PO'ULE' INGULIT 32:39 - KITAB NU TUMPU ALLA LELE MA'IMAI'

³⁹ Soba toa, olamo Aku sa'a-sa'angu'nyo na Tumpu Allah, madi' ko Tumpu Allah sangga'at, olamo ahi' Aku. Aku mompatei ka' mompotumuu', mombelai ka' mompa'alin. De aku mombaumo apaa na anu ku kahanda'i, madi' ko samian pe'e na anu moko ala mongewa.

PO'ULE' INGULIT 32:39 ပူးပေါင်းရင်းမြစ်များ

2 TOMU-TOMUNDO' 20:5

da po'ule' minsusule' hi Hizkia, tomundo' nu mian anu pinalesayamo hi Tumpu ka' mompoto'i potunonku sumo uuka, “Aku Tumpu, Tumpu Allah anu nusombah i Daud mompolee' nu beleyum nohongomo do'a nu beleyum ka' nontoamo lolu' nu beleyum. Ku po'alinmo na beleyum hipuan beleyum mambamo i laigan-Ku.

2 TOMU-TOMUNDO' 5:7

Salatan tomundo' nu Israel nombasa'mo sulat aijo', binea-beaknyomo na baju'nyo kalana nabuhukmo, ka' notatae, “Silakamo na uuka kadaka' i tomundo' Siria aijo' nompoitamo mae aku da mompa'alinakon mian aijo'? Aku misa' Tumpu Allah anu ko kuasa timbali mompotumuu' kabai mompatei mian! Tantu tomundo' nu Siria aijo' ola mompobau-bau aku!”

NEHEMIA 9:6

Lapas aijo' mian da'isan nu aha Israel binalado'amo sumo uuka: “Belentomo na Tumpu, belentomo Sa'a-sa'angu'nyo na Tumpu Allah; pinotimbalimo nu Belento na mandala' iwi-iwi' aita' i langa, ka' suele ambai tiba tano' ka' iwi-iwi' na anu daagi' i unonyo, lantas pinotumuu'mo nu Belento ka' jinaganmo nu Belento. Iwi-iwi' na anu balakuasa aita i langit tolodadupu monsombah Belento; aha montuluti Belento ka' tina'alukmo.

AYUB 10:13

Panyo uuka aiya sinumbu'kumo, taalu' tempo'nyo aitu, hoko-hokot lewa'mo i niat nu Belento na kasilakanku.

AYUB 10:7

Sabenannyo nusumbu' nu Belento na aku aiya madi' ahi kosala'nyo memang totu-totu'u ahi' madi' sala'. Nusumbu' nu Belento saba' mau pe'e samian madi' moko ala momposalamat aku anu atina' i kakuasa'an nu lima nu Belento.

AYUB 5:18

Kalana Tumpu Allah na nomposakiti ia mule' ahi' na mompakuli'i. Ka' limanyo na nondoke, limanyo mule' ahi' na po'ule' mompo'alin.

MAZMUR 102:27

Iwi-iwi' aijo' mingkot, panyo Belento na sabole-boleh ahi' daagi'; iwi-iwi' aijo' maluso'mo susumo baju'. O'alinmo nu Belento susumo baju' anu pinmo, lantas iwi-iwi' mahu'mo.

MAZMUR 102:28

Panyo Belento na satataapnyo ahi', kantumuu'an nu Belento madi' ko ka'ahenannyo.

MAZMUR 18:31

Apa-apaa na anu binaumo nu Tumpu na'ima'mo hondo anu jinanji'mo nu Tumpu timbali opalesaya. Ia sumomo kanta kona hi mian iwi-iwi' anu mihohung' hi Ia.

MAZMUR 50:22

Soba palahatikan, belemiu anu mongkolilimi Tumpu; bala ingati mae dumo belemiu Ku silakai, ka' madi' ko anu momposalamat.

MAZMUR 51:8

Belento montutut kinyonyoa anu hodi'; isi mae na kinyonyoangku nu kapandean lengkat mae hi Belento.

MAZMUR 68:20

Opuji' na Tumpu, kalana Iamo na Tumpu anu momposalamat kita; sansina-toka sansinaa n simbu na kolononto.

MAZMUR 86:10

Kalana Belento mahoson ka' baani ka' mombaumo hahan anu okabangangi, olamo samata-mata Belentomo na Tumpu.

