YEHEZKIEL 7:3 - KITAB NU TUMPU ALLA LELE MA'IMAI'

³ Tumpu notatae, “O, Israel, uuka aiya tinokamo na ka ahenannyo nu beleyum. Beleyum mongoa'imo tambuha'-Ku. Kuputusimo na hukuman nu beleyum sitimbang tiba palabuatan nu beleyum mahu-mahumimi' atina'.

YEHEZKIEL 7:3 ပူးပေါင်းရင်းမြစ်များ

KAJADIAN 6:13

Lantas Tumpu Allah notataemo hi Nuh, “Aku nontantukanmo da omingkotimo na kantumuu'an nu iwi-iwi' apaa na anu ko nyawanyo. Aku mohopu'imo aha tiba dunia, kalana dunia nobuke'mo nu ka uwesanan nu aha.

YESAYA 47:7

Nu sangka nu beleyum, beleyum timbalimo tomundo' boune sampe toka sidu-sidutu', ka' madi' mompangalati'i kabai mompopikilakon ka ahenannyo mae.

YEREMIA 13:14

Lantas aha Ku podukumo hi samian ka' hi samian. Mian anu tu'amo tiba mian anu ma'isa tu'nyo Ku baumo susumo aijo madi'mo daagi' ko ampunnyo. Aha Ku silakaimo madi'mo daagi' mongkalibosi kabai mongkanonongi. Aku, Tumpu, notataemo.”

YEHEZKIEL 11:21

Panyo aha to mia-mian anu saja' mongka'ima'i monsombah pilogot anu mahumimi' ka' okahegati Ku hukumo kalana kalakuan nu aha anu ma'idek aijo'.” Sumo uuka na potatae nu Tumpu Anu Matangkas na Kuasanyo.

YEHEZKIEL 16:38

Beleyum Ku hukumo kalana saja'mo nasala' ka' saja'mo nompatei bibinaumo nu beleyum. Kalana pusang-Ku ka' mule' tambuha'-Ku beleyum Ku hukumo mate.

YEHEZKIEL 16:43

Aku mohukumo beleyum kalana beleyum madi'mo daagi' nonginau'mae mosia na Aku nompalakaimo beleyum tempo'nyo nai puan mae daagi' ise'. Palabuatan nu beleyum ma'i-ma'idek atina' na nonsabapi Aku nontambuha'i beleyum. Kadaka' palabuatan nu beleyum anu oka-okahegati atina' iwi-iwi' daagi' mule' nu paka tuangi nu palabuatan masala'? Aku Tumpu Anu Matangkas na Kuasanyo notataemo.”

YEHEZKIEL 16:59

Tumpu Anu Matangkas na Kuasanyo notatae, “Beleyum Ku hukumo sitimbang tiba palabuatan nu beleyum, kalana beleyum madi'mo nontuluti anu sinumpa'akonmo nu beleka' mule' nolanggaimo palajanjian-Ku anu binaumo tiba beleyum.

YEHEZKIEL 18:30

Tumpu Anu Matangkas na Kuasanyo notataemo, “O, to mia-mian nu Israel, Aku mombee'imo kaputusan hi toto samian sitimbang tiba palabuatannyo. Bolimo daagi' mombau iwi-iwi na dosa' nu beleyum. Boli opojohok na dosa' nu beleyum mohansunimo butong nu beleyum.

YEHEZKIEL 21:25

Ka' hi tomundo' nu Israel Ku poto'i, ‘O, tomundo' anu ma'idek na kinyonyoanyo ka' palaganta! Sinaa anu pupusnyomo na beleyum ohukum malia'mo mae toka.

YEHEZKIEL 22:31

Kalana aijo' uuka aiya Ku potudunmo na tambuha'-Ku hi aha, ka' susumo apu Ku toyo'imo na aha kalana iwi-iwi' na palabuatan nu aha Aku, Tumpu Anu Matangkas na Kuasanyo notataemo.”

