele hi komiu Lele Ma'ima' anu lengkat mae hi Ia.

1 PETRUS 1:13

Kalana aitu, tionyo ahi' komiu saja' mosadia. Bajaga-jaga ka' otaha'imani ahi' totu-totu'u na balakat anu obee'je mae hi beleyum de i Yesus Kristus po'ule'mo toka saidi' mae.