NOSABATMO 15:26

Tumpu nompoto'imo, “Tuluti na Aku totu-totu'u, ka' obau apaa na anu koong-Ku ma'ima', obau na aijo', tuluti iwi-iwi' na palentah-ngKu. De aijo' obau nu belemiu, belemiu madi' Ku hukum nu to panya-panyakit anu Ku pokona hi mian nu Mesir. Akumo na Tumpu anu nompo'alinmo belemiu.”

NOSABATMO 4:7

Lantas Tumpu notataemo, “Po'ule' posoop na lima nu beleyum i uno nu baju' nu beleyum.” I Musa nombaumo sumo aijo', lantas limanyo aijo' na'alinmo.

ANU MOMPOLELE POTATAE NU TUMPU 3:3

tempo'nyo opateimo ka' tempo'nyo mompa'alin, tempo'nyo mongidei ka' tempo'nyo mombau.

YESAYA 19:22

Nu tahutu'mo nu Tumpu na bansa Mesir, panyo lapas aijo' Nu pakuli'imo da ma'alin na aha. Aha mobalikmo mae hi Tumpu ka' Ia mohongomo do'a nu aha ka' mompo alinmo.

YESAYA 30:26

Bitu'on majingkamo mae susumo batu nu sinaa, ka' mule' batu nu sinaa lebemo majingka pimpitunmo lipat nulingkuduimo na jingkanyo bia-biasamo, sumomo ahi' jingka nu anu pitunsinaa na oposa'angu'mo. Iwi-iwi' aijo' saidi' mae jadimo de Tumpu mombobodimo ka' mompo'alinmo iwi-iwi na bela nu mian anu palesayamo hi Ia anu saja'mo ingoa'an nu aha.

YESAYA 41:4

Ihe na nombaumo iwi-iwi' aijo'? Ihe na nontantukanmo da kinosisikonnyo? Aku, Tumpu, Akumo na anu momona, ka' tataap sabole-boleh daagi' sampe imihinyo mae.

YESAYA 43:10

O, mian anu palesayamo hi beleng-Ku, belemiumo na to sakisi-sakising-Ku, belemiu pinile'an-Kumo da baumo to posa-posaihon-Ku da monsumbu' mae Aku ka' mule' palesaya mae hi beleng-Ku, ka' mangalati'mo taalu' Akumo ahi' na Tumpu. Akumo na Tumpu Anu Sa'a-sa'angu'nyomo madi'mo daagi' ko sangga'atnyo mau ma'isa pe'e ko Akunyo kabai mau daagi'mo ko Akunyo aiya.

YESAYA 43:12

Aku polo'mo nompoto'i hi beleyum, Akumo na momposalamat belemiu misa' tumpu nu aha anu isalipu'an mae anu atina' hi beleyum belemiumo na timbali bau to sakisi-sakising-Ku. Ka' Aku, Akumo aiya na Tumpu,

YESAYA 43:13

sampe toka sidu-sidutu' Akumo aiya na tataap Tumpu. Madi' ko anu madi' i uno nu kakuasa'an-Ku, kabai montewa' anu tinanga'an-Kumo.”

YESAYA 45:18

Tumpu na nompotimbali langit, Lamo ia Tumpu! Lamo ia nompotimbali ka' mule' nontali' dunia aiya, binaumo hoso-hoson ka' tataap satinjonyo. Ia madi' nompotimbali tampat anu liing hondo, panyo tampat da bau kajojoongan. Lamo ia notatae, “Akumo na Tumpu ka' madi'mo kosangga'atannyo.

YESAYA 45:22

O, iwi-iwi' na anu jojoong i dunia, po ule' mae toka hi beleng-Ku da belemiu oposalamat, kalana olanyomo Aku na Tumpu madi'mo daagi' kosangga'atannyo!

YESAYA 45:5

Akumo na Tumpu madi'mo daagi' kosangga'atannyo, Akumo na Tumpu anu Sa'a-sa'angu'nyomo Beleyum binee'an-Kumo toongon, maumo ahi' beleyum madi' monsumbu' Aku.

YESAYA 46:4

Aku tataap Tumpu nu beleyum sampe belemiu langkai'mo ka' bengkele'mo; ka' tataap monjagai belemiu sampe belemiu uanonmo. Aku na nompotimbalimo belemiu ka' tataap ahi' mompotuu' belemiu. Aku na montulungi ka' momposalamat belemiu.

