NOMBILANGMO 18:7 - KITAB NU TUMPU ALLA LELE MA'IMAI'

⁷ Panyo ola beleyum tiba to ana-anak nu beleyum na timbali mombau pakalaja'an salaku imam, i pakalaja'an iwi-iwi' anu ko tuusanannyo tiba mezbah ka' apaa na anu kiijo' i Salipi' anu Susi' hondo. Aijo' na anu tionyo ahi' nu bau, kalana Aku nombee'imo belemiu pangkat salaku imam. Batu-batu mian anu madi' ko hak aijo' o hukum mate de mongohanimo balang haha aijo' anu susi' hondo aijo'.”

NOMBILANGMO 18:7 ပူးပေါင်းရင်းမြစ်များ

MAZMUR 115:10

O to ima-imam, Tumpu na sabole-boleh otaha'imani Iamo na nontulungi ka' nonjagai belemiu.

NOSABATMO 28:1

“Laga na i Harun utus tu'a nu beleyum tiba to ana-anaknyo i Nadab, i Abihu, i Eleazar ka' i Itamar, ka' poto'i hi aha da aha mokalaja samata-mata montuluti anu Ku atun salaku imam.

NOSABATMO 29:9

lantas posongko'mo na suluban hi ubak nu aha. Sumo aijo' na bau-baunyo mombalakati i Harun ka' to ana-anaknyo. Aha ka' lee' nu aha tionyo ahi' mombau apaa na anu Ku palentahkon hi aha salaku imam sampe toka sidu-sidutu'.

YEHEZKIEL 44:15

Tumpu Anu Matangkas na Kuasanyo notatae, “Tempo'nyo bansang Israel nohikumo mae Aku, aha to ima-imam Lewi anu lee' mae i Zadok na tinataap ahi' nontuluti apaa na anu pinalentahkon-Ku okalaja i Laigan-Ku. Kalana aijo' aha ahi' na tionyo mombau anu Ku palentahkon ka' toka mae i ahop-Ku monsombahkon lompo'nyo tiba baso' nu sinin na koloban.

YEHEZKIEL 44:16

Ola aha na timbali minsoop i uno nu Laigan-Ku mombau anu Ku palentahkon okalaja kiijo' i mezbah-Ku ka' mompimpin anu monsombah mae i Laigan-Ku.

YEHEZKIEL 44:8

Misa'mo posi aha na mokalaja pakalaja'an anu susi' iuno nu Laigan-Ku, panyo mianmo anu isalipu'an mae na nu pokalaja nu aha mombau palakaja'an aijo'.

IMAMAT 16:2

Ia notatae, “Sisikakon hi utus nu beleyum i Harun, saba' ola ahi' tempo' anu tinantukanmo na ia timbali minsoop i Salipi' anu Susi' hondo anu nu oloti nu lalanse', kalana ikiijo' na Aku nanintoa i uno nu kundom i kolop nu Peti' Palajanjian. De i Harun molanggai palentah aijo' ia matemo.

IMAMAT 7:35

Kaanon anu sinombahkonmo hi Tumpu, aijo' na bahagian anu obee' hi Harun ka' hi to ana-anaknyo i sinaa aha binalakatanmo timbali imam.

NOMBILANGMO 1:51

De belemiu molalinmo, mian nu Lewi haha aijo' na tionyo ahi' montataki Kemah-Ku lantas po'ule' mule' mompotinjo i tampat sangga'at anu pombauan mule' kemah kajojoongan nu belemiu. Ola aha Lewi na mongohani Kemah-Ku aijo' lantas ihe na mongohani Kemah-Ku aijo' o hukum mate.

NOMBILANGMO 16:40

Aijo' baumo pompo'ingat bansa Israel saba' de misa' lee' i Harun madi' timbali ko samian pe'e toka i mezbah da mompapu kamangian ka' osombahkon hi Tumpu. Mian anu molanggai atulan aijo' opateimo susumo i Korah tiba anu monsangaja'imo ia. Iwi-iwi' aijo' binaumo susumo anu pinalentahkonmo nu Tumpu hi Musa ka' pinoto'inyomo hi Eleazar.

NOMBILANGMO 18:20

Tumpu po'ule mule notatae hi Harun, “Belemiu madi' mohumpak pombahagian apa-apaa. I lipu' anu jinanji'-Kumo aijo' madi' ko tano' anu timbali bau bagi nu belemiu. Aku, Tumpu, na baumo bagi nu belemiu.”

