NOMBILANGMO 4:15 - KITAB NU TUMPU ALLA LELE MA'IMAI'

^15-20 Tumpu notataemo hi Musa ka' hi Harun, “De belemiu montatakimo kemah, i Harun ka' to ana-anaknyo tionyo ahi' minsoopmo i uno nu Kemah-Ku, ka' mongkukubi iwi-iwi' pakakas ka' talakonannyo anu ikiijo'. Lapasje na aijo', to mia-mian nu Kehat timbalije toka da monsimbumo. Panyo aha madi' timbali montoa, mongohani, kabai monsala' kanyang balang haha aijo', kalana binee'mo na aijo' samata-mata hi beleng-Ku. De aha sabole-bole ahi' mombau, aha matemo. Jadi da to mia-mian nu aha Kehat aijo' boli molapus i tulunan nu bansa Lewi, i Harun ka' to ana-anaknyo tionyo ahi' mombee'i kalaja toto samian hi aha apaa na anu tionyo ahi' nuboa nu aha. Aijo'mo na pakalaja'an nu aha mian Kehat, de Kemah-Ku olalinmo. I Eleazar, anak i Harun na mongkalesang iwi-iwi' i Kemah-Ku, lanya' nu sulu', kamangian, gandum anu okolobanakon bau, koloban kaanon, lanya' anu opake monsombah ka' iwi-iwi' na anu i uno nu Kemah-Ku aijo'.”

NOMBILANGMO 4:15 ပူးပေါင်းရင်းမြစ်များ

2 SAMUEL 15:24

I Imam Zadok tiba i Imam Abyatar suele batu-batuk tiba aha mian nu Lewi anu momboa Peti' Palajanjian nu Tumpu. Peti' Palajanjian nu Tumpu aijo' daagi koko-koko, ka' ma'isa timbali ohangkat de ma'isa pe'e mian da'isan iwi-iwi' mompala'imo kota aijo'.

2 SAMUEL 6:13

Salatan anu nohangkat Peti' Palajanjian aijo' ilumajangmo salaje' anolangkas pinoto'imo i Daud da bolimo pe'e lumajang. Lantas ia nonsombahkonmo koloban hi Tumpu, te sapi' lakinyo ka' anak nu sapi' anu pinilompo'anmo.

1 TOMU-TOMUNDO' 8:3

Salatan to kapa-kapala sinihukmo iwi-iwi', to ima-imam nohangkatmo Peti' Palajanjian aijo'

1 TAWARIKH 15:15

Ka' salatan Peti' aijo' i lalinmo, i hangkatmo nu aha ka' sinimbumo nu aha i kau' anu pinotoukamo susumo koonyo nu atulan anu binee'mo nu Tumpu hi Musa.

1 TAWARIKH 15:2

I Daud notatae “Ola mian nu Lewi na timbali mohangkat Peti' Palajanjian nu Tumpu, kalana ahamo na anu pinile'an nu Tumpu monsimbu Peti' aijo' ka' mongkalesang sampe toka sidu-sidutu'.”

1 TAWARIKH 23:26

Kalana aitu, Kemah nu Tumpu ka' iwi-iwi' na pakakas anu opake de monsombahmo Tumpu madi'mo palalu lewa' nu simbu nu mian Lewi.”

NOSABATMO 19:12

Bau tanda titikub i bungkutnyo aiya bau potempasan anu madi' timbali so' olanggai nu bansa aijo'. Tewa' na bansa aijo' mindako i bungkutnyo ka' mongohani. Ihe na so' moliu-liu' tempas aijo', o hukum mate;

NOSABATMO 19:21

ka' Tumpu notataemo hi ia, “Pintatau'mo ka' poto'i hi mian haha aijo' taalu' aha madi' timbali so' molanggai tempas de mamba mae montoa Aku. De aha sabole-bole molanggai, manjoo' na aha anu mate.

NOSABATMO 27:7

ka' oposoop i pasinsingnyo poti-potimbiha' aijo' i mezbah de molembanmo mezbah aijo'.

