PO'ULE' INGULIT 31:6 - KITAB NU TUMPU ALLA LELE MA'IMAI'

⁶ Tionyo ahi' kinyonyoa nu belemiu opohoson ka' tionyo ahi' baani. Boli okabuhuk na aha kalana nutulungije nu Tumpu Allah nu belemiu na belemiu. Ia madi' ola mompojohok belemiu sahingga belemiu mompele-pele'mo, kabai mompala'i belemiu.”

PO'ULE' INGULIT 31:6 ပူးပေါင်းရင်းမြစ်များ

KAJADIAN 26:24

Pihi-pihi aijo' Tumpu nanintoamo hi ia ka' notatae, “Akumo na Tumpu Allah nu tuuma nu beleyum i Abraham. Boli mabuhuk; Ku jagaije na beleyum. Ku balakatije na beleyum ka' mombee'i beleyum lee' manjoo' kalana anu jinanji'-Kumo hi posaihon-Ku i Abraham.”

KAJADIAN 28:15

O inau' Ku tulungi ka' Ku jagai na beleyum, mau mule' pa' moya na beleyum ka' po'ule' Ku boa mae na beleyum i lipu' aiya. Madi' Ku pala'i na beleyum, sampe toka i tempo'nyo de apaa na anu jinanji'-Kumo hi beleyum, Ku baumo iwi-iwi'.”

2 SAMUEL 10:12

Pohoson na kinyonyoa ima-ima'! Imbo' babaani mae na kita mahampate montinjohakon bansanto tiba to kota-kota' nu Tumpu Allah. O'amalakon da Tumpu mombaumo apa-apaa na anu nu kahanda'i.”

1 TOMU-TOMUNDO' 2:2

“Aiyamo na tempo'nyo aku silakamo. Tionyo ahi' beleyum baani ka' palesaya totu-totu'u hi Tumpu Allah.

1 TOMU-TOMUNDO' 6:13

Aku jojoongmo i laigan anu binaumo nu beleyum aiya hi aha mian nu Israel anu pinalesayamo hi belengku. Madi'mo Ku pala'i na aha.”

1 TOMU-TOMUNDO' 8:57

O'amalakon da Tumpu Allah-nto montoa mae kita susumo Ia nonjagai mompolee'to, o amalakon da Ia madi' mompala'i kita.

1 TAWARIKH 22:13

De beleyum montuluti iwi-iwi' palentah anu binee'mo nu Tumpu hi Musa anu ogunakon hi bansa Israel, beleyum moko ala mompotimbali laigan aijo'. Beleyum tionyo ahi' totu-totu'u na kinyonyoa ka' baani. Boli mabuhuk na mongahopi maumo pa'apaa.

1 TAWARIKH 28:10

Potutugakon ima-ima' saba' Tumpu nompile'imo beleyum da mombau laigan anu samata-mata opake ponsomban Ia. Jadi uuka aiya baumo na aijo' ka' okinyonyoai ahi' totu-totu'u.”

1 TAWARIKH 28:20

Lapas aijo' i Tomundo' Daud notatae mule' hi Salomo anaknyo momo'ane, “Beleyum tionyo ahi' totu-totu'u na kinyonyoa ka' baani. Tampuunimo na kalaja ka' boli bata-bata maumo pa'apaa na o ahopi. Tumpu Allah anu ku ku sombah na montulungi beleyum. Ia madi' mompojohok beleyum. Ia saja' montoa kapalaluan nu beleyum sahingga iwi-iwi' na kalaja aijo' timbalimo, ka' madi'mo ko anu obau.

2 TAWARIKH 32:7

“Pohoson na kinyonyoa ka' palesaya totu-totu'u boli mabuhuk hi tomundo Asyur kabai hi suludadunyo. Kita na lebe mahoson molingkudui aha kalana kita na lebe manjoo'.

MAZMUR 27:1

Mazmur i Daud. Tumpu aijo'mo na jingkaku ka' kasalamatanku, madi'mo ko anu ku kabuhuk. Tumpu aijo'mo na benteng bau pihohunganku, aku madi'mo mabuhuk.

MAZMUR 27:14

Sabole-bole ahi' taha'iman hi Tumpu, pohoson ka' bolimo mongabali' na kinyonyoa nu beleyum; ingat, sabole-bole ahi' taha'iman hi Tumpu.

