YEHEZKIEL 6:12 - KITAB NU TUMPU ALLA LELE MA'IMAI'

¹² Aha iwi-iwi' mongoa'imo tambuha'-Ku anu taha-tahahumo. Aha tomia-mian anu majo'on kiijo' mae i pinomboan ka' pinompojoongan masakitmo lantas silakamo; anu aiya ohani silakamo kalana mahampate, ka' tuha'nyo silakamo kalana madi'mo ko anu okaan.

YEHEZKIEL 6:12 ပူးပေါင်းရင်းမြစ်များ

YESAYA 40:2

Potenangmo nakinyonyoa nu aha Yerusalem, poto'i taalu' tobotuanan imadi'anmo. Kasala'an nu aha ingampunan-Kumo, iwi-iwi na dosa nu aha ihukum-Kumo lipat pinduan.”

YEREMIA 24:10

Ku potokamo hi aha na pahampatean, kasusa'an i anu okaan, ka' panyakit anu molele sahingga aha ingko-ingkot silakamo ka' madi'mo daagi ko anu tontuha' ilipu' aiya anu binee'-Kumo hi aha ka' hi mompolee' nu aha.”

YEREMIA 42:22

Kalana aijo', tutugi; kiijo' mae ilipu' anu kahanda' olambani nu belemiu ka' jojoongmo tataap kiijo' mae, belemiu silakamo i uno nu pahampatean, kabai kalana kasusa'anmo i anu okaan, kabai kalana panyakit anu molele.”

MOHAANGI 4:11

Tumpu nompopiamo kapusan-Nyo ka' nompapuimo kota' Sion sampe i lata tiba tano'.

MOHAANGI 4:22

Sion nonta'upmo hukumannyo kalana iwi-iwi na dosa' anu binaumo nu aha; uuka aiya kami madi' ola nupojohok nu Tumpu ka' madi'mo daagi' oboa mamba i tampat pompojoongan. Panyo beleyum, o Edom, nuhukumje nu Tumpu. Iwi-iwi' na dosa' nu beleyum oponyata'mo.

YEHEZKIEL 33:27

Atas sanggong-Ku, Tumpu anu tumuu', Tumpu Anu Matangkas na Kuasanyo, to mia-mian anu jojoong i kota' haha aijo' anu singkapmo i hansun silakamo opatei. Aha anu jojoong i tampat padang anu ewa nu kaanmo nu binatang anu mahangas. Aha anu matisuluk i iwi-iwi na bungkutnyo ka' i to lia-liang silakamo kalana panyakit anu molele.

YEHEZKIEL 5:12

Obagi totolu' na mian anu jojoong atina' hi beleyum sambagian na silakamo kalana panyakit anu molele ka' kalana balaa' kasusa'anmo i anu okaan na toka mae ikota' atina'. Sambagian opateimo nu bajak isambiha'nyo nu kota' ka' sambagian mule' Ku taumo mamba i iwi-iwi na tampat ka' Ku loloi'mo nu bajak.

YEHEZKIEL 5:13

Beleyum mongoa'imo tambuha'-Ku anu taha-tahahumo ka' mule' Aku mangamu'mo sampe Aku puasmo. Salatan iwi-iwi' aijo' jadimo atina'je ka beleyum palesaya taalu' Akumo ahi' na Tumpu anu notataemo hi beleyum kalana Aku notambuha'imo beleyum madi' tulu-tulutan.

YEHEZKIEL 7:12

Tempo'nyo malia'mo toka, sinaanyo ingohanimo! Mian anu mongoli tiba mian anu mompobaluk madi'mo daagi' ko anu opihumpa-humpak na ka untungannyo, kalana hukuman nu Tumpu mongkonamo iwi-iwi' na mian.

YEHEZKIEL 7:15

I songko-songko na jalan daagi' ko pahampaten, isongko-songko na laigan daagi'mo ko panyakit anu molele ka' madi'mo ko anu okaan. Maumo pa' ihe na anu isambiha' nu kota' saidi' mae silakamo i uno nu pahampatean ka' anu jojoong i kota' silakamo nu panyakit ka' silakamo nu ohop.

DANIEL 9:7

O, Tumpu kaputusan nu belento saja' kona ka' adin, panyo kami saja' hondo mombau anu moko ambang hi posi butong mami, aijo'mo kami iwi-iwi' na mian anu sa'a-sa'angu' na bansa tiba kami anu binagi-bagimo nu belento iyaya na lipu' anu majo'on ka' anu ohani kalana aha madi' tulu-tulutan hi Belento.