ROMA 8:9 - KITAB NU TUMPU ALLA LELE MA'IMAI'

⁹ Panyo komiu madi' tumuu' mombatuki sipat nu mian. Komiu tumuu' mombatuki pongka'oho' nu Roh nu Tumpu – de memang, Roh nu Tumpu totu-totu'u montoongi kuasa i uno nu butongum. Mian anu madi' ko Roh i Kristus, mian aijo' misa' i Kristus na tumpunyo.

ROMA 8:9 ပူးပေါင်းရင်းမြစ်များ

YEHEZKIEL 11:19

Aha Ku bee'ije kinyonyoa anu sangalasan ka' mule' pikilan anu sangalasan, madi'mo pokakana sumo anu ihikuhakonmo. Kinyonyoa nu aha anu nokuutmo susumo batu Ku alamo ka' Ku bolosimo nu kinyonyoa anu tulu-tulutan hi beleng-Ku.

LUKAS 11:13

Mau mule' komiu ma'idek, komiu ahi' monsumbu' mombee' anu ma'ima' hi anakum. Apaa mule' Tuuma i suluga'! Ia mombee' Roh-Nyo hi aha anu momoita hi Ia!”

YOHANES 14:17

Ia aijo' Roh nu Tumpu anu momponyata' kahondoan mongkona Tumpu. Dunia madi' montalima Ia kalana madi' montoa ka' madi' monsumbu' Ia. Panyo komiu monsumbu' Ia, kalana Ia jojoong hingga-hinggat ka' komiu, ka' mosa'angu' tiba komiu.

YOHANES 14:23

I Yesus nontaami, “Mian anu mongkalibosi Aku, tionyo mombatuki pangajalan-Ku. Tuumang-Ku mongkalibosije ia. Tuuma ka' Aku tokaje hi ia ka' jojoong hingga-hinggat ka' ia.

YOHANES 3:34

Kalana mian anu sinai nu Tumpu mompotokakon potatae nu Tumpu, kalana Roh nu Tumpu binee'mo hi Ia iwi-iwi'.

YOHANES 3:6

Butong nu mian susumo aiya anu kantoan, ohampeakon nu tu'a nyonyo, panyo palesaya hi Tumpu ohampeakon nu Roh nu Tumpu Allah.

SISIKON NU TO RASUL-RASUL 16:7

Salatan tinokamo i potempasan nu Misia, aha nompi pinsoopmo mokiijo' i Provinsi Bitinia, panyo Roh i Yesus nontewa' aha mamba mokiijo'.

ROMA 7:5

Kalana, u'utu mae kita tumuu' mombatuki sipat-sipat nu mian. Tempo'nyo aitu anu okamilui monsaduakon da baladosa', anu lubat mae kalana ko atulan nu agama na montoongi kuasa i uno nu butongto. Mokonyo aijo' kita mombau anu mongahenakon kapatean.

ROMA 8:1

Uuka aiya madi'mo ko pohukuman hi aha anu tumuu' mosa'angu' tiba i Kristus Yesus.

ROMA 8:11

De i Kristus sinilaka, pino tumuu' nu Roh nu Tumpu, tumuu' i uno nu butongum, saba' Ia anu nompotumuu' i Kristus tempo'nyo Ia sinilaka aijo' sueleje mompotumuu' butongum anu timbali silaka aijo'. Ia mombau aijo' nu Roh-Nyo anu tumuu' i uno nu butongum.

ROMA 8:2

Kalana atulan nu Roh nu Tumpu na mombau kita tumuu' mosa'angu' tiba i Kristus Yesus nompobebasmo aku lengkat i atulan anu monsaduakon dosa' ka' kapatean.

1 KORINTUS 15:23

Panyo toto samian po'ule' opotumuu' ko posi tempo-tempo'nyo; momonanyo i Kristus; lapas aijo' de po'ule'mo Ia toka mae, sueleje to mia-mian anu i Kristusmo na tumpunyo.

1 KORINTUS 3:16

Osumbu' nu kita Utus, saba' komiu Laigan nu Tumpu? Ka' saba' Roh nu Tumpu jojoong i uno nu butong miu?

1 KORINTUS 6:17

Panyo mian anu momposa'angu' butongnyo tiba Tumpu, Roh nu Tumpu tiba roh nu mian aijo' nosa'angu'mo.

1 KORINTUS 6:19

Tionyo ahi' osumbu' miu saba' butong miu kajojoongan nu Roh nu Tumpu. Roh aijo' jojoong i uno nu butong miu. Ka' posi Tumpu na nombee' Roh aijo' hi komiu. Butong nu kita Utus, misa' kita na tumpunyo. Aijo' Tumpu na tumpunyo.

