ROMA 12:6 - KITAB NU TUMPU ALLA LELE MA'IMAI'

⁶ Kita toto samian daagi' ko balakat mombau apa-apaa madi' pokakana. Balakat haha aijo' binee' nu Tumpu hi kita samata-mata kalana kalibosan-Nyo. Mokonyo aitu tionyo ogunakonto na balakat haha aijo'. Mian anu ko balakat mompolele lele lengkat mae hi Tumpu, tionyo mompolele lele lengkat mae hi Tumpu Allah aijo' iya na anu nupoko ala.

ROMA 12:6 ပူးပေါင်းရင်းမြစ်များ

MATIUS 23:34

Hongo ima-ima': Aku monsaije hi komiu to nabi-nabi, to mia-mian pande, ka' to gulu-gulu'; sambahagian lengkat hi aha o pateije miu, ka' sambahagian anu sangga'at o salibje miu. Daagi' ko anu o sakisaje miu i uno nu laigan pogalejaan, ka' komiu mahantumput lengkat i sa'angu' na kota mokiijo' i kota sangga'at.

MATIUS 25:22

Lantas posaihon anu nontalima ohua' na madala doi mosoni' aijo' tinoka ka' notatae, ‘Kita Tuan, Tuan, nombee'mo ohua' na madala na doi mosoni' hi belengku. Toa kino hasinnyo nohumpak ka'untungan ohua' na madala suele.’

LUKAS 11:49

Aijo' na sababnyo Kapandean nu Tumpu notatae, ‘Ku saije mamba hi aha na to nabi-nabi ka' to posa-posaihon-Ku; sambagian o patei ka' sambagian o sakisa!’

SISIKON NU TO RASUL-RASUL 13:1

I uno nu jama'at Antiokhia, daagi' ko nabi-nabi ka' to gulu-gulu', aitumo i Barnabas ka' i Simeon, anu o sanggohi mule' Si Hitam, i Lukius lengkat mae i Kirene, i Menahem anu pinotuu' hingga-hinggat i Tomundo Herodes, ka' i Saulus.

SISIKON NU TO RASUL-RASUL 15:32

I Yudas ka' i Silas anu suele nabi, pinin na notatae tiba to Utu-utus anu palesayamo kiijo' i Antiokhia kalana mongkakeha'i da baani na aha.

SISIKON NU TO RASUL-RASUL 2:17

Tumpu notatae, ‘Tempo'nyo sinaa aiya mae imihinyo kulambe'akonje na Roh-Ku hi iwi-iwi' na mian. Ana-anakum anu to momo'ane ka' ana-anakum to bouboune mompoto'ije hi komiu hahan anu Ku poto'i hi aha. To mia-mian olitau miu montoaje hahan anu Ku poto'i hi aha. To mia-mian tu'anyo miu mongipije mongkona ipion anu Ku poto'i hi aha.

SISIKON NU TO RASUL-RASUL 21:9

Opat na to ana-anak langkoyangnyo binee'anmo kahosonan nu Tumpu Allah da mompolele lele lengkat mae hi Tumpu.

ROMA 1:11

Kalana aku mongka'oho' hondo singkabot tiba komiu, da aku timbali mombagi balakat hi komiu lengkat mae hi Roh nu Tumpu da mompohoson komiu.

ROMA 12:3

Tumpu nombee'imo balakat hi belengku. Mokonyo aijo' aku mompokinde'i to Utu-utus iwi-iwi': Boli mongoa'i butong lebe matangkas molingkuduimo anu sahondo-hondonyo. Ola ahi' butong miu na otutugi ka' boli kobubuun; toto samian montoa butongnyo iya na anu opoko ala obau anu binee'mo nu Tumpu hi ia, kalana ia pinalesayamo hi Yesus.

1 KORINTUS 12:18

Jadi tinoantomo Tumpu na nompokona bagian haha aijo' i butong. Tumpu na nompokona i posi-posi tampatnyo, iya na anu Nu kahanda'.

1 KORINTUS 13:2

Mau mule' aku pande na mompotokakon lele lengkat mae hi Tumpu, ka' monsumbu' iwi-iwi' ilimu', ka' monsumbu' iwi-iwi na apaa, ka' mule' talalo palesaya hi Tumpu sahingga timbali moko ala molalin bungkutnyo, panyo aku madi' mongkalibosi to mia-mian sangga'at, saba' aku madi' ko alati'nyo apa-apaa!

1 KORINTUS 14:1

Tionyo ahi' komiu bala usaha mongkalibosi to mia-mian sangga'at. Ka' bala usaha suele da mohumpak to bala-balakat anu nubee' nu Roh nu Tumpu, ka' anu talalo hondo, da moko ala monsisikakon tanga'an-tanga'an nu Tumpu hi mian.

1 KORINTUS 14:24

Panyo de kita Utus iwi-iwi' mompotoka lele lengkat mae hi Tumpu, lantas toka mae na samian anu misa' Kristen, kabai samian anu misa' gampanto, tantu hahan anu pinolele nu kita Utus iwi-iwi' mompoto'i to dosa-dosa' nu mian aijo' sahingga ia tolo inau'mo i to dosa-dosa'nyo.

1 KORINTUS 14:29

Ua'aha kabai totolu' na mian anu ko lele lengkat mae hi Tumpu tionyo ahi' mompotoka lele aijo' hau-haunyo sangga'at mompopikilakon apaa na anu tinaloakonnyo aijo'.

1 KORINTUS 3:5

De o'ala i hondonyo, ihe na i Apolos aijo'? Ka' ihe na i Paulus? Kami ola to posa-posaihon nu Tumpu, anu nompotiju'mo hi komiu da palesaya hi Kristus. Kami ola mompojalanakon kalaja anu pinotoong nu Tumpu hi kami toto samian.

1 KORINTUS 7:7

De o'ala hi belengku lebe ku ka'ima'i de iwi-iwi' na mian timbali sumo aku. Panyo toto samian nohumpakmo balakat anu madi' pokakana lengkat hi Tumpu. Samian daagi' ko balakat aiya, sangga'at daagi' ko balakat aijo'.

2 KORINTUS 8:12

De komiu halala' na mombee' saba' nutalima nu Tumpu na anu obee' aijo' iyamo na anu daagi' hi belemiu, misa' pa' apaa na anu madi' hi belemiu.

EFESUS 3:5

Naipuan mae lahasia aijo' madi' toho' pinosumbu' hi mian, panyo uuka Roh nu Tumpu nomponyata'mo hi to rasul-rasul ka' hi to nabi-nabi-Nyo.

EFESUS 4:11

Iamo na anu “mombee'i palasen-palasen hi mian”; sambagian i hangkat-Nyo tinimbali rasul, sangga'at tinimbali nabi; sangga'at mule' tinimbali pompolele Lele Ma'ima' aijo', ka' sangga'at mule' i hangkat-Nyo tinimbali to gulu-gulu' ka' pongatun jama'at.

FILIPI 3:15

Kita iwi-iwi' anu mangalati'mo i hahan nu rohani tionyo ahi' mintumuu' sumo aijo'. Panyo de itina' hi komiu daagi' ko anu ko pikilan sangga'at, saba' Tumpuje na mompotalang suele hi komiu.

1 TESALONIKA 5:20

Boli osangka dengke na lele anu binee'mo nu Roh nu Tumpu Allah.

2 PETRUS 1:20

Anu lebe penting hondo tionyo o inau' nu belemiu na aiya: Potuunon nu Tumpu anu pinotokakon nu to nabi-nabi, madi' timbali o alati'i nu posi pikilan.