YEHEZKIEL 7:26 - KITAB NU TUMPU ALLA LELE MA'IMAI'

²⁶ Balaa' tiba lele ma'idek saja'mo toka mae hi aha. Belemiu mongkakasemo da to nabi-nabi mongkila-kilamo pa' apaa na jadi saidi' mae panyo aha madi' ahi' moko ala. Ka' suele aha to ima-imam madi'mo daagi' ko apa-apaa anu opogulu'akon hi aha mian, ka' mule' to pola-polaya' iningkotmo na pokinde' nu aha.

YEHEZKIEL 7:26 ပူးပေါင်းရင်းမြစ်များ

MAZMUR 74:9

To nabi-nabi ka' tanda-tanda anu okabangangi madi'mo daagi' tinoa, ka' madi' ko anu monsumbu' pa' hipianje na anu susumo aiya belentimo.

YESAYA 47:11

Panyo beleyum nu tokaimo mae nu balaa', ilimu' ponsumbu'an nu beleyum madi' moko ala mompoluput beleyum. Beleyum saidi' mae nu tokaimo mae nu kasilaka'an, ka' madi' ahi' opoko ala opimpali nu beleyum. Balaa' aijo' monti-montiik ahi' tokamo mae ka' madi' pinoko ala sinangka-sangka nu beleyum na han aijo' pa' jadimo mae.

YEREMIA 18:18

Mian notatae, “Imbo' da kita basangaja'mo mongewa i Yeremia. Misa' ola ia na bisa motatae, mompotoka apa-apaa hi Tumpu. Saja' daagi' ko imam anu timbali mombee'i pangajalan, daagi' ko mian pande anu timbali mombee'i pokinde'; ka' daagi' ahi' ko nabi anu timbali mompotoka mae hi kita potuunon-potuunon lengkat mae hi Tumpu Allah. Imbo' da okalaktomo na ia hi mian kopian ka' madi'mo daagi' kita mompotombihing potataenyo.”

YEREMIA 21:2

“Pompoita pokinde' hi Tumpu guna kapentinganto, kalana i Nebukadnezar tomundo' nu aha Babel tibamo suludadunyo hau-haunyomo mae montumbuhi kota'to. Ihe na monsumbu' pa' Tumpu timbali mombau mae hi kita han anu okabangangi ka' mompakisa i Nebukadnezar po ule' mompalentah suludadunyo minsusule'.”

YEREMIA 37:17

Lapas aijo' i Tomundo' Zedekia nompalentahmo mian da momboa aku mangadap hi ia ilaigan nu tomundo'. Ikiijo' pinohowininyo na ia nompokilawa mae hi belengku pa' daagi' ko potuunon lengkat mae hi Tumpu. “Daagi',” na koongku. Lantas po ule' mule' aku notatae, belento “Tomundo' obee'mo hi tomundo' Babel”.

YEREMIA 4:20

Balaa' me saja' tinoka mae nohansunimo songko-songko na lipu'. Monti-montiik ahi' kemahku ingideanmo, hudenyo iwi-iwi' pinaha bea-beakmo.

MOHAANGI 2:9

Sabatan anu toto daka-daka' singkapmo tinabuhan nu tano'; iwi-iwi' nasupatnyo nopato'mo; tomundo' tiba pagawe nu pamalentah kiijo'mo mae ipinomboan aha. Atulan nu Tumpu madi'mo daagi ingajanakon; nabi madi'mo daagi nontoa anu nu potoa nu Tumpu.

YEHEZKIEL 11:2

Tumpu notataemo mae hi belengku, “O, manusia anu madi' tumuu' batu, aiyamo na to mia-mian anu ko tanga'anmo mombau anu ma'idek ikota' aiya ka' anu sola' mombee'i pokinde' toto ide-idek ikota' aiya.

YEHEZKIEL 12:22

“O, manusia anu madi' tumuu' batu, kadaka' aha mian nu Israel mongka'ima'i sola' monsanggo potatae sumo uuka: ‘Tempo' na mobolo-bolos, panyo anu nu poto'i mae nu Tumpu madi' ko anu jadi'’?

YEHEZKIEL 14:1

Pa' aha sangkuka na mian to pola-polaya' nu aha bansa Israel tinokamo mae hi belengku nompokilawa pa' mosia na tanga'an nu Tumpu.