2 KORINTUS 10:7

Sinsu-sinsumbu'mo ahi' na komiu i han anu sahondo-hondonyo. De toto samian palesayamo tukoonyo, ia anumo i Kristus, yo tutugimo ahi' na posi butong, ka' sinsumbu'mo ahi' saba' kami singkona anumo i Kristus pokakana sumo ia.

2 KORINTUS 6:16

Apaa na tuusanannyo Laigan nu Tumpu tiba laigan nu pilogot? Kita aiya Laigan nu Tumpu, aijo'mo Tumpu anu tumuu'. Posi Tumpu na notatae, “Aku jojoongmo hi aha, ka' tumuu' hingga-hinggat tiba aha. Aku timbalimo Tumpu nu aha, ka' aha timbalimo mian anu palesayamo hi beleng-Ku.

GALATIA 4:6

Kalana komiu to ana-anakmo nu Tumpu, Tumpu nonsaimo mae Roh nu Anak-Nyo da minsoop i uno nu kinyonyoa nu kita Utus ka' i kinyonyoangku, aijo'mo Roh anu notatae, “Tuuma, o, Tuumangku.”

GALATIA 5:24

To mia-mian anu i Kristus Yesusmo na tumpunyo, mian haha aijo' nompateimo sipatnyo salaku manusia tiba iwi-iwi' na napisunyo ka' apaa na anu nu ka'ima'i.

EFESUS 1:13

Belemiu suele tinimbalimo mian anu palesayamo hi Tumpu Allah tempo'nyo belemiu nohongomo potuunon nu Tumpu, aijo'mo Lele Ma'ima' anu mombee'i kasalamatan hi komiu. Belemiu palesaya hi Yesus Kristus, kalana aijo' Tumpu nombee'imo tanda hi komiu ponsumbu'an komiu anunyomo, aijo'mo Roh-Nyo anu jinanji'-Nyomo.

EFESUS 2:22

Kalana tumuu' nosa'angu'mo tiba i Kristus, komiu mule' hau-haunyo pinotinjomo hingga-hinggat tiba to mia-mian sangga'at da timbali sa'angu' na Laigan nu Tumpu; i kiijo' na Tumpu Allah jojoong tiba Roh-Nyo.

EFESUS 3:17

Ku'amalakon kalana komiu pinalesayamo hi Kristus, i Kristus jojoongmo i uno nu kinyonyoa miu, ka' kantumuu'an miu mompintoongimo ka' nu kuasaimo nu kalibosan.

FILIPI 1:19

kalana kusumbu' saba' do'a miu tiba mule' tulungan lengkat mae hi Roh i Yesus Kristus, aku opobebasje.

2 TIMOTIUS 1:14

Kalana tulungan nu Roh nu Tumpu anu tinumuu'mo i uno nu kantumuu'anto, tionyo ahi' nu jagai nu beleyum ima-ima' na hahan anu ko halaga'nyo, anu pinalesayakonmo hi beleyum.

1 PETRUS 1:11

Aha monselidiki mosia ka' hipian na han aijo' timbali, apaa na anu kokoonyo nu Roh i Kristus anu kiijo' i butong nu aha. Tempo'nyo aitu Roh-Nyo na nompoto'i hi aha mongkona kasansala'an-kasansala'an anu tionyo nu oa'i i Kristus ka' mongkona katalasanggoan-Nyo anu nutalimaje lapas aijo'.

1 YOHANES 3:24

Iwi-iwi' na mian anu tulu-tulutan i to pale-palentah nu Tumpu, tumuu' nosa'angu' tiba Tumpu, ka' Tumpu nosa'angu' tiba aha. Ka' osumbu'to saba' Tumpu tumuu' nosa'angu' tiba kita, kalana Ia nombee'imo Roh-Nyo hi kita.

1 YOHANES 4:13

Kalana Tumpu nombee'imo kita Roh-Nyo, jadi osumbu'tomo taalu' kita tinumuu'mo nosa'angu' tiba Tumpu, ka' Tumpu nosa'angu'mo tiba kita.

1 YOHANES 4:4

Panyo to Ana-anakku komiu anumo nu Tumpu. Komiu nohungku'imo to nabi-nabi anu madi' totu'u kalana Roh anu daagi' hi belemiu lebe daka' na kuasanyo molingkudui roh anu daagi' hi to mia-mian anu kinuasanmo nu dunia aiya.

ANU PINOTO'I HI YOHANES 13:8

Binatang aijo' na nu sombah nu iwi-iwi' mian anu tumuu' i uno nu dunia, sambiha'nyo to mia-mian anu sanggonyo noko daputanakonmo ma'isa pe'e dunia pinotimbali, i uno nu kitab nu mian anu tumuu', tumpu'nyo aijo'mo Anak nu Domba anu ki kinolotmo.

ANU PINOTO'I HI YOHANES 20:15

To mia-mian anu madi' tinulis na sanggonyo i uno nu Kitab nu Mian anu Tumuu', o'alinmo i uno nu apu anu sumo ndalangon.