YEHEZKIEL 24:14

Aku, Tumpu Anu Matangkas na Kuasanyo notataemo. Tinokamo na tempo'nyo na Aku mohukumo. Madi' Ku kolilimi' na dosa' nu beleyum ka' madi'mo daagi' mongampuni kabai mongkalibosi beleyum. Beleyum ohukumo sitimbang tiba palabuatan nu beleyum iwi-iwi'. Aku, Tumpu Anu Matangkas na Kuasanyo notataemo.”

YEHEZKIEL 33:20

Maumo ahi' sumo aijo' bansa Israel nontaloakonmo tukoonyo nu aha kaputusan-Ku na madi' ahi' adin. Memang totu'u, Aku momputusimo hukuman nu aha toto samian sitimbang tiba palabuatan nu aha.”

YEHEZKIEL 36:19

Aha Kuhukumo sitimbang tiba kalakuan nu kantumuu'an nu aha, ka' aha Ku ga'a-ga'atakonmo mamba ilipu-lipu' nu mian anu isali'an.

YEHEZKIEL 5:12

Obagi totolu' na mian anu jojoong atina' hi beleyum sambagian na silakamo kalana panyakit anu molele ka' kalana balaa' kasusa'anmo i anu okaan na toka mae ikota' atina'. Sambagian opateimo nu bajak isambiha'nyo nu kota' ka' sambagian mule' Ku taumo mamba i iwi-iwi na tampat ka' Ku loloi'mo nu bajak.

YEHEZKIEL 5:13

Beleyum mongoa'imo tambuha'-Ku anu taha-tahahumo ka' mule' Aku mangamu'mo sampe Aku puasmo. Salatan iwi-iwi' aijo' jadimo atina'je ka beleyum palesaya taalu' Akumo ahi' na Tumpu anu notataemo hi beleyum kalana Aku notambuha'imo beleyum madi' tulu-tulutan.

YEHEZKIEL 7:2

“O, manusia anu madi' tumuu' batu, Aku Tumpu Anu Matangkas na Kuasanyo montaloakonmo sumo uuka hi aha tano' nu Israel; Uukamo na kamingkotan nu sisiknyo nu lipu' aiya!”

YEHEZKIEL 7:27

Itomundo' tumando'mo na lewa' humang, anak mo'ane nu tomundo' madi'mo ko anu otaha'imani ka' mule aha mian da'isan lengkatanmo bau nu buhuk. Aku mohukumo beleyum sitimbang tiba palabuatan iwi-iwi' nu beleyum ka' momputusimo hukuman nu beleyum susumo belemiu mombee'i hukuman hi mian sangga'at. Sahingga nu sumbu'je nu beleyum taalu' Akumo ahi' na Tumpu.”

YEHEZKIEL 7:4

Aku madi'mo daagi' molibos kabai mongampuni beleyum. Aku mohukumo beleyum sitimbang tiba iwi-iwi na palabuatan mahu-mahumimi' nu beleyum atina'. Sahingga nu sumbu'je nu beleyum taalu' Akumo ahi' na Tumpu.”

YEHEZKIEL 9:10

Aku madi'mo mongkalibosi aha. Ku baumo hi aha apaa na anu binaumo nu aha hi mian sangga'at.”

HOSEA 12:3

Tumpu ko palakalamo hi aha bansa Yehuda; Ia suele mohukumo Israel kalana palabuatan nu aha. Ia mombalosakonmo palabuatan nu aha.

AMOS 8:2

Pinokilawa nu Tumpu, “Beleyum nontoa apaa, Amos?” Tinamaan-Ku, “Sa'angu' na kalanjang isinyo bua' nu kau' anu nahamo.” Tumpu notatae, “Tempo'nyo i nahamo na aha mian-Ku Israel anu palesayamo. Aku madi'mo daagi' mombabali'i tanga-an-Ku, ka' memang ku hukumo na aha.