ROMA 14:13 - KITAB NU TUMPU ALLA LELE MA'IMAI'

¹³ Mokonyo aitu boli kita mompaha pisa-pisala'i. Ola ahi' opai-pai lio da komiu madi' mombau apa-apaa anu monsaduakon samian na utus, anu sa'a-sa'angu' na kapalesaya'an tagoda ka' baladosa'.

ROMA 14:13 ပူးပေါင်းရင်းမြစ်များ

2 KORINTUS 6:3

Kami madi' mongka'oho' kalaja mami opisala'i. Kalana aijo' kami bala usaha madi' mombee'i pikilan hi samian pe'e da mombau han aijo'.

YAKOBUS 4:11

To Utu-utus, boli mompaha alu-alu kabai mompaha pisa-pisala'i. Mian anu mongalu kabai mompisala'i utusnyo anu bubu' Kristen, ia mongalu kabai mompisala'i atulan nu Tumpu. Ka' de komiu mompisala'i atulan nu Tumpu, aijo' alati'nyo komiu madi' mombatuki atulan haha aijo', panyo mongatunmo atulannyo.

LUKAS 12:57

“Kadaka' komiu madi' mosi tantukan apaa na anu totu'u?

MATIUS 7:1

“Boli mompisala'i mian sangga'at, da komiu suele boli nu pisala'i nu Tumpu.

YESAYA 57:14

Daagi' ko anu notatae, “Baumo ka' posadiamo na jalan da bau kajalanan nu mian anu palesayamo hi beleng-Ku bolimo daagi' ko anu madi' mombau.”

ROMA 16:17

To Utu-utus! Kupoita sabole-boleh: Obala'ingati na to mia-mian anu monsaduakon poga'a-ga'atan ka' mompotabuntala' kapalesaya'an hi Tumpu. Anu susumo aijo' mompaha kea' tiba anu pinogulu'mo hi komiu. Opolilit na mian sumo aijo'.

ROMA 14:10

Jadi, to Utu-utus! Bau apaa na mompisala'i utusum anu sa'a-sa'angu' na kapalesaya'an? Ka' bau apaa na kita Utus monsangka ia madi' ko angga'nyo? Kita iwi-iwi' mo'ahopje hi Tumpu Allah da o putusi.

LUKAS 17:2

Lebe ma'ima' de batu ponggiling oposegot i gogohongnyo, lantas ia o alin i uno nu ambai, ka' de mule' ia monsaduakon sala'samian na to mia-mian ise' aiya mombau dosa'.

ANU PINOTO'I HI YOHANES 2:14

Mau mule' sumo aitu daagi' ko to pia-piangkuka na han anu madi' Ku ka'ima'i hi belemiu: Daagi' ko sambahagian na mian atina' hi belemiu anu nontulutimo apaa na anu ingajanakonmo i Bileam. I Bileam nompogulu'mo i Balak mosia na monabu'akon mian nu Israel i uno nu dosa'; aijo'mo pagala monsale'i aha mongkaan kaanon anu sinombahkonmo hi pilogot ka' mombau hahan masala'.

YAKOBUS 2:4

Desumo aijo' na mombau, komiu madi'mo mompokakanakon samian ka' samian, ka' montoa mian ko pikilan anu madi' ma'ima'.

1 KORINTUS 11:13

Soba to Utu-utus posi popikilakon na han aiya: Pa' ma'ima' samian na boune balado'a hi Tumpu i ahop nu mian da'isan madi' mongkukumbungi ubak?

1 KORINTUS 10:32

Tumuu'mo sumo aitu na baunyo da kita Utus madi' monsaduakon mian sangga'at mombau dosa'; pa' aha mian nu Yahudi kabai misa' mian nu Yahudi, kabai jama'at nu Tumpu.

ROMA 14:4

Ihe na kita Utus, sahingga kita Utus mompisala'imo posaihon nu mian sangga'at? Pa' posaihon aijo' motua' kabai mobula, aijo' ponsumbu'an nu tuannyo. Ka' memang posaihon aijo' po'ule'je tuminjo mahoson, kalana Tumpu moko ala mompotimbali ia tuminjo ka' mahoson.

MATIUS 18:7

Paya' na ko ideknyo na dunia aiya kalana hahan anu monsaduakon mian baladosa'. Totu'u hahan anu sumo aitu saja' daagi', panyo silaka na mian anu monsaduakon!

MATIUS 16:23

I Yesus nonsiloi lantas notatae hi Petrus, “Lako' pala'i na tampat aiya, Ponggoda! Beleyum montewa' Aku. Pikilanum aijo' pikilan nu mian; misa' pikilan nu Tumpu!”

1 YOHANES 2:10

Mian anu mongkalibosi utusnyo, tumuu'mo i uno nu jingka, sahingga madi'mo ko sa'angu' pe'e hi ia na anu monsaduakon mian sangga'at manabu' i uno nu dosa'.

1 TIMOTIUS 5:14

Aijo' na sababnyo ku kahanda'i da to balu-balu anu ma'isa pe'e bengkele' po'ule' pe'e mo'osoa, mohumpak anak ka' mongulus auwan da sampo bali'to madi' mohumpak kasampatan mongide-idei sanggonto.

FILIPI 1:10

Tiba jalan anu sumo aijo' komiu monsumbu'mo mompile'i apaa na anu talalo ma'ima', ka' kantumuu'an miu belesi'mo i kasala'an kabai maumo pa'apaa na posala' opokona hi komiu, i sinaanyo de i Kristus mompo'ule'mo toka.

2 KORINTUS 5:14

Kalibosan i Kristus na nongkuasaimo kami; ka' osumbu' mami taalu' de samian sinilakamo bau pontokong mian iwi-iwi', makia' aijo' mongalati'i saba' iwi-iwi' na mian sinilakamo.

ROMA 11:9

I Daud notatae suele, “Bakas da bau-bauon nu aha timbali bau posi pohakop aha, ka' timbali bolo', tampat nu aha manabu' ka' mohopu'!

2 SAMUEL 12:14

Panyo kalana belento Tomundo' nongambangimo Tumpu kalana nombaumo anu susumo aijo', anak mo'ane nu belento Tomundo' anu salaje' ihampe aijo' na tionyo ahi' silaka.”

YEHEZKIEL 14:3

“O, manusia anu madi' tumuu' batu, mian haha aiya nompopalesayamo butong nu aha hi pilogot sahingga aha nanabu'mo i dosa'. Te toho' mule' Aku pompokilawan mae nu aha?

IMAMAT 19:14

Boli montotobi'akon mian anu mabongon ka' boli mompotimpas batu, da bau tosumpunan nu mian mapisok hau-haunyo lumajang. Tionyo ahi' belemiu mongadati ka' okabuhuk na Aku, kalana Akumo na Tumpu Allah nu belemiu.

ROMA 14:3

Mian anu mongkaan mau mule' apaa, boli mongalu mian anu mongkaan ola kaanon anu tinantukanmo; ka' mian anu mongkaan ola anu tinantukanmo, boli mule' mompisala'i mian anu mongkaan mau mule' apaa, kalana Tumpu nontalimamo ia.