YEHEZKIEL 12:3 - KITAB NU TUMPU ALLA LELE MA'IMAI'

^3-6 Kalana aijo' o, manusia anu madi' tumuu' batu. Bau na uuka, panyo obau sinaa potouka na bala-balang nu beleyum ka' obaluni isa'angu' na balunan susumo anu saja' nu bau nu aha anu oboamo ka' opojoongmo ilipu' sangga'at. Ka' ma'isa pe'e pihi pala'imo na laigan nu beleyum panyo boli ahi' matikohowini hi mian susumo ahi' mian anu oboamo itampat pompojoongan. Bolo'i na pimpi' nu laigan nu beleyum panyo nu toa ahi' nu mian anu sasaja' motomuhuk haha aijo', ka' boamo na balunan anu ko isinyo nu balang nu beleyum ka' posabatmo montulu bolo' ai-aijo'. Ka' simbumo na balunan atina ibekoang nu beleyum. Ka' lambamo panyo pihije ahi'; kukubi na mata nu beleyum sahingga madi' nu toa-toa na jalan anu nu tului. Pobakas da iwi-iwi' na bansa Israel montoa iwi-iwi' apaa na anu binaumo nu beleyum, da baumo salaku pokinde' hi aha. Da ihe na monsumbu' ugaat tiba jalan anu sumo aijo' aha mangalati'je taalu' aijo'mo aha na anu saja' motomuhuk.”

YEHEZKIEL 12:3 ပူးပေါင်းရင်းမြစ်များ

MAZMUR 81:13

Kalana aijo' pinojoho-Kumo na aha da pinanggagamo, bakasmo na aha da mombatukimo posi pongka'oho' nu aha.

YEREMIA 10:17

Mian anu jojoong i Yerusalem, belemiu otumbuhi! Kalana aijo' pogompilingmo!

YEREMIA 26:3

Ihe na monsumbu' bansa aijo' mongka'oho' ahi' mompotombihing, lantas madi'mo mombau anu ma'idek sahingga Ku intimo na niat-Ku monsilakai aha sitimbang tiba palabuatan nu aha ma'i-ma'idek aijo'.”

YEREMIA 27:2

da mombau kahohon te kilit na obau tiba tokon te kau na obau, ka' opokona itundunku.

YEREMIA 36:3

Ugaat mian nu Yehuda belentimo na mombau palabuatan anu ma'idek de aha mohongomo iwi-iwi' na balaa' anu Ku pokona hi aha. Sahingga ku ampunimo na dosa' tiba palabuatan nu aha ma'i-ma'idek aijo'.”

YEREMIA 36:7

Ihe na monsumbu' tiba jalan anu sumo aijo' aha balado'amo hi Tumpu, ka' balatobatmo madi'mo mombau sinin na palabuatan nu aha ma'i-ma'idek aijo'. Tumpu notambuha'mo hondo hi aha ka' nompoto'imo hukuman hi aha.”

YEREMIA 7:26

Panyo madi' ko anu mohongo kabai ko anu mompalahatikan. Belemiu ola mule' ahi' nompaka panggaga ka' naidek nolingkuduimo mompolee' nu belemiu.”

YEHEZKIEL 12:7

Lantas binaungkumo na palentah nu Tumpu anu binee'-Nyo hi belengku. Tempo'nyo aitu daagi' ahi' sinaa, pinosadiangkumo na to bala-balangku ka' binalunankumo susumo anu saja' nu bau nu aha mian anu mambamo ilipu' sangga'at. Salatan sinaa kahanda'mo malom binolo'ankumo nu limangku na pimpi' mesen nu laiganku lantas aku nosabatmo nontulu bolo' ai-aijo'. Ka' tinoa ahi' nu aha mian iwi-iwi, ka' balunan aijo' sinimbungkumo nu bekoangku lantas aku nambamo.

YEHEZKIEL 3:26

Ku pojadimo na jila' nu beleyum madi'mo moko ala mongkohenggo sahingga beleyum madi'mo moko ala mompokinde'i bansa anu saja' motomuhuk aiya.

YEHEZKIEL 3:27

Saidi' mae de Aku po ule'mo motatae hi beleyum ka' po ule'mo mombee' kahosonan nu beleyum da timbalimo motatae, beleyum tionyo ahi' mompotokakonmo apaa na anu Ku poto'i, Aku, Tumpu Anu Matangkas na Kuasanyo mompoto'i hi aha. Sambahagian na aha aijo' saidi' mae mompotombihing, panyo sambagian mule' na madi' ahi' kalana aha memang bansa anu saja' motomuhuk.”

YEHEZKIEL 33:11

Poto'iakon hi aha saba' atas sanggong-Ku, Tumpu anu tumuu', Tumpu Anu Matangkas na Kuasanyo, Aku madi' sanang de mian anu palabuatannyo ma'idek silaka; panyo mule' ahi' Ku ka'ima'i da ia bolimo daagi' lewa' mombau dosa'nyo haha aijo' da ia tataap tumuu'. O bansa Israel, bolimo daagi' lewa' mombau palabuatan ma'idek! Kadaka' belemiu mongka'ima'i silaka?

YEHEZKIEL 43:11

Ka' salatan aha ma'ambangmo nunu saduakon nu palabuatan nu aha, atinaje' ka' poto'i mosia na montanga'i Laigan-Ku aiya na aha: potongannyo, iwi-iwi' na sabatannyo bau pinsoopan tiba posabatan, mosia na susunannyo nu laigan, iwi-iwi' na palentah tiba iwi-iwi' na atulannyo. Tulismo na iwi-iwi' aijo' da nu toongi nu aha da timbali nu toa nua aha ka' mompalahatikan mosia na mongatun iwi-iwi' aijo', ka' montuluti iwi-iwi' na atulannyo.

LUKAS 13:34

Yerusalem, Yerusalem! To nabi-nabi pinateanmo! To poka-pokauhon nu Tumpu pinahambunu'akonkumo nu batu sampe i nate! To pimpi-pimpianmo na Aku kahanda' molimu' iwi-iwi' na tumpu nu lipu'um sumo tinaan nu manuk mongokobi to sio-sioknyo i aluk nu polipiknyo, panyo beleyum madi' mongka'oho'!

LUKAS 20:13

Ahennyo tumpu nu ale' aijo' notatae, ‘Apaa mule' na tionyo kubau? Kusaije na posi anakku anu kuku kalibosi. Tantu iaje na nu adati nu aha!’

PO'ULE' INGULIT 32:29

De aha pande, aha mangalati'mo, ka' mompopikilakonmo apaa na anu saidi' mae jadi i mihinyo hi aha.

PO'ULE' INGULIT 5:29

Soba de aha saja' ko pikilan sumo aijo'! Soba de aha saja' mongadati Aku ka' montuluti palentah-ngKu iwi-iwi', sahingga aha ka' lee' nu aha mohumpak ka'ima'an sampe toka sidu-sidutu'!

2 TIMOTIUS 2:25

Ia madi' ko sega-sega na mongajan mian anu ka'oho' monggagakon; o'amalakon da Tumpu mombee'i kasampatan hi mian haha aijo' da balatobat mombabali'i dosa-dosa' nu aha, ka' monsumbu' pangajalan anu totu'u.