YEHEZKIEL 21:7

De aha mompokilawa kadaka' beleyum nososonmo saba' poto'i taalu' beleyum sinusa'mo na kinyonyoa kalana lele nu balaa' anu saidi' mae toka. Lele aijo' mompolangkakatanmo kinyonyoa nu aha, lima nu aha lundengmo, ka' ike-ike' nu aha suele langkakatanmo ahi', aha madi'mo daagi' bilak. Memang sinaanyo aijo' tokamo mae, ka' iwi-iwi' aijo' tionyo ahi' jadimo. Aku, Tumpu Anu Matangkas na Kuasanyo notataemo.”

YEHEZKIEL 22:26

Aha to ima-imam nu Israel nolanggaimo iwi-iwi na atulan-Ku ka' nohumimi'imo santo bala-balang anu opake samata-mata monsombah Aku. Aha madi'mo mombedakon iya na anu timbali okaan tiba iya na anu madi' timbali okaan. Ka' mule' aha madi'mo nongajan mian da'isan da monsumbu' mombedakon iya na anu belesi' ka' iya na anu mahumimi' susumo koonyo nu atulan nu agama. Aha madi'mo mompajuli sinaa nu Sabat. Tiba jalan anu sumo aijo' na Aku ingambanganmo nu bansa Israel.

YEHEZKIEL 33:31

Aha toka mae manjoo' hondo na mian ka' salaku mian anu palesayamo hi belengku, aha sumuhangmo mompotombihing potatae nu beleyum, panyo apaa na anu nu palentahkon nu beleyum madi' ahi' nu tuluti nu aha. Biwi nu aha montaloakon potatae mongka'ima'i panyo kinyonyoa nu aha na ola ahi' mompotutugakon mosia na mohumpak ka'untungan.

YEHEZKIEL 8:1

I tanggan olima' bitu'on ko anomnyomo ka' mule', i taun anu kino anomnyomo tempo'nyo kami daagi' kiijo' mae itampat pinomboan ka' pinompojoongan, to pola-polaya' nu aha mian anu binoa ka' pinojoongmo kiijo'mae aijo'mo aha mian Yehuda tinokamo mae ilaiganku ka' kinosusuhangmo tiba aku. Mamanga ahi kakuasa'an nu Tumpu Anu Matangkas na Kuasanyo nongkuasaimo mae aku.

IMAMAT 26:18

De lapasmo na mongoa'i hukuman aijo' iwi-iwi', belemiu ma'isa ahi' montuluti Aku, hukuman nu belemiu Ku paka tuangimo lipat pimpitun.

IMAMAT 26:21

De belemiu tataap panggaga hi beleng-Ku ka' madi'mo montuluti Aku, saba' hukuman nu belemiu Ku paka tuangimo mule' lipat pimpitun.

IMAMAT 26:24

saba' Ku dokemo na belemiu ka' mohukumo belemiu pimpitun lipat lebemo maboat molingkudui anu uuka mae momona.

IMAMAT 26:28

saba' pusamo na Aku, Ku dokemo na belemiu ka' Ku hukumo na belemiu pimpitun lipat lebemo maboat molingkudui hukuman anu uuka mae momona.

MIKHA 3:6

“O to nabi-nabi tempo'nyo nu belemiu ohanimo lapas; batu nu sinaa makakinsapmo. Belemiu madi'mo montoa anu opoto'i na tanga'an-Ku iwi-iwi'. Belemiu madi'mo daagi' moko ala mongkila-kila apa-apaa.”

MALEAKHI 2:7

Memang ahi' kahalusan nu to ima-imam na mompogulu' han anu totu'u apaa na anu Ku kahanda'i, Tumpu Anu Matangkas na Kuasanyo. Hi ahamo ahi' na tampat nu mian da'isan mompokilawa apaa na anu Ku ka'ima'i kalana ahamo ahi' aijo' na anu pinalentang-Kumo da mompoto'i.

MALEAKHI 2:9

Sahingga Aku suele mompotimbalimo belemiu madi' nu pajuli nu mian Israel kalana belemiu madi'mo nontuluti pongka'oho'-Ku ka' mule' kalana belemiu mombeda-bedakon mian tempo'nyo nompogulu' mian anu palesayamo hi belengku.”

PO'ULE' INGULIT 32:23

Sabole-bole saja'mo Ku potoka na balaa' pana'-Ku iwi-iwi' Ku peletakonmo hi aha.

1 SAMUEL 3:1

Hau-haunyo aijo' i Samuel anu daagi anak aijo' nokalajamo apaa na anu nu palentahkon nu Tumpu, i Eli na mongatun ka' mompotiju. Tempo'nyo aijo' madi'mo toho kino palentah ka' apa-apaa na anu otoa lengkat mae hi Tumpu.