NOMBILANGMO 14:11 - KITAB NU TUMPU ALLA LELE MA'IMAI'

¹¹ Tumpu notataemo hi Musa, “Daagi' hipian na kopinnyo na mian haha aijo' panggaga hi beleng-Ku? Sampe toka hipian na aha madi' mongka'oho' palesaya hi beleng-Ku, padahan Aku nombaumo manjoo' hondo na anu okabangangi hi aha?

NOMBILANGMO 14:11 ပူးပေါင်းရင်းမြစ်များ

MAZMUR 106:24

Lapas mae aha madi'mo nongka'ima'i lipu' anu ma'ima'an hondo aijo', kalana madi'mo pinalesaya hi janji' nu Tumpu.

MAZMUR 78:22

kalana aha madi'mo pinalesaya hi Tumpu, hi kuasa-Nyo anu moko ala momposalamat aha.

MAZMUR 78:32

Maumo sumo aijo' mian anu palesayamo hi Ia sabole-boleh ahi' mombau dosa', Ia nombau iwi-iwi' na anu okabangangi panyo madi' ahi' aha pinalesaya.

MAZMUR 95:8

“Boli panggaga na belemiu susumo mompolee' nu belemiu kiijo' mae i Meriba, susumo tempo'nyo aha kiijo' mae i Masa, i tampat padang anu mateges.

NOSABATMO 10:3

Lantas i Musa ka' i Harun nambamo nangadap hi tomundo ka' nompoto'i hi ia, “Tumpu, Tumpu Allah nu aha bansa Ibrani notataemo, 'Sampe toka hipian na kopinnyo na belento madi' mongka'oho' tulut hi beleng-Ku? Pobee'mo na mian anu pinalesayamo hi beleng-Ku mamba, da aha timbali monsombah Aku.

NOSABATMO 16:28

Lantas Tumpu notataemo hi Musa, “Sampe toka hipian na belemiu madi' mongka'oho' mohongo-hongo iwi-iwi' na palentah-ng-Ku?

NOSABATMO 23:21

O intomakon ka' otuluti na ia. Boli moto idek hi ia kalana ia Aku na nonsai ka' ia madi' mongampuni kasala'an nu belemiu.

NOSABATMO 32:9

Ku sumbu' na bansa aijo' talalo hondo panggaga.

AMSAL 1:22

“O to mia-mian anu panggaga! Sampe toka hipian na kopinnyo na belemiu me saja' sumo aijo'. Hipianje na tempo'nyo belemiu madi'mo montee ilimu' ka' montulutimo pangajalan?

YEREMIA 13:10

Bansa anu ma'idek na palabuatan nu aha aijo' talalo ahi' panggaga ka' madi'mo mae tulu-tulutan hi beleng-Ku. Aha monsombah ka' palesaya hi to pilo-pilogot sangga'at. Mokonyo aijo' aha montihomo lipa' kodo-kodo' aijo' anu madi'mo daagi' ko gunanyo.

YEREMIA 4:14

O Yerusalem alinmo na palabuatan anu ma'idek anu lengkat ikinyonyoa nu beleyum da beleyum oposalamatmo. Sampe toka hipian na kopinnyo na pikilan toto ide-idek haha aijo' daagi' opo una' nu beleyum i uno nu kinyonyoa nu beleyum?

YEHEZKIEL 20:13

Panyo ipadang tampat anu kaho bone'nyo aijo' suele ahi' aha madi' mohongo-hongo mae Aku. Aha nolanggaimo iwi-iwi na palentah-Ku ka' madi'mo daagi' nontalima atulan-Ku, anu nompatikolomo tukoonyo mian anu montuluti aijo' tataap tumuu'. Aha talalomo nohumimi'i sinaa nu Sabat. Kalana aijo' ipadang tampat anu kaho bone'nyo Aku sabenannyo mompotudunmo ahi' tambuha'-Ku hi aha ka' monsilakaimo aha.

