ROMA 13:8 - KITAB NU TUMPU ALLA LELE MA'IMAI'

⁸ Boli basamaya' apa-apaa mau mule' pa' hi he. Boli mompiakon basamaya' nu liibos hi samian ka' samian. Kalana mian anu mongkalibosi sangko mian nontulutimo atulan iwi-iwi' i Musa.

ROMA 13:8 ပူးပေါင်းရင်းမြစ်များ

MATIUS 7:12

O bau na mian sangga'at sumo apaa na anu oka'ima'i nu bau nu aha hi komiu. Aijo'mo na batunyo nu atulan i Musa, ka' pangajalan nu to nabi-nabi.”

YOHANES 13:34

Palentah bu'ou Kubee' hi komiu: Pompaha kali-kalibosi samian ka' samian. Sumo Aku mongkalibosi komiu, sumo aijo' suele na komiu tionyo mompaha kali-kalibosi.

ROMA 13:10

Mian anu mongkalibosi mian sangga'at, madi' mombau anu ma'idek hi mian aijo'. Jadi mian anu mongkalibosi sangko miannyo, aijo'mo na mian anu nontulutimo iwi-iwi' na jalan nu atulan nu agama.

ROMA 13:7

Jadi o bayan hi pamalentah apaa na anu tionyo o bayan nu kita Utus hi ia. O bayan na hasin de kita Utus tionyo mombayan hasin; ka' bea o bayan de kita Utus tionyo mombayan bea. O'angga'i na aha de anu tionyo o'angga'i, ka' o'adati na aha de anu tionyo o'adati.

GALATIA 5:14

Iwi-iwi' na atulan nu agama pinosa'angu'mo i uno nu palentah anu sa'a-sa'angu'nyomo aiya, “Tionyo beleyum mongkalibosi sangko manusia susumo beleyum mongkalibosi posi butongum.”

KOLOSE 3:14

Ka' anu talalo hondo penting, aijo'mo: Komiu tionyo ahi' mompaha kali-kalibosi, kalana kalibosan aijo' na momposa'angu' to Utu-utus iwi-iwi' sahingga timbali mian anu sahondo-hondonyo.

1 TIMOTIUS 1:5

Kahanda' nu pokinde'ku aijo', atina'mo da mian timbali ko kinyonyoa anu ma'ima' ka' kinyonyoa anu ma'ima' ka' susi', tiba mule' totu-totu'u palesaya hi Tumpu, ka' tiba jalan anu sumo aijo' yo aha timbali mongkalibosi sangalunyo.

YAKOBUS 2:8

Komiu nombaumo anu totu'u, de komiu nontulutimo atulan nu Kalaja'an anu tuli-tulis i uno nu ayat nu Kitab nu Tumpu aiya, “Okalibosi na sangko mian, sumo komiu mongkalibosi posi butong miu.”

1 YOHANES 3:10

Aiya na pompaha sala'annyo, to ana-anak nu Tumpu tiba to ana-anak nu Ibilis; ihehe na madi' mombau pongka'oho' nu Tumpu, kabai madi' mongkalibosi Utusnyo, ia misa' anak nu Tumpu.