ROMA 2:29 - KITAB NU TUMPU ALLA LELE MA'IMAI'

²⁹ Panyo sabenannyo ahi', samian anu totu-totu'u Yahudi aijo'mo mian anu mingkinyonyoa Yahudi, ka' anu totu-totu'u sinunat, aijo'mo sunat i uno nu kinyonyoa anu binau nu Roh nu Tumpu, misa' anu tinulis i uno nu kitab. Mian anu sumo aijo' mohumpak pompuji' lengkat hi Tumpu, misa' lengkat hi mian.

ROMA 2:29 ပူးပေါင်းရင်းမြစ်များ

1 TAWARIKH 29:17

Ku sumbu' toto samian o uji' nu Belento na kinyonyoanyo ka' oka'ima'i nu Belento na kinyonyoa nu mian anu lomas. Tiba kinyonyoa sanang ka' sahondo-hondonyo ku sombahkonmo na iwi-iwi' aiya hi belento. Tinoangkumo mosia na mian anu pinalesayamo hi belento anu sinilimu'mo i aiya nomboa mae anu nu sombahkon nu aha hi belento, kinyonyoa nu aha sanang hondo.

MAZMUR 45:13

Mian anu jojoong i Tirus momboamo mae palasombahan hi beleyum; mian anu kaya bala usahamo mae mongala kinyonyoa nu beleyum.

YEREMIA 4:14

O Yerusalem alinmo na palabuatan anu ma'idek anu lengkat ikinyonyoa nu beleyum da beleyum oposalamatmo. Sampe toka hipian na kopinnyo na pikilan toto ide-idek haha aijo' daagi' opo una' nu beleyum i uno nu kinyonyoa nu beleyum?

YEREMIA 4:4

Toongi na palajanjian nu beleyum tiba Aku, Tumpu nu beleyum ka' posadiamo na butong nu beleyum da bau kapalaluan-Ku o belemiu anu jojoong i Yehuda tiba Yerusalem. De madi' ahi', saba' tambuha'-Ku saidi' mae tahahumo ka' montoyo'imo susumo apu anu madi'mo opoko ala opatei maumo ahi' pa' hihe. Iwi-iwi' aijo' mongkonamo butong nu beleyum kalana palabuatan nu beleyum ma'i-ma'idek aijo!”

YEREMIA 9:25

Tumpu notatae, “Tokaje mae na tempo'nyo Kuhukumo na aha mian nu Mesir, Yehuda, Edom, Amon, Moab, tiba mian anu jojoong ipadang tampat anu mateges anu monggunting ubaknyo opokodo'. Aha iwi-iwi' sinunat pokakana susumo mian Israel, panyo maunyomo ahi' aha mau bansa Israel kalakuan nu aha sumomo ahi' to mia-mian anu madi' sinunat, kalana aha madi' ahi' montuluti palajanjian anu ilambangkan nu sunat aijo'.”

LUKAS 11:39

Kalana aijo' Tumpu notatae hi ia, “Memang komiu to mia-mian nu Farisi saja' mombaso'i mangko' ka' lean i sasu sambiha'nyo, panyo i uno nu posi butongum saja' hondo panggaga ka' manjoo' na ka'idekan.

LUKAS 17:21

sahingga mian timbali montaloakon, ‘Imbo' toa, aiyamo na ia!’ kabai, ‘Aijo' mae na ia!’ Kalana Tumpu montampu'unimo mompalentah atina' hi komiu.”

YOHANES 12:43

Aha lebee mongka'ima'i nu puji' nu mian molingkudui pongangga'i nu Tumpu.

YOHANES 4:23

Panyo tokaje na tempo'nyo, ka' memang tinokamo kalana Roh-je nu Tumpu na mongkuasai sahingga to mia-mian monsombah Tuuma salaku Tumpu anu totu-totu'u susumo anu nunu kahanda'i nu Tuuma.

YOHANES 5:44

Mosia na komiu timbali palesaya, de komiu molio da o puji' nu bubu komiu ka' madi' bala usaha molio pompuji' anu lengkat mae hi Tumpu, anu ola-olamo Ia na Tumpu?

ROMA 14:17

Kalana de Tumpu mompalentahmo kantumuu'an nu mian toto samian, apaa na anu timbali nukaan kabai o inum, madi'mo penting. Anu penting aijo'mo, mian anu mohongo-hongo pongka'oho' nu Tumpu Allah, mongoa'i sabaan na kinyonyoa, ka' montalima kalame'an anu binee'mo nu Roh nu Tumpu.

