NOSABATMO 12:22 - KITAB NU TUMPU ALLA LELE MA'IMAI'

²² Ala na hemput anu batangnyo ko honnyo die' ka' opuuti olobongakon i mangko' anu ko isinyo baso' nu domba aijo' lantas osapuakon i ohi' ohu-ohua' aijo' i sabatan ka' aita' i buannyo nu sabatan aijo' i laigan nu belemiu. Sampe toka dodop daagi' subu madi' timbali ko samian anu atina' hi belemiu mompala'i laigannyo.

NOSABATMO 12:22 ပူးပေါင်းရင်းမြစ်များ

IBRANI 11:28

Kalana bala'iman, sahingga i Musa nombaumo Paskah ka' nompalentahkonmo da baso'nyo opipi'akon i tumban nu laigan nu aha mian nu Israel da Malaekat anu Monsilakai boli mompatei to ana-anak tumpe nu aha.

MAZMUR 51:7

Memang, ma'idek na kinyonyoangku salatanmo pe'e aku pinohampe, ka' binaladosa'mo salatanmo pe'e i uno nu ma'alum.

NOMBILANGMO 19:18

Han anu momona aijo'mo de daagi' ko mian anu silaka i uno nu kemah, mian anu madi' mahumimi' tionyo ahi' mongala sampanga' na hisop ka' olobongakon i uee aijo', lantas opipi'akon i kemah ka' iwi-iwi' na apaa anu daagi' kiijo' i unonyo, ka' suele to mia-mian anu ikiijo'. Han anu ko ohua'nyo aijo'mo de ihehe na mian anu monsala' kanyangmo anu sinilakamo, kubulan kabai buku nu mian anu sinilakamo, mian anu madi' mahumimi' na tionyo ahi' mompipi'i mian anu nahumimi'mo aijo', tiba jalan suele sumo aijo'.

IBRANI 9:19

Momonanyo i Musa nompoto'i iwi-iwi' na palentah atulan nu Tumpu hi bansa Israel. Lapas aijo' i Musa nongalamo baso' nu anak nu sapi' ka' baso' nu mee' mo'anenyo, lantas ginalo'annyomo nu uee, lapas aijo' pinipi'akonnyomo i Kitab nu Atulan anu lengkat mae hi Tumpu ka' hi iwi-iwi' na bansa Israel mompake hemput hisop ka' bulu nu domba buhitnyo momea' hondo na bau pompipi'akon.

IBRANI 9:1

Palajanjian anu momona, daagi' ko to atu-atulannyo na monsombah Tumpu ka' daagi' suele ko tampat ponsomban anu binau nu mian.

NOSABATMO 12:7

Baso'yo sangkiding tionyo ahi osapuakon i ohu-ohua' na ohi' nu sabatan, ka' aita' i buannyo nu sabatan nu laigan anu pongkaanan nu aha.

IBRANI 9:14

Yo, de baso' tiba abu'nyo aijo' moko ala mompobelesi kahenyuan nu to mia-mian, apaa mule' baso' i Kristus. Kalana kuasa nu Roh anu sampe toka sidu-sidutu', i Kristus nonsombahkonmo posi butong-Nyo hi Tumpu salaku koloban anu ma'ima'. Baso'-Nyo mompobelesi kinyonyoanto da bolimo mombau atulan nu agama anu madi' kogunanyo, da kita timbali mombau palentah nu Tumpu anu tumuu'.

IBRANI 12:24

Komiu tokamo mangadap hi Yesus anu Nonjambatanimo da montalimamo palajanjian anu sala'je aijo'; komiu mangadapmo i baso' anu pinipi'akonmo, anu mompokopianimo hahan da lebe ma'ima' molingkuduimo anu pinokopiananmo nu baso' i Habel aijo'.

MATIUS 26:30

Lapas aitu, aha nonyanyiakon sa'angu' na nyanyian mompuji'. Ka' lapas aitu, aha nambamo i Bungkutnyo nu Zaitun.

YESAYA 26:20

Pinsoopmo i uno nu laigan nu beleyum, o, belemiu bansangku, lantas tumbanmo mae na sabatan. Paninsulukmo mau ola sasaingoni' sampe Tumpu madi'mo motambuha'.

YOSUA 2:19

De sala'samian anu aijo' hi aha mosabat i laigan aiya ka' opatei, ia i nate aijo' kalana posi sala'nyo; han aijo' misa' ponsumbu'an mami. Kami madi' montanggung kasala'annyo. Panyo de daagi' ko anu silaka i laigan aiya ponsumbu'anmo mami na montanggung kasala'annyo.