YESAYA 48:12

Tumpu notatae, “Potombihing mae Israel, mian anu ilagang-Kumo, Aku na tataap ahi' Tumpu nu beleyum Akumo na anu momonanyo mae, ka' Aku mule' na anu imihinyo mae.

YEHEZKIEL 37:12

Kalana aijo' poto'imo pa'apaa na anu jadi saidi' mae hi aha mian Israel anu palesayamo hi beleng-Ku, saba' Aku Tumpu Anu Matangkas na Kuasanyo mombukamo kubulan nu aha. Ku sabatakonmo mae na aha lengkat ikiijo' ka' po ule'mo mae momboa aha itano' nu Israel.

YEHEZKIEL 37:3

Tumpu nompokilawamo mae hi belengku, “O manusia anu madi' tumuu' batu, pa' timbali na buku haha daagi' po ule' tumuu'?” Aku nontaami, “Tumpu Anu Matangkas na Kuasanyo, hanya Belento na anu monsumbu' hondo.”

HOSEA 5:14

Susumo singa montumbuhi sumo aijo'mo na Aku montumbuhi mian nu Israel tiba Yehuda. Posi Akumo na mombea-beak aha lantas Ku pala'imo. De Ku hela'mo na aha mamba madi' ko samian pe'e na moko ala mompolapas aha.

HOSEA 6:1

To mia-mian nu Israel notataemo, “Imbo'mo da kita minsusule'mo hi Tumpu. Lamo ia na monsakiti kita, panyo Ia mule' ahi' na mompa'alin. Ia na mobelai kita, panyo Ia mule' ahi' na mombobodiakon iwi-iwi na Belento.

MIKHA 5:8

Israel mompatundu'mo iwi-iwi' na sampobali'nyo ka' mule' mohansunimo aha iwi-iwi'.

YOHANES 8:24

Mokonyo aijo', Aku notatae hi komiu tukoong-Ku, komiu mateje i uno nu dosa-dosa' miu. Ka' memang mateje i uno nu dosa-dosa' miu, de madi' mompalesaya ‘Akumo na Ia, anu osa-osanggohi AKU DAAGI'.’ ”

PO'ULE' INGULIT 32:12

Sumo aijo'mo na Tumpu molaya' mian anu pinalesayamo hi Ia, madi' ko pilogot anu lengkat mae i salipu'an na monsangalui Ia.

PO'ULE' INGULIT 4:35

Iwi-iwi' aijo' pinotoamo nu Tumpu hi belemiu da bau pomponyata' saba' ola Tumpu, aijo'mo na Tumpu Allah ka' madi'mo ko sangga'atannyo.

PO'ULE' INGULIT 7:9

Otutugi ahi' saba' Tumpu Allah nu belemiu ola sa'a-sa'angu'nyomo Ia na Tumpu Allah, ka' Iamo na Tumpu Allah anu talalo manonong. Tumpu mongganapimo apaa na anu jinanji'-Nyomo ka' nompotoamo kalibosan-Nyo sidu-sidutu' sampe samadala na lapisan nu lee'nyo nu aha mian anu mongkanonongi Ia ka' tulu-tulutan hi iwi-iwi' na palentah-Nyo.

IBRANI 1:12

Songko-songko na dunia aiya nu tapi' sumo baju', ka' sangga'atje na bau pombolosi nu Belento. Panyo Belento madi' toho' mongabali', ka' kantumuu'an nu Belento madi' ko kamingkotannyo.”

ANU PINOTO'I HI YOHANES 1:11

Lewo' aijo' notatae, “Tulismo apaa na anu tinoaum, ka' pakatumo na kitab aijo' toka i popitu' na jama'at aijo'mo: Efesus, Smirna, Pergamus, Tiatira, Sardis, Filadelfia, ka' Laodikia.”

ANU PINOTO'I HI YOHANES 2:8

“Toka hi malaikat anu kiijo' i jama'at nu Smirna, tulismo sumo uuka: Aiyamo na potuunon lengkat mae hi Ia anu i momona ka' anu imihinyo – anu sinilakamo ka' po'ule'mo tinumuu'.

1 SAMUEL 2:6

Tumpu mompatei, ka' mule' Ia mompotumuu' I dunia nu mian anu sinilakamo tinau akon-Nyomo na manusia. Ka' mule' Ia na mohangkat lengkat i kiijo'.