NOSABATMO 3:2 - KITAB NU TUMPU ALLA LELE MA'IMAI'

² Ikiijo' mae malaekat nu Tumpu nanintoamo hi ia i moak nu apu anu noakmo mae i totonga' nu hemput. I Musa nontoa hemput aijo' noakmo, panyo madi' motoyo'.

NOSABATMO 3:2 ပူးပေါင်းရင်းမြစ်များ

KAJADIAN 21:17

Tumpu Allah nohongomo potatae i Ismael, ka' lengkat mae aita' i langit Tumpu Allah notataemo hi Hagar, Ia notatae, “Apaa na nu susa' akon Hagar? Boli mabuhuk. Tumpu Allah nohongomo potatae nu anak nu beleyum.

KAJADIAN 22:11

Panyo malaekat nu Tumpu notatae daka-daka' hi ia, lengkat mae i langit, “Abraham, Abraham!” Tinaaman i Abraham, “Apaa, Tumpu!”

KAJADIAN 48:16

Iamo na malaekat anu nonjagaimo mae aku sahingga iwi-iwi' na balaa' madi'mo mompoposia. O'amalakon da Tumpu Allah mombalakati anak haha aiya. O'amalakon da saja' osanggo na sanggongku ka' sanggo i Abraham ka' i Ishak kalana anak haha aiya! O'amalakon da aha mohumpak makumpu, ka' ko lee' manjoo' i dunia aiya.”

MAZMUR 66:12

Pinojohokmo nu Belento na kami da pinahampeja'akonmo nu anu monsampobali' mae kami; kami so'mo nontului iyaba' ka' apu. Panyo uuka aiya kami binoamo mae nu Belento i tampat anu manjoo' hondo na hasinnyo ohumpak i kiijo'.

NOSABATMO 19:18

Songko-songko na Bungkutnyo nu Sinai sinaputmo nu tibuk, kalana Tumpu nintatau'mo aita' i uno nu apu. Tibuk aijo' kino puha-puhamo susumo tibuk i tampat anu pinapuanmo, ka' songko-songko na bungkutnyo ginayu'anmo hondo-hondo.

NOSABATMO 23:20

“Ku saije da mamba momona na malaekat-Ku, lantas belemiuje da monjagai belemiu lumajang ka' momboa belemiu i tampat anu pinosadiang-Kumo.

NOSABATMO 3:16

Lako'mo ka' limu'mo iwi-iwi' na to pola-polaya' nu Israel. Poto'i hi aha taalu' Aku, Tumpu, Tumpu Allah nu mompolee' nu aha Tumpu Allah i Abraham, i Ishak ka' i Yakub, nanintoamo hi beleyum. Poto'imo hi aha taalu' Aku tinokamo hi aha ka' nontoamo mosia na aha okabisa'i nu bansa Mesir.

YESAYA 43:2

De beleyum motapmo i uee, Aku na monsangalui beleyum, beleyum madi' mule' molomos i uno nu kasansala'an-kasansala'an nu beleyum. De motulu i apu, beleyum madi' mule' motoyo', palasoba'an anu toto daka-daka' madi' mule' monsilakai beleyum.

YESAYA 63:9

Iamo ahi' na kinona nu kasusa'an nu aha, Tumpu madi' nonsai mian kabai anu mombolosakon, posi Iamo ahi' na nompobebas aha kalana liibos ka' kalibosan-Nyo. Ia saja' ahi' monjagai aha daagi' pe'e naipuan mae.

DANIEL 3:27

Iwi-iwi' na wakin i tomundo', to gubernur-gubernur, bupati ka' mule' to paga-pagawenyo sangga'at nontikubimo mae aha totototolu' na mian haha aijo' ka' nontoamo saba' aha totototolu' aijo madi' ahi kinona nu apu. Hambahan nu ubak nu aha madi' ahi' nopapu, ka' baju' nu aha madi' ahi' suele notoyo' nu apu, ka' busik nu tibuk pe'e madi' ahi' ko anu ingook hi aha.

