YEHEZKIEL 26:16 - KITAB NU TUMPU ALLA LELE MA'IMAI'

¹⁶ Montoa uki' nu beleyum anu sinumo atina'mo, sahingga to tomu-tomundo' nu bansa-bansa anu isonibi nu ambai tuminjomo madi'mo sumuhang i tahtanyo ka' nu ukatmo nu aha na baju' pesalin tiba baju' nu aha anu sinujian, lantas sumuhangmo panyo nu lakatmo aijo' itano'. Aha mabuhukmo ahi' hondo sahingga madi'mo tenda na nu oa'i nu aha.

YEHEZKIEL 26:16 ပူးပေါင်းရင်းမြစ်များ

AYUB 8:22

Anu mongka'ideki beleyum ma'ambangmo, ka' nu oa'i madi'mo ko angga'nyo, ka' laigan nu mian anu uwesan o'ideimo sahingga madi'mo ko buyo'nyo.”

MAZMUR 109:18

De hi ia mongkutuki aijo' sa'angu' na palabuatan anu madi'mo okatalanggangakon, pokakanamo sumo ia mompusok baju'nyo. Bakas da kutuk aijo' na molabe-labesmo susumo uee aijo' i butongnyo, ka' susumo lanya' minsoop i uno nu buku nu butongnyo iwi-iwi'.

MAZMUR 109:29

Bakas da to mia-mian anu montutuk mae aku mohumpak anu moko ambang, ka' han anu moko ambang aijo' monsaingkukubi aha susumo juba'.

MAZMUR 132:18

Kalaja'annyo saja'mo mohumpak ka'ima'an, panyo iwi-iwi' na mian anu monsapobali' aha opopoambangmo.”

MAZMUR 35:26

Sahanyo mian anu sanang na montoa kasansala'anku timbalimo bingong ka' mohumpakmo ambang. Sahanyo mian kobubuun mae hi belengku o'alu ka' opopo ambang.

YESAYA 3:26

Isabatan toto daka-daka' nu kota' mian humangmo ka' lewa'mo tumando' ka mule' kota' aijo' saidi' mae sumomo boune anu ilanggo'anmo anu suha-suhang i tano'.

YESAYA 41:5

Mian anu jojoong ilipu' anu toto jo'o-jo'on nontoamo mae apaa na anu binaung-Kumo. Aha tinolokengkengmo ka' ilakatnyomo kalana nabuhukmo, lantas sinihukmo hingga-hinggat ka' tinokamo mae.

YESAYA 47:1

Tumpu notatae, “O, Babel pintatau', bolimo sumuhang atina' ikadela nu beleyum, ka' suhangmo i abu'. Beleyum madi'mo nompokopiani butong ka' madi'mo natopos susumo naipuan mae.

YESAYA 52:2

Tinjomo lengkat mae atina' i abu' o Yerusalem, sapui na abu' anu natikampitmo i butong nu beleyum. Bukai na lante' anu atina' sego-segot i gogohong, nu beleyum. O, mian anu jojoong i Sion anu i hakopmo!

YEREMIA 48:39

Moab ihansunmo nohintutu! Na ambangmo hondo na Moab! Ia ihumangmo kalana pinopo ambangmo ka' sola'mo kinokojoan nu to bansa-bansa anu aitu mae mompaha ohani ia. Aku, Tumpu, notataemo.”

MOHAANGI 2:10

Aha to tu'a-tu'anyo nu kota' momo'mo suha-suhang i tano'; aha nongkakambuhakonmo abu' aita i ubak nu aha, ka' nompakemo hude kalung salaku tanda sinusa'mo Tolalangkoyang nompodukumo ahi' suele ubak nu aha toka-toka i tano'.

YEHEZKIEL 16:10

Lapas aijo' pinopusok-Kumo na baju' anu kosujinyo hi beleyum ka' mule' sapatu to kilit anu ma'ima' hondo na binau, ka' mule sigut te hude lenan na binau ka' mule' juba' te sutala' na binau.

YEHEZKIEL 26:21

Beleyum Ku pojadimo sonto' anu okabuhuk hondo, ka' aijo'mo na puusnyo nu kantumuu'an nu beleyum. To mia-mian moliomo beleyum panyo beleyum madi'mo daagi' okabot. Aku Tumpu Anu Matangkas na Kuasanyo notataemo.”

