ROMA 5:2 - KITAB NU TUMPU ALLA LELE MA'IMAI'

² Kalana kita palesaya hi Yesus, sahingga Ia nompotimbali kita moko ala mongoa'i liibos nu Tumpu, ka' kalana liibos aijo' kita tumuu' uuka aiya. Kalana aijo' kita lame' na kinyonyoa, kalana kita ko anu otaha'imani aijo'mo kita mongoa'ije tumuu' ma'ima' anu binee' nu Tumpu!

ROMA 5:2 ပူးပေါင်းရင်းမြစ်များ

MAZMUR 17:15

Panyo aku na daagi' ahi' montoa Belento, kalana aku madi' ko kasala'an. Salatan aku mobulamo, kinyonyoangku lame'mo kalana Belento tokamo mae.

MAZMUR 73:24

Belento na lewa'mo nolaya aku nu pokinde' ka' saidi' mae nu talima na aku nu kaholomatan.

AMSAL 14:32

Mian anu ma'idek na kinyonyoanyo mohumpak kabinasa'an kalana palabuatannyo anu ma'idek; panyo mian anu manonong madi' opoposia kalana hodi' na kinyonyoanyo.

HABAKUK 3:18

aku ola ahi' saja' lame' kalana Belento Tumpu na anu momposalamat aku.

MATIUS 25:21

‘Ma'ima'mo’, koonyo nu tuan aijo', ‘beleyum posaihon anu ma'ima' ka' mohongo-hongo. Kalana beleyum timbali o palesaya i hahan anu sangkiding, manjoo'je na kubee' hi beleyum. Pinsoop ka' batuki na aku, basana-sanang tiba aku!’

YOHANES 10:7

Lantas i Yesus po'ule' mule' notatae minsan, “Totu'u na potataeng-Ku aiya: Akumo na sabatan pinsoopan nu domba.

YOHANES 10:9

Akumo na sabatan. Ihe na minsoop montulu Aku salamat; ia mosabat minsoop ka' mohumpak kaanon.

YOHANES 14:6

I Yesus nontaami, “Akumo na jalan da osumbu' na Tumpu Allah, ka' pohumpakan kantumuu'an. Madi' ko samian pe'e moko ala toka hi Tuuma, de madi' montului Aku.

YOHANES 5:24

Totu-totu'u hondo na anu Kutaloakon aiya; mian anu mongintomakon potataeng-Ku, ka' palesaya hi Ia anu nonsai mae Aku, ko kantumuu'an anu talakana' ka' toka sidu-sidutu'. Ia madi' o hukum, ia nolapasmo lengkat i kapatean ka' nohumpakmo kantumuu'an.

SISIKON NU TO RASUL-RASUL 14:27

Salatan tinokamo i Antiokhia, aha momposihukmo to mia-mian lengkat i jama'at aijo', lantas nonsisikakonmo iwi-iwi' anu binaumo nu Tumpu anu pinotokakonmo nu aha. Aha suele nonsisikakonmo mosia na Tumpu nombaumo jalan da to mia-mian misa' Yahudi palesayamo hi Yesus.

ROMA 11:20

Aijo' memang totu'u. Panyo aha o'alin kalana aha madi' palesaya, panyo kita Utus otalimamo kalana kita Utus pinalesayamo. Jadi boli kita timbali kobubuun kalana tinalimamo; ola ahi' kita Utus tionyo mongoa'i mabuhuk.

ROMA 12:12

Tionyo kita Utus saja' montaha'imani Tumpu ka' saja' lame', sabaanakon na kasusa'an, ka' saja' balado'a.

ROMA 14:4

Ihe na kita Utus, sahingga kita Utus mompisala'imo posaihon nu mian sangga'at? Pa' posaihon aijo' motua' kabai mobula, aijo' ponsumbu'an nu tuannyo. Ka' memang posaihon aijo' po'ule'je tuminjo mahoson, kalana Tumpu moko ala mompotimbali ia tuminjo ka' mahoson.

ROMA 15:13

Tumpu aijo'mo na tampat anu otaha'imani miu. O amalakon iaje na mongisi kinyonyoaum nu iwi-iwi' na kalame'an ka' ka'ima'an, kalana komiu palesaya hi Ia, da kalana kuasa nu Roh nu Tumpu komiu mompaka taha'iman hi Tumpu.

ROMA 2:7

Tumpu mombee'i kantumuu'an kopian ka' sidu-sidutu' hi aha anu sabaan mombau anu ma'ima' da pohumpakan anu ko angga'nyo, anu opopodaka' ka' toka sidu-sidutu'.

ROMA 3:23

Iwi-iwi' mian binaladosa'mo hi Tumpu anu kahanda' momposalamat aha.

ROMA 5:5

Anu otaha'imani susumo aiya madi' ahi' mombaleko'i kita, kalana kinyonyoanto ingisianmo nu Tumpu nu liibos-Nyo. Tumpu nombau aijo' montului Roh-Nyo, anu binee'mo hi kita.

ROMA 8:1

Uuka aiya madi'mo ko pohukuman hi aha anu tumuu' mosa'angu' tiba i Kristus Yesus.