ZAKHARIA 13:7

Tumpu Anu Daka' na kuasanyo notatae, “Tinjomo mae o, bajak ka' tumbuhimo na polaya' potuu'on anu mokalaja hi beleng-Ku! Pateimo na Ia sahingga to domba-domba mosungke-sungkehetmo. Kutumbuhimo na mian anu palesayamo hi beleng-Ku,

MALEAKHI 3:1

Tinaaman nu Tumpu Anu Daka' na Kuasanyo, “Ku saimo na anu Ku utus da momposadia jalan anu bau kajalanan-Ku. Sahingga monti-montiik Aku, Tumpu anu olio-lio nu belemiu tokamo i uno nu Laigan-Ku. Anu Ku utus o'i-o'indi nu belemiu aijo' tokamo mae lantas mombebakonmo palajanjian-Ku.”

MARKUS 12:26

Ka' mongkona mian silaka po'ule' opotumuu', pa' ma'isa toho' nombasa' i uno nu kitab i Musa mongkona kumbung anu i noak aijo'? I uno nu to ayat-ayat aijo' tinulis saba' Tumpu notatae hi Musa, ‘Akumo na Tumpu i Abraham, Tumpu i Ishak, ka' Tumpu i Yakub.’

LUKAS 20:37

Posi i Musa nomponyata'mo mana-manasa mian mate po'ule' opotumuu'. I uno nu tulisannyo mongkona kumbung anu i noak aijo', ia nonsanggo Tumpu, sumo, ‘Tumpu i Abraham, Tumpu i Ishak, ka' Tumpu i Yakub.’

YOHANES 1:14

Potatae nu Tumpu tinimbalimo mian, Ia jinojoongmo aiya hi kita, ka' kita nontoamo katalasanggoan-Nyo. Katalasanggoan-Nyo tinalimanyomo salaku anak sa'a-sa'angu'nyo nu Tuuma. Kalana Ia, sahingga kita nontoamo Tumpu ka' kalibosan-Nyo hi kita.

ROMA 8:3

Apaa na anu madi' opoko bau nu atulan nu agama, kalana kita mian madi' moko ala mombau, aijo' binaumo nu Tumpu. Tumpu nohungku'imo kuasa nu dosa' anu i uno nu sipat nu mian, aijo'mo nonsai posi Anak-Nyo na tinoka nimbalu-balu sumo mian anu baladosa' da mongalini dosa'.

PO'ULE' INGULIT 33:16

O'amalakon da tano'nyo nupobuke'i nu anu toto ima-ima' hondo, ka' kalana manonong na Tumpu sahingga nohumpak balakat anu notatae aijo' mae i hemput anu i noakmo. O'amalakon da balakat aijo' tudun mae kona hi tulunan i Yusuf, kalana iamo na polaya' nu to utu-utusnyo.

PO'ULE' INGULIT 4:20

Panyo belemiu bansa anu pinosalamat-Nyomo lengkat mae i Mesir, tampat belemiu nongoa'i sansala anu taha-tahahumo. Belemiu binoa-Nyomo mae nosabat lengkat i lipu' aijo' da timbalimo bansa-Nyo susumo balu-balu'nyo belemiu uuka aiya.

2 TESALONIKA 1:7

Ka' hi komiu anu uuka aiya nongoa'imo kasansala'an – sumo aitu mule' hi kami – Tumpu mombee'je kasanangan de Sinaanyomo nu Tumpu Yesus minsusule'mo mae lengkat i suluga' ka' mompotoamo butong-Nyo tiba to mala-malaikat-Nyo anu to babaani

TO MIA-MIAN KOPIAN 13:13

Malaekat nu Tumpu aijo' nontaami, “Bengkele' nu beleyum madi' timbali monginum anggur kabai anu moko palangu, ka' mule' madi' timbali mongkaan apa-apaa na anu molengkat mae i kau' anggur kabai apa-apaa na anu madi' toho' okaan. Ia tionyo ahi' mombau iwi-iwi' apaa na anu pinoto'ingkumo hi ia ka' obala'ingati da madi' ko anu madi' obau.”