MAZMUR 94:14

Kalana Tumpu madi' hondo mompala'i mian anu palesayamo hi Ia; ia madi' ola mompojohok anu tinimbalimo pusaka'Nyo.

YESAYA 41:10

Boli mabuhuk kalana Aku na monsangalui beleyum, boli baat-bata, kalana Aku na Tumpu nu beleyum. Beleyum Ku pokododomo ka' Ku tulungimo, Ku taka'mo nu limang-Ku anu timbali otaha'imani.

YESAYA 51:12

Tumpu notatae, “Akumo na mohase' belemiu. Kadaka' beleyum mabuhukmo hi manusia anu madi' tumuu' batu, hi manusia anu ingalinmo susumo hemput?

YEREMIA 1:8

Boli mabuhuk hi aha, kalana Ku sangalui ka' Ku jagai na beleyum. Aku, Tumpu notataemo!”

YEREMIA 32:40

Aku mombaumo palajanjian anu sampe toka sidu-sidutu' hi aha. Aku madi' toho' belenti na mombau palabuatan ma'ima' hi aha. Ku pojadimo na aha da mabuhuk ka' moholomati mae Aku nu kinyonyoa anu totu-totu'u ahi' da aha madi'mo matikojo'on hi Belengku.

HAGAI 2:4

Maumo sumo aijo' boli ahi' hente na kinyonyoa nu belemiu iwi-iwi'! Lausakonmo na kalaja aijo' kalana Aku tataap montulungi belemiu.

ZAKHARIA 8:13

O, mian anu jojoong i Yehuda ka' i Yerusalem! Naipuan mae de to mia-mian anu i salipu'an mae mompaha toto totobi'akonmo, aha motatae, ‘O'amalakon da balaa' anu nontuda'imo Yehuda tiba Israel suele ahi' montuda'i belemiu!’ Panyo Ku posalamatje na belemiu sahingga to mia-mian anu isalipu'an mae aijo' motataemo hi bubuu' aha, ‘O'amalakon da balakat anu toka hi aha Yehuda tiba hi aha Israel, suele toka ahi' hi butong nu belemiu!’ Kalana aijo' pohoson na kinyonyoa nu belemiu ka' boli ahi' mabuhuk!”

NOMBILANGMO 13:20

Pohoson na kinyonyoa nu belemiu. Toa pa' tano'nyo ma'omuk kabai manjoo' na kau'nyo. Boli okolilimi de minsusule'mo mae momboa mae bua' nu sosu'anon anu ikiijo' mae.” Tempo'nyo aitu montampu'unimo pontipuan anggur.

NOMBILANGMO 14:9

Boli panggaga hi Tumpu, ka' boli mabuhuk hi mian haha aijo' anu jojoong i lipu' kiijo', kalana dengke na kita mompatundu' aha. Anu monjagai aha nompala'imo aha, panyo Tumpu na monsangalui ahi kita. Jadi, boli mabuhuk.”

LUKAS 12:32

“Komiu anu ola sangkiding na konjoo'nyo, boli mabuhuk! Kalana Tuumaum sanang mombee' hi beleyum balakat lengkat mae i Kapalentahan-Nyo.

1 KORINTUS 16:13

O jaga mae ahi' na komiu ka' opohoson na kapalesaya'an i uno nu kantumuu'an salaku mian Kristen. Obau babaani ka' boli mabuhuk na palesaya.

EFESUS 6:10

Ahennyo, pahoson ahi' na komiu nu kahosonan anu i humpak miu lengkat hi kuasa nu Tumpu, kalana komiu nosa'angu'mo tiba Ia.

PO'ULE' INGULIT 1:21

Belengku notatae: Uka komiu timokamo i da'erah bungkut nu mian Amori, tano anu bine'mo hi kita i Tumpu-Allahnto ka Allah mompole'to. Toa i ahop miu tala-tala na tano' aijo. Lako'mo patundui susumo anu pinalentah nu Tumpu. Bolimo bata-bata kabai mabuhuk.

PO'ULE' INGULIT 1:29

Panyo belengku no tatae, boli mabuhuk hi to mia-mian aijo'.

