MAZMUR 40:5 - KITAB NU TUMPU ALLA LELE MA'IMAI'

⁵ Mohumpak kantumuu'an ma'ima' na mian anu palesayamo hi Tumpu, anu madi' monsombah to pilo-pilogot, kabai momoita tulung hi mian anu buulon.

MAZMUR 40:5 ပူးပေါင်းရင်းမြစ်များ

AYUB 26:14

Panyo iwi-iwi' aijo' ola salaku bau pongibalatakon kuasa-Nyo; ola susumo anu ingoyongakon i bihingto. Talalo ahi' sangkiding na kita mompangalati'i Tumpu Allah ka' kakuasa'an-Nyo talalo ahi daka'!”

AYUB 5:9

Iwi-iwi' na anu binaumo nu Tumpu Allah talalo hondo oka bangangi; madi' opoko ala osumbu-sumbu'to. Anu okabangangi iwi-iwi' bibinau-Nyomo madi' opoko ala osumbu'to na konjoo'nyo ka' madi' ko kamingkotannyo.

AYUB 9:10

Madi' opoko ala osumbu'to na kalaja-Nyo iwi-iwi', madi' opoko ala olekengto na anu okabangangi bibinau-Nyomo.

MAZMUR 136:4

Ola Ia na anu nombaumo han anu okabangangi toto daka-daka'; kalibosan-Nyo sampe toka sidu-sidutu'.

MAZMUR 139:6

Talalo hondo maleeng na ilimu' nu Belento aijo', madi'mo nupoko tokai nu pikilanku.

MAZMUR 71:15

Sansina-sinaa ku sisikakon apa-apaa na palabuatan nu Belento anu adin, ka' kasalamatan anu lengkat mae hi anu madi'-Mo opoko ala obilang.

MAZMUR 73:28

Panyo de belengku na totu-totu'u ahi' ma'ima' hondo na jojoong koko hi Tumpu. Tumpu na ku bau tampat pihohunganku da aku moko ala mombebakon iwi-iwi' apaa na anu binau-Nyomo.

MAZMUR 92:5

Kalana palabuatan nu Belento momposanang hondo kinyonyoang-Ku, aku lame' hondo na manyanyi kalana montoa kalaja nu Belento.

NOSABATMO 11:8

Ahennyo i Musa notataemo, “Iwi-iwi' na aha anu ko pangkatnyo anu mokalaja hi belento Tuanku tionyo toka ka' tolodadupu i ahopku ka' momoita da aku ka' bansangku mompala'imo lipu' aiya. Lapas aijo' mambamo na aku.” I Musa sinumpumo hondo lantas pinala'iannyomo na i tomundo.

NOSABATMO 15:11

Iya na Tumpu Allah sangga'at anu moko ala mohungku'i Belento, o Tumpu Anu Talasanggo hondo ka' anu susi'? Ihe na moko ala mombau anu okabangangi ka' mombau palabuatan anu daka' susumo Tumpu?

YEREMIA 29:11

Te misa' Ku posi sumbu'i ahi' na anu tinanga'an-Kumo mosia na belemiu atina'? Apaa na anu tinanga'an-Kumo aijo' misa' da monsilakai belemiu panyo da bau ka'ima'an nu kantumuu'an nu belemiu ka' mombee'i belemiu kasampatan anu lebe ma'ima' aiya mae i ahop.