NOSABATMO 3:22 - KITAB NU TUMPU ALLA LELE MA'IMAI'

²² Batu-batu boune nu Israel momoita hi anu mompaha ohani laigan mian nu Mesir ka' hi boune mian nu Mesir anu jojoong hingga-hinggat sa'angu' na laigan; baju' ka' mainan salaka, ka' mosoni'. Opopake miu na aijo' hi to ana-anak nu belemiu, tiba jalan sumo aijo' belemiu mompahuhuimo mian nu Mesir.”

NOSABATMO 3:22 ပူးပေါင်းရင်းမြစ်များ

KAJADIAN 15:14

Panyo bansa anu mombotuani lee' nu beleyum aijo' Ku hukum, ka' salatan lee' nu beleyum mompala'imo lipu' aijo' aha momboamo manjoo' na halata'.

KAJADIAN 24:53

Lantas ingalanyomo na baju', mainan salaka ka' mosoni', ka' binee'nyomo iwi-iwi' aijo' hi Ribka. Suele utusnyo tu'a ka' tinanyo binee'annyomo palasen anu toto maha-mahan.

MAZMUR 105:37

Lapas aijo' bansa Israel sinabatakon-Nyomo ka' binoa-Nyomo aha nomboa mosoni' ka' salaka; iwi-iwi' na aha mahoson ka' madi' ko anu masakit.

NOSABATMO 11:2

Kalana aijo' basale'mo tiba bansa Israel; pokau na aha momoita mainan mosoni' ka' salaka hi anu mompaha ohani laigan nu aha.”

AMSAL 13:22

Mian anu manonong mombee' kakaya'annyo hi to maku-makumpunyo, panyo kakaya'an nu mian anu baladosa' opo una'mo hi mian anu hodi' na kinyonyoanyo.

YESAYA 33:1

Silakamo na to sampo-sampobali'to! Aha mompahuhuakon maumo aha madi' opa huhuakon, ka' mombau palabuatan ma'idek maumo madi' obau apa-apaa na anu ma'idek hi aha. Panyo salatan moko pahuhuakonmo ka' mombaumo palabuatan anu ma'idek aha mule' ahi silakamo kalana sola' mompahuhuakon ka' mombau palabuatan anu ma'idek.

YEHEZKIEL 39:10

Jadi aha madi'mo daagi'mo mongala kau' anu oposun i ale' kalana sinin na toongon anu pinala'ianmo aijo' sukupmo na oposun. Aha montololangimo ka' mongagoimo halata' nu to mia-mian anu nontololangimo ka' nongagoimo halata' nu aha. Aku, Tumpu Anu Matangkas na Kuasanyo notataemo.”