NOMBILANGMO 18:3

Tulunan nu bansa Lewi tionyo ahi' mombau pakalaja'an nu aha apaa na anu opalentahkon nu belemiu ka' mombau pakalaja'an nu aha i Kemah-Ku, panyo aha madi' timbali mongohani mezbah kabai monsala' kanyang balang haha aijo' anu susi' i Salipi' anu Susi'. De aha molanggai atulan aijo', maumo aha kabai belemiu tionyo ahi' mate.

NOMBILANGMO 3:10

Panyo i Harun ka' to ana-anaknyo tionyo ahi' nu hangkat da mokalaja salaku imam; de misa' aha, maumo pa' ihe na anu monsoba mokalaja aijo' tionyo ahi' o hukumo mate.”

NOMBILANGMO 3:38

Pombauan kemah, i Musa ka' i Harun ka' to ana-anaknyo tionyo ahi' mongala tampat i ahop nu Kemah nu Tumpu sasu kabete'an. Aha na mongkalesang Salipi' anu Susi' ka' atulan nu aha bansa Israel de monsombahmo Tumpu. De misa' aha maumo pa' ihe na monsoba mombau pakalaja'an aijo' tionyo o hukum mate.

MATIUS 10:8

Opa'alin na to mia-mian anu masakit; opo tumuu' na to mia-mian anu sinilakamo; opa'alin na to mia-mian anu ko panyakit kilit anu okabuhuk, ka' olaa' na to roh-roh ma'idek. Komiu nontalimamo iwi-iwi' aijo' ola ihalala akon. Jadi, mombee'i suele ola ohalala akon.

YOHANES 3:27

I Yohanes nontaami, “Mian madi' moko ala montumpui apa-apaa, de madi' nubee' nu Tumpu hi ia.

EFESUS 3:8

Iwi-iwi' na mian anu palesayamo hi Tumpu, akumo na anu talalo madi' ko angga'nyo. Panyo Tumpu nombee'imo aku balakat aiya: kalaja da mompolele hi to mia-mian anu misa' Yahudi Lele Ma'ima' mongkona kakaya'an i Kristus anu madi' ko kamingkotannyo;

PO'ULE' INGULIT 18:2

Aha madi' timbali ko tano' susumo tulunan nu bansa sangga'at kalana Tumpumo na bagian nu aha susumo anu jinanji'mo nu Tumpu hi aha.

IBRANI 5:4

Madi' ko samian anu mosi hangkat posi butongnyo timbali Imam Daka'. Mian timbali Imam Daka' de Tumpu na molaga ia da mompojalan palentah aijo' – pokakana sumo i Harun.

YOSUA 18:7

Ola tulunan nu bansa Lewi na madi' mohumpak bahagian tano' susumo belemiu, kalana bahagian nu aha aijo'mo timbali to ima-imam mombau apaa na anu nu palentahkon nu Tumpu. Ka' aha tulunan nu bansa Gad, Ruben ka' sambagian tulunan nu bansa Manasye memang aha nohumpakmo bahagiannyo i sasu kabete'an Kaunyo nu Yordan. I Musa posaihon nu Tumpu nombee'mo tano' aijo' hi aha.”

1 PETRUS 5:2

da belemiu molaya' tompukan nu domba anu pinalesayakonmo nu Tumpu hi belemiu. Oposanang na kinyonyoa de molaya' aha susumo anu nukahanda'i nu Tumpu, ka' boli maboat na kinyonyoa. Boli mule' belemiu mokalaja kahanda' da mohumpak dale', panyo kalana komiu totu-totu'u mongka'oho' mongkalesang.

1 PETRUS 5:3

Boli mompalentah sumo anu mongkuasai aha anu pinalesayakonmo hi komiu, panyo timbali ahi' sonto' hi aha.

1 SAMUEL 2:28

Iwi-iwi' na tulunan nu bansa Israel olamo aha sa'anakan na pinile'an-Ku da timbali imam-Ku, anu mokalaja i mezbah, mompapu kamangian, ka' mompusok baju nu imam de motataemo mae hi belengku. Ka' hi aha, ka' mule' lee' nu aha binee'an-Kumo hak mongala sambagian koloban anu osombahkon anu tinunuanmo i mezbah aijo'.