ROMA 15:14 - KITAB NU TUMPU ALLA LELE MA'IMAI'

¹⁴ To Utu-utus! Kusumbu' hondo daagi' manjoo' na anu ma'ima' hi komiu. Komiu suele monsumbu' iwi-iwi' aijo', ka' mule' timbali mompaha pogu-pogulu' samian tiba samian.

ROMA 15:14 ပူးပေါင်းရင်းမြစ်များ

1 KORINTUS 1:5

Kalana komiu i Kristusmo na tumpunyo, sahingga kantumuu'an miu kaya i uno nu iwi-iwi' na han. Kapandean miu mongkona iwi-iwi' na han talalo matangkas, ka' komiu pande na mompogulu' kapandean aijo'.

1 KORINTUS 12:8

Toka hi samian, Roh aijo' mombee'i balakat da basisik o angga'i. Toka hi sangga'at Roh suele ai-aijo'mo na mombee'i balakat da monsisikakon Tumpu.

1 KORINTUS 13:2

Mau mule' aku pande na mompotokakon lele lengkat mae hi Tumpu, ka' monsumbu' iwi-iwi' ilimu', ka' monsumbu' iwi-iwi na apaa, ka' mule' talalo palesaya hi Tumpu sahingga timbali moko ala molalin bungkutnyo, panyo aku madi' mongkalibosi to mia-mian sangga'at, saba' aku madi' ko alati'nyo apa-apaa!

1 KORINTUS 8:1

Uuka aiya mongkona anu okaan anu obee' salaku osombahkon hi pilogot. Memang totu'u sumo anu tinaloakonmo nu mian, “Kita iwi-iwi' pinandemo.” Panyo kapandean monsaduakon mian da kobubuun, panyo kalibosan mombau da mian timbali ma'ima'.

1 KORINTUS 8:10

Pongka'oho'ku sumo uuka: Bisuannyo kita Utus, anu mahosonmo na palesaya hau-haunyo suha-suhang mongkaan i pontalakanian pilogot. Lantas daagi' ko mian montoa kita Utus suha-suhang mongkaan i kiijo'. De palesaya nu mian aijo' madi' mahoson, temisa' aijo' monsaduakonmo mian aijo' baanimo mongkaan kaanon anu binee'mo i pilogot aijo'?

1 KORINTUS 8:7

Mau mule' sumo aitu, madi' iwi-iwi' na mian monsumbu' anu sumo aijo'. Daagi' ko anu naipuan mae monsombah pilogot. Jadi, kalana aijo' sampe tempo' uuka aha daagi' monginau' te kaanon anu sinombahkonmo hi pilogot, aijo' kaanonmo nu pilogot. Sahingga de nukaan nu aha na kaanon aijo', aha mongoa'i baladosamo; kalana palesaya nu aha ma'isa mahoson.

2 KORINTUS 8:7

Komiu moko ala mombau iwi-iwi' na han: Komiu moko ala momponyata' kapalesaya'an, i uno nu han montaloakon pongka'oho', i uno nu han kapandean, i uno nu iwi-iwi' na ngahan nu usaha, ka' i uno nu kalibosanum hi kami. Mokonyo aijo' singkona ahi' komiu moko ala i uno nu usaha anu ma'ima' sumo aiya.

EFESUS 5:9

Kalana lengkat i jingka aijo' na kalubatan nu ngangahan na bauon anu ma'ima', adin ka' hodi' i pontoan nu Tumpu.

FILIPI 1:11

Molabi-labije na gau' anu totu-totu'u ma'ima' i kantumuu'an miu, anu ola hi Yesus Kristus na timbali pohumpakan; sahingga Tumpu opopodaka' ka' saja' o puji'.

FILIPI 1:7

Memang nukonamo de aku ko kinyonyoa sumo aijo' hi komiu, kalana komiu Utus iwi-iwi' saja' i uno nu kinyonyoangku. Ka' mule' komiu singkona montalima hingga-hinggat ka' aku balakat anu binee'mo nu Tumpu hi belengku; mau uuka aiya aku hau-haunyo i uno nu talungku', mau pe'e aku i sambiha'nyomo mompototu'u ka' montinjohakon Lele Ma'ima' aijo'.

KOLOSE 3:16

To panga-pangajalan i Kristus anu nobuke'mo nu balakat tionyo ahi' oposoop i uno nu kinyonyoa miu. Komiu sabole-bole ahi' mompaha pogu-pogulu' ka' mompaha bebee'i pokinde' da pande. O nyanyi na mazmur ka' anu bau pompuji-puji' tiba to elo-elok nu rohani; o nyanyiakon hi Tumpu bau pontalima kase i uno nu kinyonyoa miu.

1 TESALONIKA 5:11

Kalana aijo', tionyo ahi' komiu tataap mompaha kakehaakon ka' mompaha poho-pohoson sumo anu binaumo miu uuka aiya.

1 TESALONIKA 5:14

Opoita mami mule' hi to Utu-utus, pokinde'i ma'i-ma'ima' na mian anu madi' mongka'oho' mokalaja; posanang na kinyonyoa nu mian anu mabuhuk; tulungi na mian anu palalu otulungi, ka' sabaan kona hi mian iwi-iwi'.

2 TESALONIKA 1:11

Mokonyo aijo' kami saja' mondo'akon komiu. Kami balado'a da Tumpu mompotimbali komiu moko ala tumuu' mombatuki pongka'oho'-Nyo, kalana makisut aijo' sahingga Ia nolagamo komiu. O amalakon da Tumpu mongkuasai komiu mombatuki pongka'oho'nyo da mombau anu ma'ima' ka' mompokopiani iwi-iwi' na kalajanyo anu binaumo miu kalana pinalesayamo hi Kristus.

2 TIMOTIUS 1:5

Aku tonginau' i kapalesaya'anum anu totu-totu'u hi Kristus, pokakana sumo kapalesaya'an nu kele'um i Lois ka' tinaum i Eunike. Ka' kupalesaya hondo-hondo beleyum mule' palesaya sumo aijo'.

FILEMON 1:21

Aku nontulis sulat aiya kalana ku palesaya hondo na kita Utus tantu mombauje apaa na anu pinoitangkumo. Ka' kusumbu' tantu kita Utus mombauje anu lebe molingkudui aijo'.

IBRANI 5:12

Sabenannyo tempo'nyomo na komiu timbali gulu', panyo nanasamo taalu' komiu daagi' ahi' palalu balagulu' pe'e hi mian sangga'at mongkona alati'nyo nu pangajalan nu Tumpu. Komiu ma'isa timbali mongala kaanon anu mokuut; komiu daagi' tionyo ola monginum susu.

IBRANI 6:9

Panyo to utu-utus anu okanonongi, mau mule' kami motatae sumo aijo', panyo opalesaya hondo mami na komiu. Opalesaya mami totu-totu'u kalana komiu nontalimamo hahan anu lebe ma'ima', aijo'mo to bala-balakat anu tinimbalimo kasalamatan nu belemiu.

2 PETRUS 1:12

Kalana aijo', aku saja' mompotuka' belemiu mongkona han anu sinanggomo aijo', mau mule' belemiu nonsumbu'mo ka' pinalesayamo hondo i pangajalan lengkat mae hi Tumpu anu tinalimamo miu aijo'.

1 YOHANES 2:21

Jadi aku nontulis aiya toka hi belemiu misa' kalana komiu madi' monsumbu' pangajalan anu totu'u, panyo kalana komiu nonsumbu'mo, ka' komiu mule' nonsumbu'mo saba' madi' ko leko'nyo i uno nu pangajalan anu totu'u aijo'.