NOMBILANGMO 3:40 - KITAB NU TUMPU ALLA LELE MA'IMAI'

^40-41 Tumpu notataemo hi Musa, “Anak tumpe mo'ane iwi-iwi' hi aha bansa Israel Akumo na tumpu-Nyo. Tulismo na sanggo nu aha iwi-iwi' anu umunnyo molabimo sa'angu' na bitu'on mokiita. Panyo salaku bau pombolosi aha, Kupoto'i saba iwi-iwi' na mian nu aha Lewi Akumo na tumpunyo. Akumo na Tumpu! Ka' potu'on nu aha mian Lewi suele Kupoto'i baumo pombolosi iwi-iwi' na binatang anu momona opo anak hi aha bansa Israel.”

NOMBILANGMO 3:40 ပူးပေါင်းရင်းမြစ်များ

MAZMUR 87:6

Tumpu momposoopmo iwi-iwi' na bansa i daputan nu to mia-mian anu jojoong i Yerusalem.

YESAYA 4:3

Batu-batu mian anu daagi' tinasisa i Yerusalem, ka' mule' aha to mia-mian anu pinile'anmo nu Tumpu da oposalamat, osanggohimo sinusi'mo.

NOMBILANGMO 3:12

“Uuka aiya to mia-mian nu aha Lewi Ku pile'imo Akumo na tumpunyo. Tempo'nyo Aku nompateimo anak tumpe iwi-iwi' hi bansa Mesir, ingalang-Kumo bau samata-mata baging-Ku na anak tumpe mo'ane iwi-iwi' hi aha mian Israel ka' iwi-iwi' na potuu'on nu aha anu momona inganakakon. Iwi-iwi' aijo' Akumo na tumpunyo. Salaku bau pombolosi to ana-anak tumpenyo mo'ane hi aha mian Israel, Aku nongalamo mian nu aha Lewi timbalimo anung-Ku, aha Akumo na tumpunyo. Aku na Tumpu.”

NOMBILANGMO 3:15

mombau daputan nu to mia-mian aha Lewi o ala i tulunannyo ka' aha sa'anakan toto samian; batu-batu anak mo'ane anu umunnyo molabimo sambitu'on mokita' tionyo ahi' otulismo na sanggonyo.

NOMBILANGMO 3:45

“Padonakonmo samata-mata na aha mian Lewi hi beleng-Ku salaku bau pombolosi iwi-iwi' na anak tumpe mo'ane anu hi aha Israel; ka' suele potuu'on nu aha mian Lewi salaku pombolosi potuu'on nu aha mian Israel.

LUKAS 10:20

Mau mule' sumo aijo', boli bilahi kalana to roh-roh ma'idek mohongo-hongomo komiu. Sahanyo komiu bilahi kalana sanggoum tinulismo i suluga'.”

FILIPI 4:3

Toka hi sangalungku anu momo' hongo-hongo ku poita suele da kita Utus montulungi ua'-ua'aha na boune aijo'. Aha nokalajamo totu-totu'u tiba aku, nombebakon Lele Ma'ima' anu lengkat mae hi Tumpu; pokakana sumo i Kelemen ka' iwi-iwi' mian sangga'atan anu nokalajamo hingga-hinggat tiba aku. Sanggo nu aha haha aijo' daagi'mo i uno nu Kitab nu Mian Tumuu'.

2 TIMOTIUS 2:19

Panyo usoi anu mahoson binau nu Tumpu madi' opoko ala o idei. I buannyo tinulismo sumo uuka, “Tumpu monsumbu' to mia-mian-Nyo”, ka' “Mian anu motatae tukoonyo ia anumo nu Tumpu, mian aijo' tionyo montibahakonmo mombau palabuatan anu sala'.”

IBRANI 12:23

Komiu mongatuhimo tampat kasingkabotan anu lame' hondo – kasingkabotan nu to ana-anak tumpe nu Tumpu, anu tinulismo na sanggonyo i uno nu kitab kiita' i suluga'. Komiu tokamo mangadap hi Tumpu, Mian Kopian nu mian iwi-iwi'. Komiu mongahopimo to roh-roh nu to mia-mian ma'ima', anu pinotimbalimo da na'ima'mo.

ANU PINOTO'I HI YOHANES 14:4

Aha aijo' to mia-mian anu saja' belesi' sumo langkoyang anu tumimpasje, kalana ma'isa toho' noduhus tiba boune. Aha mombatuki Anak nu Domba mau mule' pa' moya na Ia mamba. Iwi-iwi' na mian, olamo aha na anu pinobebas salaku anu sinombahkonmo momonanyo hi Tumpu ka' hi Anak nu Domba.

ANU PINOTO'I HI YOHANES 3:5

Hi aha anu inguntungmo i uno nu kasabalan opopakeje na juba' mopute'. Sanggo nu aha madi'mo ohapus i Kitab nu Mian Tumuu'. Ka' i ahop nu Tuumang-Ku ka' to mala-malaikat-Nyo Ku Akuije na aha atina', Akumo na tumpu-Nyo.