YEHEZKIEL 28:17

Ohup nu beleyum anu ontinganan atina' nonsaduakonmo beleyum sahingga kinobubuunmo ka' kalana beleyum tinalasanggomo atina'mo na nonsaduakon beleyum sahingga pinonga'mo na binalatanga'. Mokonyo aijo' beleyum Ku sapahakonmo itano' ka' Ku pojadimo salaku sonto' hi aha to tomu-tomundo' sangga'at'.’ ”

YEHEZKIEL 31:15

Sumo uuka na koonyo nu Tumpu Anu Matangkas na Kuasanyo, “De kau' aijo' mintatau'mo i dunia nu mian anu sinilakamo, Kupalentahmo na uee anu i aluknyo nu tano' mongomoki ia salaku tanda ko anumo ihaangan. Sabole-bolemo Ku tahan na solok nu kaunyo ka' mongonsongimo iwi-iwi' na panga'nyo nu kaunyo. Kalana kau' aijo' inanggasmo, Ku potokamo mae na pikat aita' isinin na bungkutnyo nu Libanon ka' mompopangkalualemo iwi-iwi' na kau' i uno nu alas.

YEHEZKIEL 32:10

Memang totu'u, Ku tabasakonmo na bajak-Ku ka' mompatundu'mo beleyum. To tomu-tomundo' tiba to bansa-bansa montoamo palabuatan-Ku aijo' hi beleyum. Tempo'nyo aijo' aha langkakatanmo kalana mabuhukmo ka' mule' nu lakatmo kalana mabuhuk silaka.’ ”

YEHEZKIEL 7:27

Itomundo' tumando'mo na lewa' humang, anak mo'ane nu tomundo' madi'mo ko anu otaha'imani ka' mule aha mian da'isan lengkatanmo bau nu buhuk. Aku mohukumo beleyum sitimbang tiba palabuatan iwi-iwi' nu beleyum ka' momputusimo hukuman nu beleyum susumo belemiu mombee'i hukuman hi mian sangga'at. Sahingga nu sumbu'je nu beleyum taalu' Akumo ahi' na Tumpu.”

YEHEZKIEL 7:8

Madi'mo daagi' pin na belemiu mongoa'imo tambuha'-Ku anu taha-tahahumo. Ku putusimo na hukuman nu beleyum sitimbang tiba palabuatan nu beleyum. Ku balosakonmo hi beleyum iwi-iwi na palabuatan nu beleyum anu talalo mahumimi'.

DANIEL 5:6

Ia inesemo hondo ka' nabuhukmo sahingga bukunyo i lakatnyomo.

HOSEA 11:10

Tumpu notatae, “Mian-Ku anu palesayamo mombatukimo Aku de Aku molohu'mo susumo singa ka' mompopobuhukmo sampobali' nu aha. Mian-Ku anu palesayamo sampamo mae toka lengkat isasu kabete'an da monsombahmo Aku.

YUNUS 3:6

Salatan tomundo' nu Ninewe nohongomo lele aijo' ia balomo tinuminjo ingukatnyomo na juba' nu kalaja'annyo ka' nompusokmo hude kalung ka' sinumuhangmo na ia i abu'.

HAGAI 2:22

to kala-kalaj'an Ku ideimo ka' mule' kuasa nu aha Ku hansunimo. Iwi-iwi' na kareta anu bau pahampate tiba anu mompojalan Ku bali-balikakonmo; iwi-iwi' na ajahan mohopu'mo ka' mule' anu monsake'i mompaha pate-pateimo.

1 PETRUS 5:5

Sumo aitumo na kita Utus, to oli-olitau ka' to lalangkoyang. Tulu-tulutan hi to mia-mian anu motu'amo. Kita Utus iwi-iwi' boli ko tige-tige ka' mompaha kale-kalesang ahi', boli kobubuun na kinyonyoa. Kalana i uno nu Kitab nu Tumpu tinulismo sumo uuka, “Tumpu mongewa mian anu buulon, panyo mongkalibosi mian anu madi' ko tige-tige.”

ANU PINOTO'I HI YOHANES 18:9

To tomu-tomundo i dunia anu suele nombaumo han masala' aijo' ka' napisu nu boune aijo' mohangije ka' montando'imo kota aijo' de aha montoamo tibuk ko puha-puha lengkat i apu anu montoyo'ije ia.