HOSEA 8:5

Ku ka'ideki na sapi' mosoni' anu nu sombah nu aha anu jojoong i Samaria. Aku pi nusamo hondo hi aha. Pa' tokaje hi pianna kopinnyo na aha saja' mombusiki butong nu aha kalana monsombahmo pilogot?

ZAKHARIA 8:14

Tumpu Anu Daka na Kuasanyo notataemo, “Tempo'nyo mompolee' nu belemiu nonsaduakonmo Aku da pinusa, tinantukan-Kumo da opiboatimo na mohukum aha. Aku madi'mo mombabali'i katantuan-Ku aiya, panyo osidahimo ahi'.

NOMBILANGMO 14:23

Madi'! Aha madi' timbali minsoop i lipu' aijo'. Aha anu pinanggagamo hi beleng-Ku madi' ko samian pe'e na timbali mompeja' lipu' aijo'.

NOMBILANGMO 14:27

“Sampe toka hipian na mian haha aiya anu toto ide-idek na kinyonyoanyo mososon mae hi beleng-Ku? Iwi-iwi' na pososon nu aha i hongong-Kumo.

NOMBILANGMO 32:10

Sahingga notambuha'mo na Tumpu tempo'nyo aitu sahingga Ia notataemo, ‘Mian haha aiya madi' tulu-tulutan hi beleng-Ku. Mokonyo aijo' Aku basumpa' da mian aijo' hi aha anu ko umunmo uampulu'mo na taun mokiita' tempo'nyo aha nompala'imo mae Mesir madi'mo ko anu minsoop i lipu' anu jinanji'-Kumo hi Abraham, hi Ishak ka' hi Yakub.’

MATIUS 17:17

I Yesus nontaami, “Palias na komiu aiya! Komiu totu-totu'u to mia-mian anu palangues ka' madi' palesaya. Piangkuka na kopinnyo na Aku tionyo jojoong tiba komiu ka' monsabaanakon komiu? Boamae na anak aijo'!”

MARKUS 9:19

Sahingga i Yesus notatae hi aha, “Palias na komiu aiya! Komiu totu-totu'u mian anu madi' palesaya. Toka hi pian na Aku tionyo jojoong hingga-hinggat tiba komiu ka' sabaan hi komiu? Boamae na anak aijo'!”

YOHANES 10:38

Panyo kalana Aku mombau palentah-Nyo, opalesaya apaa na anu Kubau aijo', mau mule' komiu madi' mongka'oho' palesaya hi beleng-Ku. Atina'je ka' osumbu' miu, ka' mangalati' taalu' Tuuma tataap mosa'angu' tiba Aku, ka' Aku tataap mosa'angu' tiba Tuuma.”

YOHANES 12:37

Mau mule' manjoo'mo na anu okabangangi binau i Yesus i ahop nu aha, aha madi' palesaya hi Ia.

YOHANES 15:24

De aijo' hi aha, Aku madi' nombau hahan anu ma'isa toho' binau nu mian sangga'at, aha madi' baladosa'. Panyo u'uka aha nontoamo apaa na anu binaung-Ku, ka' aha nongka'idekimo Aku tiba Tuumang-Ku.

PO'ULE' INGULIT 1:32

Panyo mau pe'e belengku no tataemo sumo aijo komiu maisa pe'e mongka'oho palesaya hi Tumpu Allah miu,

IBRANI 3:16

Yoh, ihemo na to mia-mian anu nohongomo potatae nu Tumpu Allah lantas notomuhukmo hi Ia? Aijo'mo iwi-iwi' na mian anu i laya'mo i Musa nosabat lengkat mae i Mesir, kabai misa'o?

IBRANI 3:18

Tempo'nyo Tumpu binasumpa'mo sumo uuka, “Aha madi' timbali minsoop i lipu' aijo' da timbali mingkain tiba aku” – ihe mule' na anu kokoonyo nu Tumpu? Anu nunu patui aijo'mo to mia-mian anu notomuhukmo hi Tumpu, kabai misa'o?