ROMA 10:5 - KITAB NU TUMPU ALLA LELE MA'IMAI'

⁵ I Musa nontulis tukoonyo mian anu mompo'ule' ma'ima' tiba Tumpu kalana mintoong i atulan nu agama, mian aijo' tumuu' kalana mohongo-hongo atulan nu agama aijo'.

ROMA 10:5 ပူးပေါင်းရင်းမြစ်များ

NEHEMIA 9:29

Pinokinde'anmo nu Belento na aha da pangajalan nu belento otapali ahi', panyo aha madi'nontalima atulan nu Belento kalana kinyonyoa nu aha takabun. Padahan de atulan nu Belento obau ahi' na bau-baunyo, tantu mohumpak ka'ima'an na kantumuu'an. Aha panggaga hondo ka' mule' ulawon na kinyonyoa nu aha, madi' mongka'oho' mohongo ka' madi' tulu-tulutan.

YESAYA 55:3

Potombihing mae obansang-Ku, tokamo mae hi beleng-Ku, belemiu Ku bee'ije kantumuu'an anu totu'unyo. Kalana kalibosan ka' kanonongan anu jinanji'-Kumo hi Daud, Aku nontoongimo palajanjian anu madi' ko kamingkotanyo tiba belemiu.

YEHEZKIEL 20:11

Ikiijo' mae Ku bee'mo na palentah-ngKu hi aha ka' Ku ajanakonmo na atulan-Ku anu tionyo ahi' nu tuluti nu aha kalana mian anu montuluti aijo' na tataap ahi' tumuu'.

YEHEZKIEL 20:13

Panyo ipadang tampat anu kaho bone'nyo aijo' suele ahi' aha madi' mohongo-hongo mae Aku. Aha nolanggaimo iwi-iwi na palentah-Ku ka' madi'mo daagi' nontalima atulan-Ku, anu nompatikolomo tukoonyo mian anu montuluti aijo' tataap tumuu'. Aha talalomo nohumimi'i sinaa nu Sabat. Kalana aijo' ipadang tampat anu kaho bone'nyo Aku sabenannyo mompotudunmo ahi' tambuha'-Ku hi aha ka' monsilakaimo aha.

YEHEZKIEL 20:21

Panyo aha salapisan mae to oli-olitau tiba to lalangkoyang haha aijo' suele ahi' madi' montapali mae Aku. Aha nolanggaimo ahi atulan-Ku ka' mule' madi'mo nontuluti iwi-iwi na palentah-ngKu anu nompatikolomo tukoonyo mian anu montuluti aijo' tataap tumuu'. Aha nohumimi'imo sinaa nu Sabat. Kalana aijo' Aku sabenannyo mompotudunmo ahi' tambuha'-Ku hi aha ipadang tampat anu kaho bone'nyo aijo' ka' mompateimo aha iwi-iwi'.

IMAMAT 18:5

Tuluti na atulanKu haha aiya ka' palentang-Ku haha aiya anu Ku bee'mo hi belemiu. De obau nu belemiu na aijo', kantumuu'an nu belemiu salamat. Akumo na Tumpu.”

ROMA 7:10

ka' aku mule' i natemo. Sahingga atulan nu agama aijo' anu momoonanyo kinahanda'an da mombee'i kantumuu'an, yo aitu ola ahi' mompotoka kapatean hi belengku.

GALATIA 3:12

Panyo atulan nu agama madi' mimpu'u i kapalesaya'an anu totu-totu'u. I uno nu Kitab nu Tumpu tinulismo tukoonyo mian anu mompojalan atulan nu agama, timbali tumuu' kalana atulan aijo'.

PO'ULE' INGULIT 4:1

Lantas i Musa notataemo hi bansa aijo', “Tuluti iwi-iwi' na atulan anu pinogulu'kumo hi belemiu, da belemiu timbali tumuu' sampe monjojoongimo tano' anu nubee' nu Tumpu, Tumpu Allah nu mompolee' miu, hi belemiu.

FILIPI 3:9

ka' totu-totu'u mosa'angu'mo tiba Ia. Pompahasumbu'an anu ma'ima' tiba Tumpu, madi'mo daagi' ku posi lio nu jalan montuluti atulan nu agama. Uuka aiya aku kino pompahasumbu'anmo anu ma'ima' tiba Tumpu, kalana aku pinalesayamo hi Kristus. Jadi, pompahasumbu'an anu ma'ima' aijo' tinoka lengkat mae hi Tumpu Allah, ka' mimpu'u kalana palesaya hi Yesus Kristus.