NYANYIAN ANU TALASANGGO 2:14 - KITAB NU TUMPU ALLA LELE MA'IMAI'

¹⁴ O malapati'ku anu i olo-olot nu batu, patisulukannyo ikeles anu matungebe, de timbali da aku montoa ohup nu beleyum, ka' mohongo potatae nu beleyum, kalana ohup nu beleyum handa hondo, potatae nu beleyum suele ma'ima' hondo.

NYANYIAN ANU TALASANGGO 2:14 ပူးပေါင်းရင်းမြစ်များ

AYUB 9:16

De bisuannyo Nu taamimo salatan aku motatae, aku bata-bata, pa' totu'u ahi' Ia sanang na mohongo potataengku?

MAZMUR 110:3

De tokamo na sinaanyo beleyum mongkuasaimo, i bungkutnyo anu susi', layat nu beleyum sanang na mamba mahampate. Sumomo dondu'ok daagi' subu, to oli-olitau tokamo mae hi beleyum.

MAZMUR 22:3

O Tumpu-ngku, aku nongkakase sina-sinaa, panyo Belento ola ahi' nomohokot. Aku binalado'a pihi-pihi, panyo kinyonyoangku madi' ahi' tenda.

MAZMUR 45:11

O to Lalangkoyang nu tomundo' potombihing mae na potataengku kolilimimo na bansa tiba to sanga-sangalu nu beleyum.

MAZMUR 45:12

Handanyo nu beleyum nomposanangmo kinyonyoa i tomundo', ia tuan nu beleyum, hongo-hongo na ia.

MAZMUR 50:23

Mian anu monsombahkon bau pontalima kaseh salaku bau kolobannyo, ia aijo' na moholomati Aku; ka' mian anu momposadiai jalan da kajalanan-Ku Ku potiju'je hi ia na kasalamatan anu lengkat aiya hi beleng-Ku.”

MAZMUR 68:13

“To tomu-tomundo ka' suludadunyo nopalaimo!” Aha sumomo malapatii' anu i lumahapmo ka' nambamo. To boboune i laigan nombagi-bagiakonmo, salaka ka' mosoni' anu pinala'ianmo. Maumo ahi manjoo' na anu madi' namba nahampate, mian anu palesayamo hi Tumpu nohumpakmo mae ka'untungan na nahampate.

MAZMUR 74:19

Boli mombee' mian anu palesayamo hi Belento anu madi'mo moko ala mombau apa-apaa i lima nu mian anu monsampobali' mae, anu tala-talalomo hondo sininggi. Boli sampemo toka sidu-sidutu' na mongkolilimi mae kantumuu'an nu mian anu palesayamo hi Belento anu nonta'aupmo kasusa'an aiya.

NOSABATMO 3:6

Aku aiya Tumpu Allah nu mompolee' nu beleyum, Tumpu Allah i Abraham, i Ishak ka' i Yakub”. Lantas i Musa nongkukumbungimo ohupnyo, kalana ia mabuhuk na mondin Tumpu Allah.

AMSAL 15:8

Tumpu montalima do'a nu mian anu manonong; panyo Ia mongka'ideki palasombahan nu mian anu ma'idek na kinyonyoanyo.

NYANYIAN ANU TALASANGGO 1:15

Beleyum handa hondo kukalibosi, beleyum handa totu-totu'u. Mata nu beleyum mimbalu-balu' malapati'.

NYANYIAN ANU TALASANGGO 1:5

Bakas mau mo'itom panyo aku handa o to lalangkoyang nu Yerusalem; mo'itom susumo kemah nu aha mian nu Kedar, panyo ma'ima' hondo susumo lalanse i laigan nu tomundo' Salomo!

NYANYIAN ANU TALASANGGO 1:8

Toho' mule' na beleyum monsumbu' tampatnyo, o anu handa anu aijo' hi aha to bou-boune? Batukimo na kalajangan nu gombuan nu domba, ka' olaya' na to memee' nu beleyum koko pinombauan kemah nu anu molaya'.

NYANYIAN ANU TALASANGGO 5:2

Aku i hoyotmo panyo kinyonyoangku madi' hoyot. Hongo pe'e, sindua'anku nongkutetekmo tumban. Tuhea'akonmo mae na tumban langkoyang sindua'anku, malapati'ku anu saja' o inau' nu kinyonyoangku; Ubaku nohomemo nu dondu'ok, bulu nu ubaku kahomo jinujuhan nu dondu'ok pihi-pihi.

NYANYIAN ANU TALASANGGO 8:13

O, anu jojoong i ale' to sanga-sangalu kahanda'mo mohongo potatae nu beleyum, pohongoakon mae na aijo' hi belengku!

YESAYA 51:3

O, Yerusalem, Aku mohase'mo beleyum, ka' iwi-iwi' na anu jojoong itampat nu belemiu anu ihansunmo. Sinin na padang tampat anu kinunmo, Kupotimbalimo taman, pokakana sumo Eden, taman-Ku anu molumba' Ikiijo' mian lame'mo ka' mule' bilahimo ka' lewa'mo manyanyi salaku bau pontalima kaseh.

YESAYA 6:5

Lantas aku notataemo, “Silakamo! Madi'mo daagi ko anu ku taha'imani kalana nganga'ku nahenyumo nu dosa' ka' aku jojoong hi aha bansa anu suele susumo aijo'mo. Maumo sumo aijo' posi matangkumo na nontoa Tomundo', aijo'mo Tumpu Anu Daka' na Kuasanyo!”