IMAMAT 16:13

Kamangian aijo' tionyo ahi' opapui i ahop nu Peti' Palajanjian aijo', sahingga tibuknyo monsapumo kolop nu Peti' aijo' ka' i Harun madi'mo moko ala montoa kalana de ia montoa ia matemo.

NOMBILANGMO 1:50

Pokau na aha mongkalesang Kemah-Ku, tiba posadiaonnyo iwi-iwi'. Kalaja nu aha aijo'mo molemban Kemah-Ku tiba posadiaonnyo ka' mongkalesang. Aha tionyo ahi' mompotinjo kemah kajojoongan nu aha montikubi Kemah-Ku.

NOMBILANGMO 1:51

De belemiu molalinmo, mian nu Lewi haha aijo' na tionyo ahi' montataki Kemah-Ku lantas po'ule' mule' mompotinjo i tampat sangga'at anu pombauan mule' kemah kajojoongan nu belemiu. Ola aha Lewi na mongohani Kemah-Ku aijo' lantas ihe na mongohani Kemah-Ku aijo' o hukum mate.

NOMBILANGMO 10:21

Lapas aijo' nambamo na aha mian nu Kehat anu nomboa to paka-pakakas anu susi'. De aha tokamo i tampat pompotinjoan kemah anu po'ule' mule' opotinjo, Kemah nu Tumpu opotinjomo mule'.

NOMBILANGMO 18:3

Tulunan nu bansa Lewi tionyo ahi' mombau pakalaja'an nu aha apaa na anu opalentahkon nu belemiu ka' mombau pakalaja'an nu aha i Kemah-Ku, panyo aha madi' timbali mongohani mezbah kabai monsala' kanyang balang haha aijo' anu susi' i Salipi' anu Susi'. De aha molanggai atulan aijo', maumo aha kabai belemiu tionyo ahi' mate.

NOMBILANGMO 3:38

Pombauan kemah, i Musa ka' i Harun ka' to ana-anaknyo tionyo ahi' mongala tampat i ahop nu Kemah nu Tumpu sasu kabete'an. Aha na mongkalesang Salipi' anu Susi' ka' atulan nu aha bansa Israel de monsombahmo Tumpu. De misa' aha maumo pa' ihe na monsoba mombau pakalaja'an aijo' tionyo o hukum mate.

NOMBILANGMO 4:14

Ka' aita' i bawonyo aijo' nu paha potimpasmo nu aha iwi-iwi' na pakakasnyo anu opake monsombah i mezbah aijo': pomposulian apu, sobang, ponsangku' ka' pongisian uee. Lantas tionyo ahi' nukukubi nu aha iwi-iwi' aijo' nu kilit anu ma'ima' hondo santake ka' opokonamo na kau' polembanan.

NOMBILANGMO 7:9

Panyo aha mian nu Kehat madi' nohumpak kaleta kabai sapi' hi Musa, kalana to bala-balang anu susi', ahamo na binee'an pakalaja'an, ka' tionyo ahi' nu lemban nu aha.

PO'ULE' INGULIT 31:9

Lantas i Musa nontulismo atulan nu Tumpu Allah ka' binee'nyomo hi to ima-imam nu aha Lewi anu binee'anmo kalaja da mongka'lesang Peti' Palajanjian, ka' hi to pola-polaya' nu aha Israel.

YOSUA 4:10

To ima-imam haha aijo' tataap satinjonyo i totonga' nu Yordan sampe mian haha aijo' noko baumo iwi-iwi' anu pinalentahkonmo nu Tumpu hi aha susumo anu pinoto'i-Nyomo hi Yosua. Aijo' pokakana sumo anu pinotiju'mo i Musa hi Yosua. Lantas sampamo na aha mian nu Israel notaap i Kaunyo nu Yordan.

1 SAMUEL 6:19

Panyo kalana aha mian nu Bet-Semes haha aijo' nontoamo apaa na anu i unonu Peti' Palajanjian nu Tumpu, aha pitumpulu' na mian pinateanmo nu Tumpu. Sahingga mian da'isan nohangimo ka' sinusa'mo kalana Tumpu nompotokamo hi aha balaa' anu daka' hondo aijo'.