ROMA 8:24

Kalana samata-mata montaha'imani apaa na anu jinanji'nyomo, sahingga kita oposalamat. Panyo de anu otaha'imaninto aijo' tinoantomo, saba' aijo' misa'mo anu otaha'imani. Kalana ihe na daagi' montaha'imani apa-apaa i han anu tinoanyomo?

1 KORINTUS 15:1

Ka' uuka aiya, to Utu-utus, gagalanku komiu po'ule' pe'e monginau' Lele Ma'ima' lengkat mae hi Tumpu anu pinolelengkumo u'utu mae hi belemiu. Komiu nontalimamo ka' nompalesayamo i Kristus, kalana Lele Ma'ima' aijo'.

2 KORINTUS 3:18

Uuka aiya ohupto iwi-iwi' madi'mo kinukumbungan nu kukumbung, ka' kita monjingkakonmo lonyingkaban nu i Tumpu Yesus. Ka' kalana aijo' kita saja' obali'i susumo ia lebe pin lebe timbalimo lonyingkaban na kita. Anu mompolonyingkaban aijo' lengkat mae hi Roh, ka' Roh aijo'mo na Tumpu.

2 KORINTUS 4:17

Ka' kasusa'an anu madi' tala-talalomo sumo aiya, anu o'oa'i mami ola sasaingoni', mompodaagi'je hi kami sa'angu' na kabilahian anu madi' ko gampanyo ka' sampe toka sidu-sidutu'. Kabilahian aijo' lebe daka' molingkudui kasusa'an ai-aijo'.

EFESUS 2:18

Kalana montului Kristus salaku jalan kita iwi-iwi' – mau mian nu Yahudi, maumo misa' mian nu Yahudi – kalana Roh nu Tumpu anu sa'a-sa'angu'nyomo aijo' timbalimo moko ohani Te Aha Tuuma.

EFESUS 3:12

Kalana palesaya hi Kristus, ka' kalana nosa'angu'mo tiba Ia, kita pinoloasmo mongohani Tumpu kalana pinalesayamo totu-totu'u.

EFESUS 6:13

Mokonyo aijo' tempo' uuka, pakemo iwi-iwi' na poguhaton mahampate anu sukup nu Tumpu, da sinaa anu ma'idek komiu moko ewa pontumbuhi mae nu sampo bali'. Ka' de lapasmo na komiu mahampate toka i mihinyo, komiu daagi' sabole-bole mahoson ka' baani.

2 TESALONIKA 2:16

O amalakon hi Tumpunto Yesus Kristus ka' Tumpu Tuumanto mongindeko' ka' mompohosonakon kinyonyoa miu da komiu timbali mongkalaja ka' mompolele apaa na anu ma'ima'. Kalana Tumpu mongkalibosi kita, ka' kalana kanonongan nu kinyonyoa-Nyo, Ia nompotimbalimo kita saja' sabaan ka' montaha'imani anu ma'ima'.

IBRANI 3:6

Panyo i Kristus tinulu-tulutanmo salaku Anak anu mompangakui kalajanyo i uno nu Laigan nu Tumpu. Ka' kita aiya atina'mo na Laigan nu Tumpu, de kita tataap daka-daka' na kinyonyoa ka' tataap palesaya totu-totu'u da mohumpak apaa na anu otaha'imaninto.

IBRANI 6:18

Ohua' na han aijo' madi'mo daagi' mongabali': Tumpu madi' toho' baleko' i janji'-Nyo ka' sumpa'-Nyo. Kalana aijo', kita anu ningkongmo hi Tumpu, kinakeha'mo da mahoson na mintoong hi anu otaha'imani anu naningkoyamo i ahopto.

1 PETRUS 3:18

Kalana i Kristus sinilaka ola minsan sampe toka sidu-sidutu' kalana dosa' nu manusia – samian anu madi' ko sala'nyo sinilaka kalana monsawani mian anu ko sala'nyo. I Kristus nombau sumo aijo' da Ia timbali molaya' belemiu toka hi Tumpu. Ia sinilakan ola butongnyo biasa, panyo po'ule' pinotumuu' nimbutongmo nu rohani.

ANU PINOTO'I HI YOHANES 21:11

tiba kahandan ka' katalasanggoan nu Tumpu. Kota aijo' jongkilaban sumo batu mainan, sumo batu anu moho-moho' sumo intan anu talalo jongkilaban.

ANU PINOTO'I HI YOHANES 21:23

Kota aijo' madi' palalu nujingkai nu batu nu sinaa kabai bitu'on, kalana katalasanggoan nu Tumpu na monjingkai, ka' Anak nu Domba aijo', atina'mo na sulu'nyo.

ANU PINOTO'I HI YOHANES 21:3

Lantas aku nohongomo potatae lengkat mae i kasuhangan aijo' notatae mae daka-daka', “Tempo' uuka tampat kajojoongan nu Tumpu tibamo mian! Ia tumuu'mo tiba aha, ka' aha timbalimo mian anu palesayamo hi Ia. Tumpu jojoongmo tiba aha, ka' timbalimo Tumpu nu aha.

ANU PINOTO'I HI YOHANES 3:21

Aha anu inguntungmo i uno nu kasabalan, Ku pobee'je sumuhang i kasuhangan-Ku tiba Aku, pokakana sumo Aku suele inguntungmo i uno nu kasabalan ka' uuka aiya sinumuhangmo tiba Tuumang-Ku i kasuhangannyo.