ROMA 6:23 - KITAB NU TUMPU ALLA LELE MA'IMAI'

²³ Kalana kapatean aijo' tambo nu dosa'; panyo tumuu' kopian ka' toka sidu-sidutu' tiba i Kristus Yesus Tumpunto, aijo'mo tajuu anu i halala'akonmo nu Tumpu.

ROMA 6:23 ပူးပေါင်းရင်းမြစ်များ

KAJADIAN 2:17

Panyo kau' anu mombee'i ilimu' da monsumbu' han anu ma'ima' ka' han anu ma'idek boli. Bua'nyo madi' timbali beleyum mongkaan; de beleyum mongkaan, beleyum silakamo i sinaa aijo'.”

KAJADIAN 3:19

Sansala ka' malisongu na mokalaja da tano' mohasinakon apa-apaa, sampe beleyum po'ule'mo minsusule' i tano', kalana beleyum tano' na kinompon. Beleyum tano' na binau ka' po'ule' minsusule' i tano'.”

AMSAL 11:19

Ihe na anu saja' mombau anu ma'ima', ka'untungannyo saidi mae mohumpak kasanangan; panyo ihe na anu sabole-bole mombau anu ma'idek mongahopimo kasilaka'an.

YESAYA 3:11

Panyo silakamo na mian anu ma'idek na kinyonyoanyo! Aha osakisamo susumo aha nonsakisamo mian sangga'at.

YESAYA 3:9

Kalakuan nu aha bubuulon ponsumbu'anmo palabuatan nu aha ma'i-ma'idek. Nu totonggolakonmo nuaha na mombau dosa' susumo aha mian nu Sodom naipuan mae. Silakamo na aha! Aha mosi silakaimo posi butong nu aha.

YEHEZKIEL 18:20

Mian anu mombau dosa' ia ahi' na silaka. Anak na madi' ahi' tionyo montanggung hukuman anu binaumo nu tuumanyo na kasala'an, ka' suele tuuma madi' ahi montanggung hukuman kalana dosa' iwi-iwi' anu binaumo nu anaknyo. Mian anu manonong na mohumpak ahi' hukuman anu ma'ma' kalana palabuatannyo ma'ima'. Ka' mian anu palabuatannyo ma'idek na monta'up ahi' hukuman kalana palabuatannyo anu ma'i-ma'idek.

YEHEZKIEL 18:4

Nyawa nu mian Aku na tumpunyo, mau nyawa nu anu tu'anyomo kabai nyawa nu anaknyo. Mian anu baladosa' aijo' ahi' na silaka.

MATIUS 25:46

Saba' to mia-mian aijo' o hukummo nu hukuman anu sampe toka sidu-sidutu', panyo komiu to mia-mian anu mombau kahanda' nu Tumpu, mongoa'i kantumuu'an talakana' ka' sampe toka sidu-sidutu'.”

YOHANES 10:28

Aku mombee'i aha kantumuu'an kopian ka' toka sidu-sidutu', ka' sidu-sidutu' aha madi' silaka. Madi' ko samian pe'e mongagoi aha i limang-Ku.

YOHANES 17:2

Kita Tuuma nombee'mo kuasa mompalentah iwi-iwi' na mian hi Anak, da Ia mombee'i kantumuu'an kopian ka' toka sidu-sidutu' hi iwi-iwi' na mian anu binee'mo nu Tuuma hi Ia.

YOHANES 3:36

Mian anu palesaya hi Anak aijo' tionyo mohumpak kantumuu'an talakana' ka' toka sidu-sidutu'. Panyo mian anu madi' montapali Anak aijo', madi' mohumpak kantumuu'an. Ia ohukum nu Tumpu sidu-sidutu'.

YOHANES 4:14

“panyo mian anu monginum uee anu Ku bee', madi'mo daagi' megot sidu-sidutu'. Kalana uee anu Ku bee' aijo' timbalimo mata nu uee i uno nu butongnyo anu mo'ili mosabat ka' mombee'i ia kantumuu'an talakana' sampe toka sidu-sidutu'.”

YOHANES 4:36

Mian anu mompadak montampu'unimo montalima tamboonyo, ka' molimu' hasinnyo da bau kantumuu'an anu talakana' sampe toka sidu-sidutu'. Sahingga mian anu montugan tiba mian anu mompadak timbali mongoa'i kasanangan hingga-hinggat.

YOHANES 5:24

Totu-totu'u hondo na anu Kutaloakon aiya; mian anu mongintomakon potataeng-Ku, ka' palesaya hi Ia anu nonsai mae Aku, ko kantumuu'an anu talakana' ka' toka sidu-sidutu'. Ia madi' o hukum, ia nolapasmo lengkat i kapatean ka' nohumpakmo kantumuu'an.

YOHANES 6:27

Boli mokalaja de ola da mohumpak anu okaan anu timbali mingkot ka' mawa'i. Bakalaja da pohumpakan anu okaan, anu madi' toho' mawa'i ka' anu mombee'i kantumuu'an anu talakana' ka' sampe toka sidu-sidutu'. Anu okaan aijo' nubee'je nu Anak Mian hi beleyum, kalana Ia i hangkatmo nu Tumpu, Tuuman-To.”

YOHANES 6:40

Memang aiyamo na nuka'ima'i nu Tuumang-Ku: Da iwi-iwi' na anu montoa Anak ka' palesaya hi Ia ko kantumuu'an anu talakana' toka sidu-sidutu', ka' po'ule' Kupotumuu' i Sinaa Kakiamatan.”

