YEHEZKIEL 39:18 - KITAB NU TUMPU ALLA LELE MA'IMAI'

¹⁸ Aha mongkaanmo bangke'-bangke' nu suludadu ka' monginumo baso' nu to mia-mian anu balakuasa i dunia. To sulu-suludadu tiba anu balakuasa haha aijo' opateimo susumo mee' lakinyo kabai anak nu mee' kabai sapi' anu toto lompo-lompo'.

YEHEZKIEL 39:18 ပူးပေါင်းရင်းမြစ်များ

MAZMUR 22:12

Boli matikojo'on hi belengku, kalana balaa' anu montokai mae ingohanimo, ka' madi' ko anu montulungi.

MAZMUR 68:30

To tomu-tomundo' momboamo palasombahan hi Belento, kiijo' i Laigan nu Belento i Yerusalem.

YESAYA 34:6

Bajak nu Tumpu aijo' nu kampuhimo nu baso' ka' kahomo lompo' nu aha, sumomo ahi' baso' tiba lompo' nu binatang anu kinolobanakonmo. Kalana Tumpu nomposadiamo koloban i Bozra ka' nompahangkolotakonmo manjoo' hondo itano' nu Edom.

YESAYA 34:7

To mia-mian silakamo susumo sapi' anu ma'ela' ka' sapi' anu daagi' bata'nyo. Lipu' nu aha momea'mo nu baso' ka' kahomo lompo.

YEREMIA 46:5

Panyo Aku, Tumpu nontoamo aha ninsusule'mo mae kalana nabuhukmo. To sulu-suludadu nu aha pinatundu'mo mae ka' nopalaimo mae kalana nabuhukmo madi'mo daagi' nonsiloi hiku.

YEREMIA 50:11

Tumpu notatae, “O, mian nu Babel, belemiu nontololangimo mian anu palesayamo hi beleng-Ku. Belemiu naha lumpatanmo kalana ilame'mo sumomo ahi' ajahan anu nontihaha'mo, ka' mule' sumomo ahi' sapi' anu hau-haunyo mongotot.

YEREMIA 50:27

Pateimo iwi-iwi' na suludadu nu aha! Hopu'imo na aha! Silakamo na bansa Babel! Tinokamo na tempo'nyo aha ohukumo!” (

YEREMIA 51:40

Aha Ku boamo da okolotmo susumo anak nu domba, mee', ka' domba lakinyo. Aku, Tumpu notataemo.”

YEHEZKIEL 29:5

Lapas mae beleyum tiba iwi-iwi' na ikan haha atina' Ku alinmo mamba i padang tampat anu kaho bone'nyo. Butong nu beleyum manimbantamo itano' ka' silakamo ikiijo'. Madi' ko samian anu toka mae molamun beleyum. Butong nu beleyum Ku bee'mo hi to tomo-tomonsi' ka' hi binatang sangga'at da nu kaan nu aha.

YEHEZKIEL 34:17

Potombihing mae oto domba-dombang-Ku! Aku, Tumpu Anu Matangkas na Kuasanyo notataemo hi beleyum saba' Aku momputusimo hukuman nu belemiu toto samian ka' mongga'atakonmo anu ma'ima' da bolimo maninggalo' hi anu ma'idek aijo'mo domba-domba da bolimo maninggalo' hi mee'.

YEHEZKIEL 34:8

Atas sanggong-Ku Tumpu Allah anu tumuu' palahatikan ahi'! Dombang-Ku haha aijo' sina'umo ka' mule' kinaanmo nu binatang anu mahangas, kalana madi' ko anu nolaya' aha. Belemiu to pola-polaya'-Ku madi'mo nongkalesang domba haha aijo'. Belemiu ola ahi' mompotutugakon posi butong nu belemiu, misa'mo kapentingan nu domba haha aijo'.

YEHEZKIEL 39:19

Salatan Ku poko pateimo mian haha aijo' sumomo ahi' koloban, to tomo-tomonsi' ka' binatang sangga'at mongkaanmo lompo'nyo iwi-iwi' sampe mongoa'imo bubun ka' monginumo baso'nyo sampe malangumo.

AMOS 4:1

Potombihing mae to bou-boune nu Samaria anu nompaka polompo'mo susumo to sapi-sapi' anu molompo' kiijo' i Basan! Belemiu mongkabisa'i mian anu madi'moko ala, lewa' mompakisa mongala anu nu mian kakiasi, ka' mompa kisa mo'ane nu belemiu da saja' momposadiakon inumon anu moko palangu hi belemiu!

PO'ULE' INGULIT 32:14

Sapi' ka' mee' ka' domba nu aha pohumpakanmo susu manjoo'; potuu'on nu aha to ima-ima' hondo, gandum ka' anggur nu aha ma'ima' hondo.

ANU PINOTO'I HI YOHANES 19:21

Ka' suludadu nu aha pinateanmo nu bajak anu nosabat lengkat mae i nganga' nu anu nonsake'i ajahan mopute' aijo'. Sahingga to tomo-tomonsi' suele tinokamo ka' nongkaanmo majoko' hondo i antoknyo nu aha anu pinateanmo aijo'.