NOSABATMO 32:30 - KITAB NU TUMPU ALLA LELE MA'IMAI'

³⁰ Dodododopnyo i Musa notataemo hi bansa aijo', “Belemiu nombaumo dosa' anu daka' hondo. Panyo uuka aiya aku po'ule'mo mindako i bungkutnyo aijo' mangadap hi Tumpu; o'amalakon mae da aku mohumpak ka'ampunan nu dosa' nu belemiu.”

NOSABATMO 32:30 ပူးပေါင်းရင်းမြစ်များ

2 SAMUEL 12:9

Kadaka' beleyum madi'mo nompajuli anu pinalentahkon-Kumo? Kadaka' beleyum nombaumo kalakuan anu ma'idek susumo aijo'? I Uria pinoki patean nu beleyum i uno nu pahampatean; pinobakasmo nu beleyum na ia da pinatean nu aha mian Amon, ka' mule' ingosoanmo nu beleyum na bengkele'nyo.

2 SAMUEL 16:12

Ihe na monsumbu' Tumpu montoakonmo mae kasansala'an anu ingoa'ankumo aiya ka' mombalakatimo mae aku salaku bau pombolosi mae totobi' anu binee'mo mae hi belengku.”

2 TOMU-TOMUNDO' 17:21

Salatan Tumpu nongga'atmo Israel da bolimo mosa'angu' tiba Yehuda, mian nu Israel nohangkatmo I Yerobeam anak i Nabot da timbalimo tomundo' nu aha. Lantas i Yerobeam nompalentahmo aha bolimo o palesaya na Tumpu ka' mombaumo iwi-iwi' na dosa' anu toto daka-daka'.

MAZMUR 99:6

I Musa tiba i Harun minsoopmo to ima-imam-Nyo, i Samuel sala'samian na anu binalado'amo hi Ia. Aha nonkakasemo hi Tumpu, ka' tinaaman-Nyomo mae.

NOSABATMO 32:29

Notatae na i Musa hi tulunan nu bansa Lewi, “Sinaa aiya belemiu nombee'mo butong nu belemiu da timbalimo samata-mata imam anu mombau apaa na anu nu palentahkon nu Tumpu kalana nompateimo to ana-anak ka' to utu-utus nu belemiu, sahingga Tumpu mombalakatimo belemiu.”

AMOS 5:15

Ka'ideki na anu ma'idek, ka'ima'i na anu ma'ima' ka' otoongi na ka'adinan. Ugaat Tumpu mongkalibosimo tuha'nyo nu to mia-mian bansa Israel.

YUNUS 3:9

Ihe na monsumbu' Tumpu mombabali'imo niat-Nyo ka' madi'mo daagi motambuha' sahingga kita madi'mo silaka!”

NOMBILANGMO 16:47

I Harun nombaumo apaa na anu pinoto'imo i Musa. Ia nopadeka'mo nokiijo' hi aha mian anu sinihukmo ka' nontampu'unimo kinona nu panyakit anu molele. Sahingga i Harun nonguna'imo kamangian aijo' i oba nu apu ka' nombaumo atulannyo da bau pongampuni dosa' nu aha mian.

NOMBILANGMO 25:13

Ia ka' lee'nyo Ku potataapmo salaku imam sampe toka sidu-sidutu', kalana ia jinunjuhi'mo na nontinjohakon Aku, Tumpu Allah-Nyo, ka' nombaumo paladamean da madi'mo baladosa' na aha mian nu Israel.”

LUKAS 15:18

Aku molengkatmo ka' mamba hi tuumangku, ka' motatae hi ia: Papa, aku binala dosa'mo i ahop nu Tumpu ka' i ahop nu kita tuumangku.

LUKAS 7:47

Totu'u: Liibosnyo anu tahahumo sumo aijo' momponyata'mo saba' dosa'nyo anu manjoo' ingampunanmo! De mian o ampuni sangkiding, ia suele mongampuni sangkiding.”

ROMA 9:3

kalana to Utu-utusku anu sa'a-sa'angu' na bansa tiba aku. Kalana monginau' aha, aku sanaang na nukutuki nu Tumpu ka' oga'atakon hi Kristus.

GALATIA 3:13

Panyo i Kristus nompobebasmo kita da boli nu kona nu kutuk ola kalana atulan nu agama. Ia nombau han aijo' nompopilayamo butong-Nyo kinutukan kalana monginau' kita. Kalana i uno nu Kitab nu Tumpu tinulismo, “Kinutukanmo na mian anu sinilakamo pinokalayo' i ohi' kau'.”

2 TIMOTIUS 2:25

Ia madi' ko sega-sega na mongajan mian anu ka'oho' monggagakon; o'amalakon da Tumpu mombee'i kasampatan hi mian haha aijo' da balatobat mombabali'i dosa-dosa' nu aha, ka' monsumbu' pangajalan anu totu'u.

YAKOBUS 5:16

Kalana aijo', tionyo ahi' komiu mompaha aku-akui kasala'an ka' mompaha do'a-do'akon, da komiu opa'alin. Do'a nu anu montuluti pongka'oho' nu Tumpu, ko kuasanyo Anu Matangkas.

1 SAMUEL 12:17

Kupoitakonje hi Tumpu sahingga maumo uuka tempo'mo nu posinaa, nu tudunakonje nu Tumpu na gohung tiba ujan salaku bau pontaami-Nyo do'angku. Tokaje na tempo'nyo aijo' belemiu sinsumbu'je mosia na kodaka'nyo na dosa' nu belemiu hi Tumpu kalana nompoitamo samian na tomundo.”

1 SAMUEL 12:19

Lantas notataemo na aha hi Samuel, “Tulungi mae kita Tuuma, do'akon mae na kami aiya hi Tumpu Allah nu belento da kami madi' silaka. Uuka aiya sinumbu'mo mami taalu' kami po'ule'mo nombau dosa susumo dosa' mami naipuan mae kalana nompoitamo samian na tomundo'.”

1 SAMUEL 12:20

I Samuel po'ule'mo nontaami, “Boli mabuhuk maumo belemiu nombaumo kalakuan anu ma'idek aijo', boli okolilimi na Tumpu, panyo ola ahi sabole-bole otuluti na Ia totu-totu'u nu kinyonyoa miu.

1 SAMUEL 12:23

Mongkona butongku ku amalakon da aku boli sampe baladosa' hi Tumpu kalana madi' mondo'akon belemiu, panyo ola ahi' aku suele saja' sabole-bole mombee'i pokinde' hahan anu ma'ima' ka' anu totu'u.

1 SAMUEL 2:17

Sumo aijo'mo na anak i Eli ua-ua aha aijo' binaladosa'mo hondo imata nu Tumpu, kalana aha madi'mo nongangga'i koloban anu sinombahkonmo hi Tumpu.