YAKOBUS 2:13 - KITAB NU TUMPU ALLA LELE MA'IMAI'

¹³ Kalana Tumpu madi' mompotoa kalibosan-Nyo hi mian anu madi' monsumbu' kalibosan. Panyo kalibosan lebe mahoson molingkudui hukuman!

YAKOBUS 2:13 ပူးပေါင်းရင်းမြစ်များ

KAJADIAN 42:21

Lantas notataemo na aha samian ka' samian, “Jadi, kita uuka aiya i hukumo kalana kasala'anto hi utus ise'to u'utu mae; ia nomoitamo tulung panyo madi' pinajulinto, mau mule' tinoantomo na ia sinansalamo hondo. Mokonyo aijo' kita uuka aiya nongoa'imo kasala'an aiya.”

2 TAWARIKH 28:11

Potombihing mae! To mia-mian anu i hakopmo mae aiya, to utu-utus nu belemiu. Jadi saimo na aha minsusule'. De madi' nutambuha'imo nu Tumpu ka' nu hukumo na belemiu.”

MAZMUR 18:25

Sahingga Tumpu nombalosimo kalakuanku anu saja' totu'u na ku bau, kalana Ia monsumbu' aku madi' ko kasala'an.

MAZMUR 85:10

Memang Ia ko kahanda' momposalamat anu tulu-tulutan. Tumpu anu talasanggo hondo jojoongmo i lipu'to aiya.

AMSAL 21:13

Ihe na madi' mongka'oho' mohongo tusa' nu mian anu kinaku langanmo madi' opolahatikan de ia na momoita tulung.

AMSAL 22:16

Ihe na mongka'oho' timbali kaya, tiba jalan monsansala mian anu kasiasi ka' mombee'i palasen hi mian anu kaya, imihinyo mae timbalimo kasiasi hondo.

YESAYA 27:11

De to panga-panga'nyo manggasmo ka' mopato'mo tokamo mae nu ala nu to bou-boune da bau kau' anu oposun. Bansa aijo' madi' ko anu nu pisumbu-sumbu', sahingga Tumpu anu nompotimbalimo ia madi'mo daagi' mongkalibosi aha.

YEREMIA 9:24

Ihe na mongka'oho buulonmo kalana apa-apaa, anu ahi' obuulakon aijo'mo ia monsumbu' ka' mompangalati'i Aku; tukoonyo ia monsumbu' taalu' Aku mongkalibosi sampe toka sidu-sidutu' ka' Akumo ahi' na nompodaagi' atulan tiba ka adilan idunia aiya. Iwi-iwi' aijo' momposanang mae kinyonyoang-Ku. Aku, Tumpu, na nompoto'imo aijo'.”

YEHEZKIEL 33:11

Poto'iakon hi aha saba' atas sanggong-Ku, Tumpu anu tumuu', Tumpu Anu Matangkas na Kuasanyo, Aku madi' sanang de mian anu palabuatannyo ma'idek silaka; panyo mule' ahi' Ku ka'ima'i da ia bolimo daagi' lewa' mombau dosa'nyo haha aijo' da ia tataap tumuu'. O bansa Israel, bolimo daagi' lewa' mombau palabuatan ma'idek! Kadaka' belemiu mongka'ima'i silaka?

MIKHA 7:18

Madi' ko Tumpu anu sumo Belento, o, Tumpu anu mongampuni dosa' nu mian anu pinile'anmo nu Belento aijo'mo mian anu daagi' tinontuha'. Madi' sampemo sidu-sidutu' na Belento motambuha'; panyo ola ahi' belento sanang na mompotoa kanonongan nu Belento anu madi' ko batasnyo aijo'.

MATIUS 5:7

Bila-bilahi na mian anu mongkalibosi mian sangga'at; Tumpu mongkalibosije aha suele!

MATIUS 6:15

Panyo de komiu madi' mongampuni kasala'an nu mian sangga'at, Tuumaum i suluga' mule' madi' mongampuni kasala'an miu.”

LUKAS 16:25

Panyo i Abraham nontaami, ‘Tutugi anakku: Salatanmo pe'e tinuu'um, beleyum nohumpakmo anu toto ima-ima'; sadang i Lazarus nohumpak anu toto ide-idek. Uuka ia sanangmo i aiya, ka' beleyumo na sansala.

LUKAS 6:37

“Boli mompisala'i mian sangga'at, da boli komiu suele nu pisala'i nu Tumpu. Boli mohukum mian sangga'at, da boli komiu suele nu hukum nu Tumpu. Ampuniakon na mian sangga'at, da Tumpu suele mongampuni komiu.

YAKOBUS 3:17

Panyo mian anu daagi' ko kapandean anu nolengkat mae kiita' i bawo, ia na anu momona hondo lomas, lapas mule' mongka'ima'i dame, ma'ima' na kinyonyoa hi sangko mian, mohongo-hongo. Ia saja' mongkalibosi ka' kalakuannyo saja' ma'ima'. Ia madi' montinjohi sangga'at ka' madi' mimpula-pula.

YAKOBUS 5:4

Komiu madi' nombayan tambonyo nu to mia-mian anu mokalaja i ale' nu belemiu. Uuka aiya potombihing na aha notusa'mo! To mia-mian anu nolimu'akon hasin nu ale' miu, noloobo'mo momoita tulung, ka' lobo' nu aha tinokamo i bihing nu Tumpu, Tumpu Anu Matangkas na Kuasanyo.

TO MIA-MIAN KOPIAN 1:7

Koonyo i Adoni-Bezek, “U'utu mae pitumpulu' na tomundo pinatagakonkumo na kanumpu nu limanyo ka' kanumpu nu tengkenyo, lantas pinojohokumo na aha mongkaan tuuha' nu anu kinaanmo anu manabu lengkat mae aita' i meja'ku. Uuka aiya Tumpu Allah nombaumo aku pokakana sumo aku nombaumo aha.” I Adoni-Bezek ahennyo binoamo i Yerusalem, ka' ikiijo'mo mae na ia sinilaka.

TO MIA-MIAN KOPIAN 5:27

I tengke i Yael na ia notua' madi'mo kino nyawanyo timpa-timpas i tano' sinilakamo.