PO'ULE' INGULIT 3:24 - KITAB NU TUMPU ALLA LELE MA'IMAI'

²⁴ O Tumpu Anu Matangkas na kuasanto, ku sumbu na anu pinotoamo nu belento hi belengku aiya sala'je tampu'unannyo nu palabuatan anu daka' ka' anu okabangangi apaa na anu saidi' mae obau nu Belento. Madi' ko pilogot sangga'at aita' i langit kabai aiya i dunia anu sumo Belento timbali moko ala mombau hahan anu daka'.

PO'ULE' INGULIT 3:24 ပူးပေါင်းရင်းမြစ်များ

2 SAMUEL 7:22

Totu-totu'u daka' na kakuasa'an nu belento, o Tumpu Allah! Ola sa'a-sa'angu'nyomo belento na Tumpu Allah, madi' ko anu pokakana tiba belento. Sinumbu'mo mami na han aijo' kalana pinoto'imo hi kami naipuan pe'e mae.

2 TAWARIKH 6:14

“O, Tumpu, Tumpu Allah nu Israel! Aita' i langit kabai aiya i tano' madi' ko anu sumo belento! Belento nongganapimo janji' nu Belento ka' nompotoamo kalibosan nu Belento hi mian anu pinalesayamo hi belento, anu mohongo-hongo ka' tulu-tulutan lengkat i konyonyoanyo anu totu-totu'u hondo hi belento.

NEHEMIA 9:32

O Tumpu Allah, Tumpu Allah mami anu mahoson hondo! Tumpu Allah anu daka' na kakuasa'annyo ka' opalias! Otoongi totu-totu'u nu Belento iwi-iwi' apaa na anu jinanji'mo nu Belento; iwi-iwi' na anu jinanji'Mo nu Belento ginanapanmo ka' binaumo nu Belento. Salatanmo pe'e to tomu-tomundo' nu aha Asyur nonsansalamo kami. Sampe uuka aiya nanjoo'mo hondo na kasansala'an anu ingoa'anmo mami. To tomu-tomundo' mami, imam, nabi tiba to tu'a-tu'anyo mami, ka' suele mompolee'mami ka' mule' aha mian da'isan nongoa'imo kasansala'an iwi-iwi'. Boli okolilimi na kasansala'an haha aijo'! Boli madi'mo o'inau' i uno nu pikilan nu Belento!

MAZMUR 106:2

Ihe na moko ala mombebakon kabaanian nu Tumpu, ka' anu konanyomo ahi' na bau pompuji' ia?

MAZMUR 145:3

Kalana Tumpu talasanggo ka' talalo hondo opuji', katalasanggoan-Nyo madi' opoko ala okiop.

MAZMUR 145:6

Aha mombebakonmo palabuatan nu Belento anu talalo hondo okabuhuk kakuasa'an anu daka' hondo nu Belento kubebakonmo.

MAZMUR 150:2

Opuji' na Ia, kalana palabuatan-Nyo anu talalo opalias! Opuji' na Ia kalana katalasanggoan-Nyo anu daka' hondo.

MAZMUR 35:10

Sahondo-hondonyo na kinyonyoangku montaloakon, “Tumpu, Belento madi' koanu timbali pompokakanakonan! Belento nompobebasmo anu madi' mahoson da madi'mo nu kuasai nu anu mahoson, Anu kasiasi ka' sansala da madi'mo sola' obee' kasansala'an.”

MAZMUR 71:19

O Tumpu, ka'adilan nu Belento matangkas hondo sumo langit; daka' hondo na hahan anu binaumo nu Belento; ihe na moko ala mompokakanai Belento?

MAZMUR 86:8

O, Tumpu, madi' ko tumpu sangga'at susumo Belento madi' ko anu moko ala mombau apa-apaa susumo anu binaumo nu belento.

MAZMUR 89:6

Sidang nu aha mian nu suluga' nompuji'mo palabuatan nu Belento anu okabangangi, ka' nonyanyiakonmo kanonongan nu Belento o, Tumpu.

MAZMUR 89:8

Belento oholomati nu aha to mia-mian anu susi', nakabuhuk hondo nu aha iwi-iwi' anu montikubi mae Belento.

NOSABATMO 15:11

Iya na Tumpu Allah sangga'at anu moko ala mohungku'i Belento, o Tumpu Anu Talasanggo hondo ka' anu susi'? Ihe na moko ala mombau anu okabangangi ka' mombau palabuatan anu daka' susumo Tumpu?

NOSABATMO 8:10

Tomundo aijo' nontaami, “Do'akon mae na aku dodop.” Notatae na i Musa, “Ku bauje apaa na anu pinoitamo nu belento Tuanku. Sahingga osumbu'je nu belento Tuan saba' madi' ko Tumpu Allah sangga'at sumo Tumpu, Tumpu Allah mami.

NOSABATMO 9:14

Uuka aiya Aku mompotokamo balaa' misa' ola hi aha mian anu ko pangkatnyo ka' hi layat, panyo suele hi belento, da nusumbu' nu belento taalu' madi' ko anu moko ala mompokakanai Aku i songko-songko na dunia.

YESAYA 40:18

Jadi ihe na timbali bau pompokakana konan nu beleyum Tumpu? Ihe na nu anggap pokakana tiba Ia?

YESAYA 40:25

Ihe na nu anggap pokakana sumo Tumpu Anu Daka' na Kuasanyo? Ihe na bau pompokakanakonan nu beleyum Ia?

YEREMIA 10:6

Tumpu anu talasanggo hondo Belento madi' ko anu moko ala mongkakanai sanggo nu Belento talasanggo hondo ka' balakuasa hondo.

DANIEL 3:29

Kalana aijo' ku palentah da batu-batu mian i sa'angu' na bansa, tulunan nu bansa kabai basa' iyayamae anu mongalu Tumpu anu nu sombah i Sadrakh, i Mesakh, tiba i Abednego, opado-padot ka' mule' laigannyo ohobo'akon ka' opojadimo tambulan nu anu nopapumo na laigannyo aijo'. Kalana madi' ko pilogot anu moko ala mombau apaa na anu binaumo nu Tumpu aijo'.”

NOMBILANGMO 23:23

Madi' ko ajimat anu mongkona i Yakub madi' ko to boli-bolian anu moko ala mombau apa-apaa hi Israel. Mongkona bansa aijo' mian notatae, ‘Toa na hahan anu okabangangi anu binaumo nu Tumpu Allah!’

PO'ULE' INGULIT 11:2

Tutugi uuka aiya apaa na anu osumbu' miu mongkona Tumpu i uno nu han anu ingoa'anmo nu belemiu. To ana-anak nu belemiu ma'isa toho' nongoa'i sumo aijo'. Belemiu na anu nontoamo mosia na Tumpu Allah nu belemiu anu talasanggo hondo, kahosonan-Nyo, kakuasa'an-Nyo,

PO'ULE' INGULIT 3:23

“Tempo'nyo aitu pinoitangkumo hi Tumpu:

PO'ULE' INGULIT 32:3

Aku mompuji'mo sanggo nu Tumpu, Bebakonmo na katalasanggoan nu Tumpu Allah-nto!