PO'ULE' INGULIT 33:2 - KITAB NU TUMPU ALLA LELE MA'IMAI'

² “Tumpu tinoka lengkat mae i Bungkut nu Sinai; Ia binete' mae aita' i Edom susumo batu nu sinaa ka' lengkat mae i Bungkutnyo nu Paran Ia nonjingkaimo mian anu pinalesayamo hi Ia. Ia sinangaluan mae nu malaekat aha sampulu' na madala; ka' apu moak i sasu koanan-Nyo.

PO'ULE' INGULIT 33:2 ပူးပေါင်းရင်းမြစ်များ

1 TOMU-TOMUNDO' 11:18

Aha namba lengkat mae i Midian lantas nambamo i Paran. Ikiijo' mae tiba to pia-piangkuka na mian sangga'at nosangalumo tiba aha lantas hingga-hinggat nambamo i Mesir, kahanda' singkabot tiba i tomundo' Mesir. Tomundo' aijo' nombee'imo i Hadad laigan ka' tano' da bau kajojoongannyo ka' mule' balanja anu bau pontumuu'.

MAZMUR 50:2

Lengkat mae i Sion kota' anu ma'ima' hondo Tumpu tinokamo mae ka' binalasahayamo.

MAZMUR 68:17

Kadaka' atina' mae ibungkutnyo manjo-manjo atina' beleyum minsihipmo na montoa mae Puge'nyo nu Sion anu pinile'anmo nu Tumpu bau kajojoongan-Nyo? Tumpu jojoongmo kiijo' mae sampe toka sidu-sidutu'.

MAZMUR 68:18

Pulu'an nu madala na kareta anu otaha'imano; Tumpu tinokamo hi aha, Ia nompotoamo katalasanggoan-Nyo.

NOSABATMO 23:20

“Ku saije da mamba momona na malaekat-Ku, lantas belemiuje da monjagai belemiu lumajang ka' momboa belemiu i tampat anu pinosadiang-Kumo.

DANIEL 4:13

Hau-haunyo aku mompoinau'akon anu tinoa aijo' tinoangku mule' samian na malaekat nintatau'mo mae lengkat i suluga'; sikapnyo otoa susumo anu balajaga-jaga.

HABAKUK 3:3

Belento Tumpu Anu talalo ahi' susi' lengkat mae i Teman Belento lengkat mae i bungkutnyo nu Paran. Langit sinongkohanmo nu katalasanggoan nu Belento; dunia nobuke'mo nu anu bau pompuji' Belento.

NOMBILANGMO 10:12

Lantas aha mian Israel aijo' nambamo nolundu-lundu nompala'imo padang bola Sinai, ka' kundom aijo' jinojoongmo salatan aha tinokamo i padang bola Paran.

SISIKON NU TO RASUL-RASUL 7:53

To mala-malaikat nompotokamo pale-palentah nu Tumpu Allah hi komiu, panyo komiu madi' mohongo-hongo.”

2 KORINTUS 3:7

Tempo'nyo janji' anu momboa kapatean aijo' binau ka' binotik i batu, jingka nu Tumpu lonyingkaban na nonjingkai ohup i Musa. Jingka-Nyo aijo' lonsinoan hondo, sahingga bansa Israel madi' noko ala nontoa ohup i Musa, mau mule' jingka i ohupnyo aijo' montampu'unimo mopoho' tempo'nyo aitu. Yo, de mojanji' anu ola momboa kapatean aijo' pinododo ka' taha-tahahumo na lonyingkaban,

2 KORINTUS 3:9

De palajanjian anu mohukum mian aijo', sumo aijo'mo na ko lonyingkabannyo, tantu lebe lonyingkaban mule' na palajanjian anu moko ala mompotimbali mian mompo'ule ma'ima' tiba Tumpu Allah.

GALATIA 3:10

To mia-mian anu talalomo nontaha'imani atulan nu agama, iwi-iwi' tumuu' i uno nu kutuk. Kalana i uno nu Kitab nu Tumpu tinulismo, “Mian anu madi' tulu-tulutan mompojalan iwi-iwi' anu tinulismo i uno nu Kitab Atulan nu Agama, nu kutuki nu Tumpu!”

GALATIA 3:19

Desumo aitu, bau apaa na atulan nu agama anu binee'mo? Salaku bau pontaami, saba' atulan aijo' pinotuangmo da bau momponyata' manusia sinala'mo. Atulan nu agama aijo' opake ola, de ma'isa pe'e toka na samian anu lee' mae i Abraham, anu sinanggo i uno nu janji' nu Tumpu hi Abraham. Atulan nu agama aijo' pinotokakon nu to mala-malaikat nompake samian na manusia.

GALATIA 4:24

Aiya timbali opake sumo ande-andeon. Ua'aha na boune aijo', aijo'mo susumo ohua' na palajanjian: samian nolengkat mae i Bungkutnyo nu Sinai – aitumo i Hagar; to ana-anaknyo pinohampe salaku posaihon.

PO'ULE' INGULIT 5:22

Aijo'mo na palentah-Nyo iwi-iwi' anu binee'mo nu Tumpu hi belemiu tempo'nyo belemiu sinihukmo i bungkutnyo. Tempo'nyo Ia notatae daka-daka' hondo aijo' mae i uno nu apu ka' i kundom anu butolu hondo, Ia nombee'i palentah haha aijo' ka' misa' anu sangga'at. Lantas tinulisnyo i ohua' na batu pinontulisan ka' binee'mo mae hi belengku.”

2 TESALONIKA 1:7

Ka' hi komiu anu uuka aiya nongoa'imo kasansala'an – sumo aitu mule' hi kami – Tumpu mombee'je kasanangan de Sinaanyomo nu Tumpu Yesus minsusule'mo mae lengkat i suluga' ka' mompotoamo butong-Nyo tiba to mala-malaikat-Nyo anu to babaani

IBRANI 12:20

Kalana aha madi'mo moko ala montahan mohongo palentah anu pinotoka mae nu potatae aijo'. Kalana potatae aijo' nontaloakonmo, “Iwi-iwi' na anu mompeja' bungkutnyo aiya, madi' opajuli pa' aijo' binatang kabai pa' ihe, tionyo opahambunu'akon nu batu sampe ia silaka.”

IBRANI 2:2

Iwi-iwi' na anu pinotuunmo ka' pinotokakonmo nu to mala-malaikat hi mompolee'to i nyata'mo hondo, ka' mian anu madi' montuluti, kabai mian anu madi' montapali mohumpak hukuman anu konanyomo na o hukum sumo aijo'.

YUDAS 1:14

I Henokh, lee'mo ko popitu'nyo lengkat mae hi Adam, naipuan mae toho'mo nonsisikakon kantumuu'an nu mian haha aijo'. I Henokh notatae, “Toa, Tumpu tokaje mae tiba to mala-malaikatnyo anu susi' i mada-madalannyo

ANU PINOTO'I HI YOHANES 5:11

Lapas aijo' aku nontoa mule'. Aku nohongo potatae nu malaikat i mada-madalannyo ka' mojuta-juta na konjoo'nyo. Aha tinuminjomo nontikubi kasuhangan aijo', ka' opa-opat na malaikat tiba to pola-polaya' haha aijo'.