PO'ULE' INGULIT 11:8

“Otuluti iwi-iwi' na atulan anu ku potokakon hi belemiu sinaa aiya, da belemiu timbali moko ala motaap i kaunyo, ka' minsoop i lipu' anu madi'mo pin ojojoongimo miu.

PO'ULE' INGULIT 20:1

“De belemiu mambamo mahampate mongewamo sampobali' nu belemiu, boli mabuhuk na montoa kareta anu nupake mae nu aha mahampate ka' ajahan nu aha manjoo' ka' suludadu nu aha anu konjoo'nyo molingkuduimo konjoo'nyo nu belemiu. Tumpu Allah nu belemiu anu nompobebasmo belemiu lengkat mae i Mesir, na montulungi belemiu.

PO'ULE' INGULIT 31:23

Lapas aijo' Tumpu notataemo hi Yosua anak i Nun, Ia notatae, “Tionyo ahi' beleyum mompohoson kinyonyoa ka' baani, Yosua! Beleyummo na molaya' bansa Israel mompinsoopi lipu' anu jinanji'-Kumo hi aha ka' Ku tulungije na aha.”

PO'ULE' INGULIT 31:7

Lantas i Musa nolagamo i Yosua, ka' i ahop nu bansa Israel iwi-iwi' ia notataemo hi Yosua, “Tionyo ahi' opohoson na kinyonyoa nu beleyum ka' tionyo ahi' baani, Yosua! Beleyummo na molaya' bansa aiya da jojoongmo i lipu' anu jinanji'mo nu Tumpu hi mompolee' nu aha.

PO'ULE' INGULIT 31:8

Tumpu na momboa ka' montulungi beleyum. Ia madi' ola mompojohok belemiu sahingga belemiu mompele-pele'mo kabai mompala'i beleyum. Kalana aijo' boli mabuhuk kabai bata-bata.”

PO'ULE' INGULIT 4:31

Tumpu Allah nu belemiu atina'mo na Tumpu Allah anu talalo hondo mongkalibosi. Ia madi' mompala'i kabai mompatei belemiu, kabai mongkolilimi palajanjian-Nyo hi mompolee' nu belemiu.

PO'ULE' INGULIT 7:18

Panyo boli okabuhuk na aha; o' inau' apaa na anu binaumo nu Tumpu Allah nu belemiu hi tomundo nu Mesir ka' hi iwi-iwi' na layatnyo.

2 TIMOTIUS 2:1

O Timotius, anakku! Pahosonmo ahi' na beleyum nu balakat anu binee'mo hi kita, kalana kita nosa'angu'mo tiba i Kristus Yesus.

IBRANI 13:5

Boli kantumuu'an miu mongka'ima'i doi na mongkuasai, panyo tionyo ahi' komiu mongoa'i sukupmo tiba apaa na anu daagi'mo hi belemiu. Kalana Tumpu notataemo, “Aku madi' mompojohok kabai mompala'i beleyum.”

YOSUA 1:9

O inau', Aku nompalentahmo beleyum da beleyum totu-totu'u na kinyonyoa ka' baani! Boli beleyum mabuhuk kabai hente na kinyonyoa, kalana Aku na Tumpu Allah nu beleyum saja' monsangalui beleyum maumo pa' moya na kalambanan nu beleyum.”

YOSUA 10:25

Lapas aijo' i Yosua notataemo hi to kapa-kapala nu suludadunyo, “Boli bata-bata ka' boli mabuhuk. Tionyo ahi' belemiu palesaya totu-totu'u ka' baani' kalana sumo aiya na Tumpu mombau sampobali' miu iwi-iwi'.”

ANU PINOTO'I HI YOHANES 21:8

Panyo mian anu madi' sabaan, geguan, mian anu palaganta pampatei, mian masala', mian anu ko ajimat, monsombah pilogot, ka' iwi-iwi' na anu baleko' o'alin i uno nu apu anu sumo ndalangon ka' belelang anu lewa' moak, aijo'mo na kapatean anu kopinduannyo.”

1 SAMUEL 12:22

Tumpu binasumpa'mo, tukoonyo, Ia madi' mompala'i belemiu kalana tinantukan-Nyomo da belemiu opotimbalimo mian anu palesayamo hi Ia.