ROMA 12:8 - KITAB NU TUMPU ALLA LELE MA'IMAI'

⁸ Mian anu ko balakat mongkakeha'i mian sangga'at, tionyo totu-totu'u mongkakeha'i mian sangga'at. Mian anu ko balakat mombee'i mian sangga'at apaa na anu daagi' hi ia, tionyo obau na aijo' nu kinyonyoa manonong ka' pantas. Mian anu ko balakat mongatun, tionyo totu-totu'u mongatun. Mian anu ko balakat mompotoa kalibosan hi mian sangga'at, tionyo obau nu kinyonyoa sanang.

ROMA 12:8 ပူးပေါင်းရင်းမြစ်များ

KAJADIAN 18:19

Ia pinile'an-Kumo da mompalentah to ana-anaknyo ka' lee'nyo da montuluti Aku ka' mombau apaa na anu ma'ima' ka' adin. De han aijo' nubau nu aha, iwi-iwi' anu jinanji'-Kumo hi Abraham tionyo ahi' Ku podaagi'.”

MAZMUR 112:9

Ia mombagi-bagiakon halata'nyo, ka' mombee'i apa-apaa hi mian anu kasiasi; ia saja' mombau anu ma'ima', kalana aijo' ia balakuasa ka' oholomati.

MAZMUR 37:21

Mian anu ma'idek na kinyonyoanyo monsabon hi mian ka' madi'mo daagi' monsule'akon panyo mian anu ma'ima' na kinyonyoanyo na mombee'i ahi' ka' sanang ahi' na kinyonyoanyo.

AMSAL 22:9

Mian anu manonong nu balakati nu Tumpu kalana Ia mombee'i dale' hi mian anu madi' ko apa-apaanyo.

ANU MOMPOLELE POTATAE NU TUMPU 11:6

Daagi subu-subu saumo na bine' nu beleyum; ka' boli mingkain mau mule' malomo, kalana madi' osumbu'to iya na anu sinaunto aijo' na anu tinumuu' ma'ima'. Ugaat ahi' ohu-ohua' tinumuu' ma'i-ma'ima'.

ANU MOMPOLELE POTATAE NU TUMPU 9:10

Baumo na pakalaja'an nu beleyum iwi-iwi' nu kahosonan nu butong nu beleyum. Dumo saidi' mae madi'mo ko pikilan kabai pakalaja'an Madi'mo ko ilimu' kabai kapandean bapikin i dunia nu mian anu sinilakamo. Ka' mokiijo'mo na kalambanan nu beleyum.

YESAYA 32:5

Mian anu ponga' madi'mo daagi' o, anggap mian anu oholomati, ka' mian anu saja' mongakali madi'mo daagi osanggohi mian anu hodi' na kinyonyoanyo.

YESAYA 32:8

Panyo anu manonnong nakalakuannyo na saja' ahi' montanga'i palabuatan manonong ka' mombau apa-apaa saja' ahi' manonong.

YESAYA 64:5

Belento molalabot mian anu hodi' na kinyonyoanyo ka' anu tumuu' montuluti pongka'oho' nu Belento. Belento nontambuha'imo kami panyo kami tataap ahi' baladosa' memang naipuan pe'e mae kami sinala'mo.

MATIUS 25:40

Tomundo aijo' nontaami, ‘Da osumbu': tempo'nyo komiu mombau han aijo', mau pe'e hi sala'samian i to utu-utus-Ku anu talalo kanteles, alati'nyo komiu nombaumo hi beleng-Ku!’

SISIKON NU TO RASUL-RASUL 11:23

Ka' salatan i Barnabas tinokamo kiijo' mae, ka' nontoa mosia na Tumpu nombalakatimo to mia-mian aijo', ia ilame' hondo. Lantas ia nompoita da aha totu-totu'u mohongo-hongo Tumpu nu iwi-iwi' na kinyonyoa.

SISIKON NU TO RASUL-RASUL 13:12

Salatan gubernur aijo' nontoa apaa na anu jinadimo, ia pinalesayamo hi Yesus; kalana ia bangang hondo i pangajalan mongkona Tumpu.

SISIKON NU TO RASUL-RASUL 13:15

Salatan Kitab i Musa ka' Kitab nu to nabi-nabi binasa'akon, to pola-polaya' i laigan pogalejaan aijo' nonsai mian mompokilawa hi Paulus ka' to sanga-sangalunyo, “To utu-utus, de kita utus ko pokinde apa-apaa hi to mia-mian aiya, ku poita da mompotokamo pokinde' aijo'.”

