MAZMUR 40:6 - KITAB NU TUMPU ALLA LELE MA'IMAI'

⁶ O Tumpu nanjoo'mo hondo na anu binau nu Belento hi kami, O Tumpu, Tumpu-ngku, Belento madi' ko anu mompokakanai! Nanjoo'mo na anu tinanga'an nu Belento nonompobangangmo kami, madi'mo opoko ala osisik iwi-iwi'.

MAZMUR 40:6 ပူးပေါင်းရင်းမြစ်များ

AYUB 33:16

Pinokaumo nu Tumpu Allah na aha da mompotombihing; pinotolokengkeng-Nyomo na aha nu pokinde', mompisala'i.

AYUB 5:9

Iwi-iwi' na anu binaumo nu Tumpu Allah talalo hondo oka bangangi; madi' opoko ala osumbu-sumbu'to. Anu okabangangi iwi-iwi' bibinau-Nyomo madi' opoko ala osumbu'to na konjoo'nyo ka' madi' ko kamingkotannyo.

MAZMUR 139:17

Talalo hondo susa' na aku monsumbu' pikilan nu Belento, O, Tumpu, ka' talalo hondo manjoo' na ngangahannyo!

MAZMUR 139:18

De ku bilang, lebe manjoo' molingkudui bone'; de aku mobulamo, daagi' sabole-boleh ahi' ku potutugakon na Belento.

MAZMUR 50:8

Misa' kalana koloban nu belemiu sahingga Ku tudu'mo na belemiu; koloban anu opotunu nu belemiu na saja' ahi' daagi' aiya i ahop-Ku.

MAZMUR 51:16

Poluputakon mae na aku da madi' nu ala nu kapatean, o Tumpu anu momposalamat mae aku, sahingga sanang na kinyonyoangku mombebakon ka'adinan nu Belento.

MAZMUR 71:15

Sansina-sinaa ku sisikakon apa-apaa na palabuatan nu Belento anu adin, ka' kasalamatan anu lengkat mae hi anu madi'-Mo opoko ala obilang.

NOSABATMO 21:6

saba' tuannyo tionyo ahi' momboa ia i tampat ponsomban. Ikiijo' botuan aijo' opokau tuminjo maninseha i tumban kabai ohi' nu tumban tampat ponsomban. Ka' tuannyo tionyo ahi' monsusuk bihing nu botuannyo aijo', sahingga ia timbalimo botuannyo sampe toka sidu-sidutu'.

YESAYA 1:11

Tumpu notatae, “O sangka nu belemiu Aku mongka'ima'i koloban anu saja' osombahkon nu belemiu hi beleng-Ku? Aku na'osamo nu koloban nu to domba-domba anu otunui nu belemiu, ka' lompo' nu anak nu sapi' nu belemiu. Baso' nu sapi' lakinyo domba ka' mee' madi' Ku ka'ima'i.

YESAYA 25:1

O, Tumpu, Belentomo na Tumpu Allah-ngku, ku popodaka' na Belento ka' mule' ku puji na sanggo nu Belento. Kalana apa-apaa na anu binaumo nu Belento talalo ahi' okabangangi; Belento notanga'imo mombau apa-apaa daagi' pe'e naipuan mae, ka' binaumo ma'i-ma'ima.

YESAYA 66:3

Panyo bansa haha aijo' ola mosi bau pongka'oho' nu aha; aha sanang hondo na monsombah mae panyo bau-baunyo anu okahegati. Hi aha madi' ko bedanyo: mongkolobanakon sapi' lakinyo ka' mongkolobanakon mian, mongkolobanakon anak nu domba ka' mompato'akon gogohong nu dedeng; monsombahkon gandum ka' mongkolobanakon baso' nu bau', mompapui kamangian ka' monsombah patong.

HOSEA 6:6

Lebe Ku ka'ima'i, hi belemiu da monsumbu' mae Aku, ka' saja' ahi' mongkalibosi mae Aku, nulingkudui na mompapui ka' monsombahkon koloban hi beleng-Ku.

AMOS 5:22

De belemiu momboa koloban anu otunui ka' koloban gandum, Aku madi' montalima. Aku madi' montalima to bina-binatang anu toto lompo-lompo' aijo' anu osombahkon nu belemiu hi belengku. Susumo koloban mompodame.

MATIUS 12:7

I uno nu Kitab nu Tumpu tinulis: Pongkalibosi ahi' na anu Kukahanda'i, misa' koloban nu binatang. De maluannyo komiu totu-totu'u mangalati' i potatae aijo', tantu komiu madi' momposala' to mia-mian anu madi' ko sala'nyo.

MATIUS 9:13

Soba selidiki' apaa na alati'nyo ayat nu Kitab nu Tumpu Allah: ‘Aku mongkahanda'i pongkalibosi ka' misa' koloban binatang’. Kalana Aku toka misa' da molaga mian anu monsanggo butongnyo ma'ima'mo, panyo mian anu o sangka madi' talakana'.”

1 SAMUEL 15:22

Panyo notatae na i Samuel, “Iya na anu talalo nu ka'ima'i nu Tumpu, tulu-tulutan hi Tumpu kabai koloban anu osombahkon? Montuluti Tumpu na lebe ma'ima' nu lingkudui na monsombahkon koloban. Tulu-tulutan hi Tumpu na lebe ma'ima nu lingkudui na lompo'nyo nu domba.