YEHEZKIEL 38:23 - KITAB NU TUMPU ALLA LELE MA'IMAI'

²³ Tiba jalan anu sumo aijo' na Aku mompotoa hi sinin na bansa taalu' Akumo ahi' aiya na anu daka' na kakuasa'an tiba mule' susi'. Sahingga nu sumbu'je nu aha taalu' Akumo ahi' na Tumpu.”

YEHEZKIEL 38:23 ပူးပေါင်းရင်းမြစ်များ

MAZMUR 9:16

To bansa-bansa anu madi' monsumbu' Belento nanabu'mo i bolo' anu pinosi kekemo nu aha; aha kinonamo nu so'o anu posi ahamo na nonta'an so'o.

NOSABATMO 14:4

Ku potimbalije na ia da panggaga sahingga ia mololoi'mo belemiu. Panyo Ku potoaje na kakuasa'an-Ku hi tomundo Mesir ka' hi suludadunyo, da nusumbu' nu aha taalu' Akumo na Tumpu.” Lantas binaumo nu aha mian Israel susumo anu pinalentahkonmo nu Tumpu hi aha.

YESAYA 25:3

Belento nu puji'mo nu to bansa-bansa anu toto hoso-hoson, ka' okabuhukmo iyaya mae na kota' nu to bansa-bansa anu buhingison.

YEHEZKIEL 20:41

Salatan belemiu Ku boamo mosabat lengkat mae i songko-songko na lipu' itampat pipinongga'a-ga'atakonanmo belemiu, Aku po ule'mo momposihuk belemiu ka' montalimamo iwi-iwi na koloban anu opotunu nu belemiu. Sahingga songko-songko na bansa monsumbu'je taalu' Akumo ahi aiya na Tumpu Anu Susi' hondo.

YEHEZKIEL 20:42

Bisuanyo belemiu Ku boamo minsusule' itano' nu Israel, tano' anu jinanji'Kumo hi mompolee' nu belemiu, sahingga nu sumbu'je nu belemiu taalu' Akumo ahi' na Tumpu.

YEHEZKIEL 28:22

Poto'i hi aha anu jojoong ikiijo' taalu' Aku Tumpu Anu Matangkas na Kuasanyo notataemo hi aha, ‘Aku aiya sampobali' nu belemiu, o Sidon. Aha to mia-mian mompuji'mo Aku kalana palabuatan-Ku hi beleyum. Salatan Aku mohukumo mian anu jojoong atina' hi beleyum nu sumbu'je nu aha taalu' Akumo ahi' na Tumpu anu susi'.

YEHEZKIEL 28:25

Tumpu Anu Matangkas na Kuasanyo notatae, “Ku posihukmo na to mia-mian Israel lengkat mae i iwi-iwi na lipu' anu toto jo'o-jo'on i tampat nu aha pipinongga'a-ga'atakonan-Kumo aha tiba iwi-iwi' na bansa saidi' mae monsumbu'je taalu' Aku susi'. Bansa Israel po ule' mule' jojoong i tano' nu aha, tano' anu binee'-Kumo hi posaihon-Ku i Yakub.

YEHEZKIEL 36:23

Ku potoamo na kasusi'an nu sanggong-Ku anu balakuasa aijo', sanggo anu ihumimi'anmo nu belemiu hi aha to bansa-bansa, sahingga nu sumbu'je nu aha taalu' Akumo ahi' na Tumpu. Aku, Tumpu Anu Matangkas na Kuasanyo notataemo. Ku pakemo na belemiu da momponyata' hi aha bansa-bansa taalu' Aku aiya susi'. Tumpu anu Susi' hondo.

YEHEZKIEL 37:28

De Laigan-Ku daagi'mo ko anu aijo' hi aha sampe toka sidu-sidutu', nu sumbu'je nu aha bansang sangga'at taalu' Akumo ahi' na Tumpu anu nompile'imo aha Israel sahingga jinadimo mian anu palesayamo hi beleng-Ku.”

YEHEZKIEL 37:6

Ku pokonaimo uat tiba antok hi belemiu ka' Ku lupi'mo na belemiu nu kilit. Belemiu Ku bee'imo santuu' sahingga tumuu'mo. Sahingga nu sumbu'je nu belemiu taalu' Akumo ahi' na Tumpu.”

YEHEZKIEL 38:16

Lantas nu tumbuhimo na mian Israel anu palesayamo hi beleng-Ku susumo antong anu daka' hondo montintipmo tano'. De tokamo na tempo'nyo, beleyum Ku saimo mae da monjojoongimo tano'-Ku. Tiba jalan sumo aiya Aku nonggunakonmo beleyum o, Gog, nusumbu'je nu to bansang-bansang ihe sabenannyo na Aku, aijo'mo Tumpu Allah anu susi'.

YEHEZKIEL 39:13

Songko-songko na mian nu lipu' montulungimo pakalaja'an molamun aijo'; ka' kalana mombaumo pakalaja'an aijo' saba' aha montalimamo tambonyo de tokamo na sinaa nu kamenangan-Ku. Aku, Tumpu Anu Matangkas na Kuasanyo notataemo.

YEHEZKIEL 39:21

Tumpu notatae, “Ku potoamo na kakuasa'an-Ku hi aha bansa-bansa. Nu toaje nu aha pa' mosia na Aku monggunakon kuasang-Ku monsidahi kaputusan-kaputusan-Ku anu adin.

YEHEZKIEL 39:27

Po ule'mo Ku sule'akon na aha lengkat mae ilipu'-lipu' nu sampobali' nu aha ka' mule' kasusi'an-Ku nu toaje nu aha iwi-iwi' na bansa kalana palabuatan-Ku aijo'.

YEHEZKIEL 39:7

Panyo aijo' hi aha Israel, Ku poto'imo na sanggong-Ku anu susi' ka' sanggong-Ku aijo madi'mo daagi' ohumimi'i. Sahingga nu sumbu'je nu to bansa-bansa taalu' Akumo ahi' na Tumpu, Tumpu anu susi' lengkat mae hi aha Israel.”