SISIKON NU TO RASUL-RASUL 15:32

I Yudas ka' i Silas anu suele nabi, pinin na notatae tiba to Utu-utus anu palesayamo kiijo' i Antiokhia kalana mongkakeha'i da baani na aha.

SISIKON NU TO RASUL-RASUL 20:2

Ia namba molenga to lipu-lipu kiijo' mae i Makedonia ka' nombee'i manjoo' na pokinde' hi to mia-mian anu palesayamo hi Yesus kiijo' mae salaku bau pongkakeha aha. Lapas aitu ia namba nokiijo' i Yunani.

SISIKON NU TO RASUL-RASUL 20:28

Tionyo obala ingati na butong miu ka' otoa suele na jama'at iwi-iwi' anu binee'mo nu Roh nu Tumpu hi komiu da otoa; kalana komiu ingangkatmo da montoa jama'at aijo'. Tionyo komiu montoa jama'at nu Tumpu aijo' sumo polaya' montoa dombanyo, kalana Tumpu nompotimbalimo jama'at-Nyo, aijo'mo na sababnyo sahingga i Yesus Anaknyo sinilakamo.

SISIKON NU TO RASUL-RASUL 4:36

Sumo aitumo mule' na i Yusuf. Ia suele nompobaluk tano'nyo, lantas doi oli nu anu pinobaluknyo aijo' binoanyo ka' binee'nyo hi to rasul-rasul. I Yusuf aiya samian na lee' mae nu bansa Lewi lengkat mae i Siprus; to rasul-rasul suele monsanggohi ia i Barnabas (alati'nyo Pontundu).

ROMA 12:13

Otulungi ka' posukupakon na kapalaluan nu to mia-mian Kristen sangga'at, ka' olabot na to Utu-utus anu sangko agama, anu ma'isa osumbu'to nu kita Utus tiba kinyonyoa anu sanang i laigan beleyum.

ROMA 13:6

Aijo' suele na pu'unyo ka' kadaka' kita Utus mombayan hasin, kalana pamalentah aijo' nu atun nu Tumpu mompojalan kalajanyo aijo'.

1 KORINTUS 12:28

Sumo aitumo i uno nu jama'at, Tumpu nontantukanmo tampat hi ngangahan nu mian: Momonanyo to rasul-rasul; ko ohua'nyo to nabi-nabi, ko totolu'nyo to gulu-gulu', lantas aha anu mombau hahan anu okabangangi, lapas aijo' aha binee'anmo balakat da nompa'alin mian, kabai montulungi mian sangga'at, kabai anu mongatun, kabai mule' da basisik tiba ngangahan nu basa' anu okabangangi.

1 KORINTUS 14:3

Panyo mule' mian anu mompotokakon lele lengkat mae hi Tumpu Allah, mompotoka hi mian da bau pompohoson aha, da bau pongkakeha aha, ka' da bau pomposanang kinyonyoa nu aha.

2 KORINTUS 1:12

Kami sanang kalana kinyonyoa mami na mompohoson kami, saba' kantumuu'an mami i dunia aiya – anu talalo hondo pompahasumbu'an mami tiba kita Utus – pinojalanmo mami ma'i-ma'ima' ka' sahondo-hondonyo. Kami nombau aijo' misa' kalana kapandean nu mian, panyo kalana kahosonan anu binee' nu Tumpu Allah.

2 KORINTUS 11:3

Panyo aku bata-bata mamanga pikilanum saidi' mae tagoda madi'mo daagi' tulu-tulutan hi Kristus, pokakana sumo i Hawa u'utu mae suele tinagoda kalana kapandean nu ulo.

2 KORINTUS 8:12

De komiu halala' na mombee' saba' nutalima nu Tumpu na anu obee' aijo' iyamo na anu daagi' hi belemiu, misa' pa' apaa na anu madi' hi belemiu.

2 KORINTUS 9:11

Desumo aijo'nyo komiu saja' sukup i uno nu iwi-iwi' na han, sahingga komiu saja' moko ala mobagi kalana manonong na kinyonyoa. Ka' anu lewa' binee' miu, anu binagi-bagiakonmo mami, nompotuka'mo mian da'isan nontalima kaseh hi Tumpu.

2 KORINTUS 9:13

Ka' kanonongan anu pinotoamo miu aijo' manjoo' na mian Kristen i Yudea nompuji'mo Tumpu kalana aha nontoamo komiu mohongo-hongo hondo Lele Ma'ima' mongkona i Kristus anu nu nu tuluti miu aijo'. Aha singkona nompuji'mo Tumpu kalana komiu talalo manonong, nombagi-bagiakonmo hi aha ka' hi iwi-iwi' na mian sangga'at apaa na anu daagi' hi belemiu.