YOHANES 6:68

“Kita Tumpu,” na koonyo i Simon Petrus hi Ia, “Hi ihe na kalambanan mami? Potatae nu Kita Tumpu mombee'i kantumuu'an anu talakana' ka' toka sidu-sidutu'.

ROMA 1:32

Nusumbu' nu aha, tukoonyo atulan nu Tumpu, mian anu mombau aijo' iwi-iwi' tionyo ohukum mate. Mau mule' sumo aijo' nubau ahi' nu aha na hahan aijo'; tiba mule' monsetujui mian sangga'at mombau.

ROMA 2:7

Tumpu mombee'i kantumuu'an kopian ka' sidu-sidutu' hi aha anu sabaan mombau anu ma'ima' da pohumpakan anu ko angga'nyo, anu opopodaka' ka' toka sidu-sidutu'.

ROMA 5:12

Dosa' ninsoop i uno nu dunia sinabapan nu samian, ka' lengkat i dosa' aijo' sahingga ko anumo sinilaka. Ahennyo, kapatean nolele isongko-songko na mian, kalana iwi-iwi' na mian binaladosa'mo.

ROMA 5:17

Kalana samian nolanggaimo anu otewa', kapatean nolelemo iyaya mae kalana sinaduakon nu samian aijo'. Lebe daka' mule' apaa na anu binau nu samian aijo'mo i Yesus Kristus. Kalana Ia, Tumpu mombee' molabi-labih na balakat-Nyo hi mian anu sumo aijo' na konjoo'nyo, ka' ola i halala'akon da aha timbali mompo'ule' ma'ima' tiba Tumpu; aha nongkuasai dunia aiya kalana i Yesus Kristus.

ROMA 5:21

Jadi, kita tionyo mate kalana kita nombaumo dosa'. Panyo Tumpu mongkalibosi kita mombee'i jalan hi kita da mompaha ima' tiba Ia. Ka kalana pompahasumbu'anto tiba Tumpu po'ule'mo na'ima', Ia mule' mombee'i kantumuu'an kopian ka' sampe toka sidu-sidutu' hi kita kalana i Yesus Kristus, Tumpunto.

ROMA 6:16

Osumbu'mo miu, de komiu mombee' butong miu pa' hi he da mombau pongka'oho'nyo, saba' komiu botuanmo nu mian anu ohongo-hongo miu aijo' – ugaat botuan nu dosa' anu momboa komiu i kapatean, kabai posaihon anu mohongo-hongo Tumpu, ka' tiba jalan aitu mompo'ule' ma'ima' tiba Tumpu.

ROMA 6:21

Tempo'nyo aitu ka'untungan apaa na anu tinalima miu i hahan uuka aiya oka'ambangakon miu na o bau? Bauon haha aijo' ola momboa i kapatean!

ROMA 8:13

Kalana de komiu tumuu' mombatuki sipat nu mian, saba' komiu ola mate; panyo de kuasa nu Roh nu Tumpu, komiu saja' mompatei apa-apaa na anu obau, anu moko baladosa', atina'je yo komiu tumuu'.

ROMA 8:38

Kalana kupalesaya hondo-hondo songko-songko na dunia, mau mule' kapatean kabai kantumuu'an, mau mule' malaikat kabai anu ko kuasa, mau mule' anu mompai patei uuka aiya, kabai anu mompai patei anu aiya mae i ahop, kabai anu toto hoso-hoson sangga'at;

ROMA 8:39

mau mule' anu kiita' mae i langit, kabai hahan anu aiya i dunia, kabai anu sangga'at, iwi-iwi' madi' moko tewa' Tumpu Allah mongkalibosi kita, sumo anu pinotoa-Nyomo hi Kristus Yesus, Tumpunto.

ROMA 8:6

De pikilanum kinuasanmo nu sipat nu mian, saba' ahennyo kapatean. Panyo de pikilanum kinuasanmo nu Roh nu Tumpu, saba' ahennyo aijo'mo na kantumuu'an ka' kadamean tiba Tumpu Allah.

GALATIA 3:10

To mia-mian anu talalomo nontaha'imani atulan nu agama, iwi-iwi' tumuu' i uno nu kutuk. Kalana i uno nu Kitab nu Tumpu tinulismo, “Mian anu madi' tulu-tulutan mompojalan iwi-iwi' anu tinulismo i uno nu Kitab Atulan nu Agama, nu kutuki nu Tumpu!”

TITUS 1:2

Pangajalan aijo' nimpu'u i anu otaha'imani, aijo'mo kita montalimaje kantumuu'an kopian ka' sampe toka sidu-sidutu'. Tumpu Allah nonjanji'mo kantumuu'an aijo' ma'isa pe'e dunia aiya tinimbali – ka' Tumpu madi' toho' baleko'.

YAKOBUS 1:15

Ka' mule', de tanga'annyo anu ma'idek aijo' obatuki, atina'je ka' toka na dosa'; ka' de dosa' tahahumo ka'ahenannyo aijo'mo na kapatean.

1 YOHANES 2:25

Ka' aiyamo na anu jinanji'mo i Kristus hi kita: Tumuu' kopian ka' sampe toka sidu-sidutu'.

ANU PINOTO'I HI YOHANES 21:8

Panyo mian anu madi' sabaan, geguan, mian anu palaganta pampatei, mian masala', mian anu ko ajimat, monsombah pilogot, ka' iwi-iwi' na anu baleko' o'alin i uno nu apu anu sumo ndalangon ka' belelang anu lewa' moak, aijo'mo na kapatean anu kopinduannyo.”