YEHEZKIEL 40:7 - KITAB NU TUMPU ALLA LELE MA'IMAI'

^7-10 Ihiku nu sabatan daka' ai-aijo' daagi' ko jalan ise-ise' sa'angu' poti-potimbiha' daagi' ko suo'nyo totolu' suele. Iwi-iwi' na suo'nyo haha aijo' pokakana na kodaka'nyo; sulapa' opat ka' ko mantannyo poti-potimbiha' totolu' na meten. Mesen anu mongga'at suo'nyo toto sa'angu' pokakana na ko butolunyo ohua' ka' mintonga' na meten. Jalan ise-ise' aijo' inantan mule' tinotolu' na meten ka' nokiijo'mo idasanyo daka-daka' anu mongahopi Laigan nu Tumpu. Mo'ane aijo' nongukunmo dasanyo daka-daka' aijo' ka' sinumbu'je taalu' ko bolanyo opat na meten; dasanyo kiijo' ipusnyo nu sabatan daka' sasu unonyo anu ohani hondo tiba Laigan nu Tumpu. Mesen anu mongahopi Laigan nu Tumpu ko butolunyo sa'angu' na meten.

YEHEZKIEL 40:7 ပူးပေါင်းရင်းမြစ်များ

1 TAWARIKH 23:28

Aha tionyo ahi' montulungimo to ima-imam lee' mae i Harun mongatun atulannyo monsombah Tumpu i Laigan nu Tumpu, mompobelesi natan, ka' salipi' anu kiijo' i Laigan nu Tumpu, ka' montoa da iwi-iwi' apaa na anu nu Tumpu, madi' mahenyu.

1 TAWARIKH 9:26

Panyo kapala ponjaga anu aha opat aijo' na tataap ahi'. Aha na mompangakui montoa salipi' i Laigan nu Tumpu ka' montoa pakakas anu opo'una' i kiijo'.

2 TAWARIKH 3:9

ka' mosoni' 570 na gram anu obau paku'. Pimpi' mesen i salipi' iwi-iwi' anu aita' mae i buannyo i lapisan suele nu mosoni'.

2 TAWARIKH 31:11

I Tomundo nompalentahmo, sahingga aha nomposadiamo pa' sangkuka na gudang koko Laigan nu Tumpu,

EZRA 8:29

Ojagai na pakakas haha aijo' ima-ima' sampe belemiu tokamo i Laigan nu Tumpu. De tokamo kiijo' mae, tionyo ahi' otimbang nu belemiu na pakakas haha aijo', ka' obee' hi to kapa-kapala nu imam ka' to pola-polaya' nu aha Lewi, ka' to pola-polaya' nu mian Israel kiijo' i Yerusalem.”

YEREMIA 35:4

Aku nomboamo aha i Laigan nu Tumpu, i uno nu dasanyo nu to muli-mulit i Nabi Hanan anak i Yigdalya. Dasanyo aijo aita mae ibawonyo nu dasanyo i Imam Maaseya anak i Salum koko dasanyo nu to mia-mian anu kopangkatnyo sangga'at. I Maaseya pagawe anu matangkas na pangkatnyo anu monjagai iwi-iwi' na sabatan i Laigan nu Tumpu.

YEHEZKIEL 40:21

I sabatan daka' aijo' totototolu' na suo'nyo anu bau ponjaga'an poti-potimbiha' na jalan ise-ise' aijo', sinin na mesen anu mongga'at ka' mule' dasanyo daka-daka' aijo', iwi-iwi' pokakana na ukulannyo tiba anu kiijo' i sabatan daka' sasu kabete'an. Iwi-iwi' na jalan ise-ise' anu isabatan daka' aijo' ko mantannyo 25 meten ka' ko bolanyo 12,5 meten.

YEHEZKIEL 40:29

Suo'nyo haha aijo' anu bau ponjaga'an, dasanyo daka-daka', ka' mesennyo haha aijo' anu i unonyo pokakanamo susumo anu daagi sabatan daka' haha aijo' sangga'at. Suo'nyo haha aiya i sabatan daka' suele ko tolongannyo ahi'. Jalan ise-ise' i sabatan daka' ko mantannyo 25 meten ka' ko bolanyo 12,5 meten.

YEHEZKIEL 40:33

Suo'nyo haha aijo' anu bau ponjaga'an, mesennyo haha aijo' anu sasu unonyo tiba dasanyo daka-daka' ukulannyo sumomo suele anu daagi' i sabatan daka' haha aijo' sangga'at. Isuo'nyo haha aijo' tiba i dasanyo daka-daka' daagi' ko tolongannyo. Ko mantannyo nu jalan ise-ise' nu sabatan daka' aijo' 25 meten ka' kobolanyo 12,5 meten.

YEHEZKIEL 40:36

Ka' suele suo'nyo haha aijo' anu bau ponjaga'an, mesennyo haha aijo' anu sasu unonyo tiba dasanyo ko daka'nyo pokakanamo susumo anu kiijo' isabatan daka' haha aijo' sangga'at. I suo'nyo haha aijo' tiba idasanyo haha aijo' ko tolongannyo. Ko mantannyo nu jalan ise-ise' i sabatan daka' aijo' 25 meten ka kobolanyo 12,5 meten.

YEHEZKIEL 42:5

Suo'nyo iwi-iwi' anu isusunannyo sasu mokiita' lebe soki de obandingakon tiba suo'nyo anu akaong mae i aluknyo, kalana jalan toto ise-ise' i ahop nu suo'nyo anu sasu aita' mae lebe bola de obandingakon tiba anu akaong mae i aluknyo.