2 KORINTUS 9:7

Batu-batu mian tionyo mombee' iya na kasanangan nu kinyonyoanyo. Boli ia mombee' bata-bata kabai kalana opakisa, kalana Tumpu mongkalibosi mian anu mombee' nu kinyonyoa sanang.

EFESUS 6:5

To Utu-utus anu tinimbalimo posaihon! O hongo-hongo na palentah nu tuan miu anu i dunia aiya. Obau na aijo' nu kinyonyoa mongadati ka' mongadati totu-totu'u susumo anu obau miu hi Kristus.

PO'ULE' INGULIT 15:14

Obee'i na ia apaa na anu binee'mo nu Tumpu Allah nu belemiu hi belemiu, ka' sanang ahi' na kinyonyoa mombee'i mee' ka' domba, gandum ka' anggur.

PO'ULE' INGULIT 16:11

I ahop nu Tumpu Allah nu belemiu i tampat anu pinile'an-Nyomo, belemiu tionyo ahi' bilahi hingga-hinggat tiba to ana-anak nu belemiu, to posa-posaihon nu belemiu ka' aha mian nu Lewi, mian anu lengkat mae i salipu'an, anak anu madi'mo ko tuuma ka' tinanyo, ka' to balu-balu anu jojoong i songko-songko na kota nu belemiu.

KOLOSE 3:22

To Utu-utus anu tinimbalimo posaihon. I uno nu han iwi-iwi', tionyo ahi' tulu-tulutan hi tuan miu anu i dunia aiya. Boli tulu-tulutan hi aha ola de aha hau-haunyo monjagai komiu, kalana komiu mongka'oho' da o puji'. Otuluti na aha nu kinyonyoa anu halala', kalana komiu mongadati Tumpu.

1 TESALONIKA 2:3

Kami monsale'i komiu misa' pa' sinangkalinga; ka' misa' mule' ko kahanda' anu madi' ma'ima' kabai ola mongakali.

1 TESALONIKA 2:8

Kalana pongkalibosi mami, kami sanang na mombee' hi komiu misa' ola Lele Ma'ima' anu lengkat mae hi Tumpu aijo', panyo mule' kantumuu'an mami. Kalana mami talalo hondo mongkalibosi komiu.

1 TIMOTIUS 4:13

Hau-haunyo aijo', sampeje de aku po'ule'mo toka, beleyum tionyo ahi' totu-totu'u saja' mombasa'akon Kitab nu Tumpu hi to mia-mian, ka' mongkakeha'akon tiba mule' mongajan aha.

1 TIMOTIUS 5:17

Polaya' nu jama'at anu mompojalan kalaja ma'i-ma'ima', patut obee'i bau ponginau' kalajanyo pinduan lipat, lebe-lebe aha anu make-makeke na mompogreja ka' mongajan.

1 TIMOTIUS 6:18

Poita hi aha da mompotoa ka'ima'an, da manjoo' na mombau hahan anu ma'ima', manonong, ka' mongka'ima'i mobagi.

IBRANI 10:25

Kita tionyo ahi' saja' sihuk hingga-hinggat, ka' boli moluluk susumo mian sangga'at. Ka' kita tionyo ahi' saja' mompaha poho-pohoson kinyonyoa, kalana osumbu'to madi'mo daagi' pin na Tumpu tokamo.

IBRANI 13:17

Obatuki na palentah nu to pola-polaya' miu, ka' otuluti na aha. Kalana aha saja' mompalahatikan santuu' miu, ka' aha mule' saja' ahi' mompalahatikan mosia na pakalaja'an nu Tumpu anu binaumo nu aha. De komiu montuluti aha, sanang na kinyonyoa nu aha mokalaja; de madi', tantu aha mokalaja susa' na kinyonyoa, ka' aijo' madi' mompo'untung komiu.

IBRANI 13:22

Ku poita da komiu sabaan na mongintomakon pokinde' haha aijo' iwi-iwi' aiya, kalana sulatku aiya madi' talalo mantan.

IBRANI 13:24

Potokakon na salan do'a mami toka hi iwi-iwi' na polaya' miu ka' toka hi mian iwi-iwi' anu palesayamo hi Tumpu. Talima suele na salan do'a lengkat mae hi to utu-utus anu kiijo' mae i Italia.

IBRANI 13:7

Boli okolilimi na to pola-polaya' miu anu mompotoka potuunon nu Tumpu hi belemiu. Opalahatikan mosia na aha tumuu' ka' mosia na aha silaka, ka' obau sonto' na iman nu aha.