ROMA 2:27

Ka' to mia-main anu madi' sinunat aijo' mompisala'imo kita Utus mian nu Yahudi, kalana kita Utus daagi' ko atulan nu agama Yahudi, ka kita Utus sinunatmo, panyo kita Utus molanggai atulan aijo'. Aha madi' sinunat, panyo ahamo na anu montanga'imo atulan nu agama Yahudi.

ROMA 3:1

Desumo aijo' apaa na untungnyo timbali mian nu Yahudi? Ka' apaa na kaliangannyo mombatuki atulan nu sunat?

ROMA 7:6

Panyo uuka aiya kita madi'mo sego-segot i atulan nu agama Yahudi. Kita natemo i atulan anu u'utu mae mongkusai kita. Kita madi'mo monsombah susumo jalan u'utu mae mombatuki atulan anu tuli-tulis. Uuka aiya kita monsombahmo mombatuki jalan bu'ou anu pinotiju' nu Roh nu Tumpu hi kita.

1 KORINTUS 4:5

Mokonyo aijo', kalana misa' pe'e tempo'nyo, boli komiu lia-lia' montantukan batu-batu mian kosala'nyo kabai madi'. Tanda'i tokaje na Tumpu. Iaje na mompoto'i iwi-iwi' lahasia anu sulu-suluk i uno nu pintung. Iaje na mompotalang tanga'an anu sulu-suluk i uno nu kinyonyoa nu mian. Tempo'je aitu ka' batu-batu mian mohumpak pompuji' lengkat hi Tumpu anu patut nu talima.

1 KORINTUS 7:19

Kalana mohongo-hongo atulan nu sunat kabai madi' mohongo-hongo, ohu-ohua' aijo' bubuu' madi' ko alati'nyo apa-apaa. Anu penting mohongo-hongo palentah nu Tumpu.

2 KORINTUS 10:18

Kalana mian anu opuji' aitumo mian anu nu puji' nu Tumpu, misa' mian anu mosi puji' butongnyo.

2 KORINTUS 3:6

Iamo na nompotimbali kami da moko ala timbali posaihon i palajanjian anu bu'ou; palajanjian anu lengkat hi Roh nu Tumpu Allah, misa' anu tuli-tulis i atulan. Kalana anu tuli-tulis aijo' momboa kapatean, panyo Roh nu Tumpu aijo' mombee'i kantumuu'an.

PO'ULE' INGULIT 10:16

Jadi mulai uuka aiya belemiu tionyo ahi' tulu-tulutan hi Tumpu ka' bolimo daagi' panggaga.

PO'ULE' INGULIT 30:6

Belemiu ka' lee' nu belemiu obee'imo kinyonyoa anu mohongo-hongo sahingga belemiu mongkanonongimo Tumpu Allah nu belemiu totu-totu'u i uno nu kinyonyoa nu belemiu ka' sainjojoongmo i lipu' aijo'.

FILIPI 3:3

Padahan kitamo na to mia-mian anu nontalimamo sunat anu totu-totu'u misa' aha. Kita monsombah Tumpu posi Roh nu Tumpu na nompotuka', ka' kita montalima kase kalana kita tumuu' nosa'ngu'mo tiba i Kristus Yesus. Kita madi' taha'iman i to ada-adat anu ola mombatuki kabiasa'an nu dunia.

1 TESALONIKA 2:4

Madi'! Kami madi' motatae da momposanang kinyonyoa nu mian, panyo momposanang kinyonyoa nu Tumpu, anu monguji' kinyonyoa mami. Kalana kami nutaha'imani nu Tumpu timbali mompolele Lele Ma'ima' aijo'.

1 PETRUS 3:4

Panyo belemiu handa tionyo ahi' molengkat mae i uno nu kinyonyoa, kalakuan anu tobos ka' madi' solaa' hengge'; aijo' ahi' na handa anu sampe toka sidu-sidutu' ka' anu talalo ko angga'nyo i pontoan nu Tumpu.

1 SAMUEL 16:7

Panyo pinoto'i nu Tumpu hi Samuel, “Boli beleyum ola montoa kalana ia olitau ka' butongnyo mule' matangkas, misa' ia na anu Ku kahanda'i. Aku madi' mongangga'i susumo pongangga'i nu manusia. Manusia montoa ola tambongnyo nu butong, panyo aku montoa kinyonyoa.”