YESAYA 60:8

Te apaa na aijo' anu i lumahapmo susumo kundom susumo malapati' anu hau-haunyo lumahap mobalikmo?

YEREMIA 48:28

Belemiu anu jojoong i Moab, pala'imo na kota' nu belemiu iwi-iwi' ka' jojoongmo ipuge'nyo nu batu susumo tomonsi' malapati' anu mombaumo petanyo itungebe nu keles.

YEREMIA 49:16

Buulon nu beleyum ati-atina na nongakalimo beleyum. Madi'mo ko anu mongkabuhuk beleyum susumo sangka'an nu beleyum. Beleyum jinojoongmo i olo-olot nu batu, majo'on aita' mae ibawo nu bungkutnyo. Panyo maumo ahi' nu bau na laigan nu beleyum itampat anu matangkas hondo, sumo kotangkasnyo nu peta nu bonyia', nu tau'akonmo ahi' nu Tumpu lengkat mae atina'. Tumpu na nontaloakonmo iwi-iwi' aijo'.”

YEHEZKIEL 7:16

Sambagian na tumuu' ahi' ka' mopalaimo mamba ibungkutnyo. Ikiita' mae aha sumomo to tomo-tomonsi' dara anu ilaa'mo lengkat mae isongko-songko na bangka'nyo; iwi-iwi' mohehengakonmo dosa-dosa' nu aha.

DANIEL 9:7

O, Tumpu kaputusan nu belento saja' kona ka' adin, panyo kami saja' hondo mombau anu moko ambang hi posi butong mami, aijo'mo kami iwi-iwi' na mian anu sa'a-sa'angu' na bansa tiba kami anu binagi-bagimo nu belento iyaya na lipu' anu majo'on ka' anu ohani kalana aha madi' tulu-tulutan hi Belento.

OBAJA 1:3

Beleyum ingakalanmo nu kinyonyoa nu beleyum anu sombo-sombong atina'. Puso nu kota' nu beleyum atina' te bungkutnyo nu batu anu maharon; kajojoongan nu beleyum aita mae ibawo nu bongkutnyo anu matangkas. Kalana aijo' belemiu binapikinmo, Ihe na moko ala mompatundu' Aku?

MATIUS 10:16

“Palahatikan na aiya: Aku monsai komiu sumo domba anu madi' moko ala mokiijo' i totonga' nu pojek anu buhingison. Komiu tionyo balajaga-jaga sumo ulo ka' hodi' na kinyonyoa sumo tomonsi' malapati'.

MATIUS 3:16

Ilapas pinalamandikan, i Yesus lia-lia' nosabat lengkat mae i uee nu kaunyo aijo'. Madi' pinin langit tinabuka'mo ka' i Yesus nontoamo Roh nu Tumpu nintatau' sumo tomonsi' malapati' aita' i buan-Nyo.

EFESUS 5:27

Tiba jalan anu sumo aijo' i Kristus mompotinjomo jama'at aijo' talasanggo ka' Susi' i ahop-Nyo, madi' ko ideknyo kabai anu kulang mau mule' apaa.

KOLOSE 1:22

Panyo uuka aiya Anak-Nyo sinilakamo kalana Tumpu nombaumo da pompahasumbu'an miu tiba Ia timbali mompo'ule' ma'ima'. Tiba jalan aijo' komiu timbali oboa mangadap hi Tumpu i uno nu han anu susi', ma'ima' ka' madi' ko ide'nyo.

IBRANI 10:22

Kalana aijo', imbo' da kita mongohanimo Tumpu ka' kinyonyoanto hodi'mo ka' palesayamo totu-totu'u; ka' kinyonyoanto anu pinosusi'mo ka' madi'mo ko kasala'an o oa'i, ka' butongto pinobelesi'mo nu uee anu molino.

IBRANI 4:16

Kalana aijo' imbo' na kita babaani na mangadap hi Tumpu Allah anu ma'ima' hondo na mompalentah. Tumpu mongkalibosije kita ka' mombalakati kita da kita nu tulungi de tokamo na tempo'nyo anu tinantukanmo.

1 PETRUS 3:4

Panyo belemiu handa tionyo ahi' molengkat mae i uno nu kinyonyoa, kalakuan anu tobos ka' madi' solaa' hengge'; aijo' ahi' na handa anu sampe toka sidu-sidutu' ka' anu talalo ko angga'nyo i pontoan nu Tumpu.

YUDAS 1:24

Tumpu, na anu moko ala monjagai da komiu madi' manabu', ka' anu moko ala momboa komiu i ahop-Nyo anu talasanggo ka' mongoa'i lame' ka' madi' ko apa-apaa na anu sinala'.

ANU PINOTO'I HI YOHANES 5:8

Hau-haunyo Anak nu Domba aijo' nombaumo sumo aijo', opa-opat na malaikat ka' uampulu' ka' opat na to pola-polaya' haha aijo' dinumaladupumo i ahopnyo. Aha toto samian montoongi kasapi ka' mangko' mosoni' anu ko isinyo kamangian, aijo'mo iwi-iwi' na do'a nu mian anu pinalesayamo hi Tumpu.