MAZMUR 36:4 - KITAB NU TUMPU ALLA LELE MA'IMAI'

⁴ Potataenyo saja' anu toto ide-idek ka' kaho potatae anu mongakali ia madi'mo daagi mombau anu ma'ima' ka' madi'mo montiho kalakuan nu mian anu pande.

MAZMUR 36:4 ပူးပေါင်းရင်းမြစ်များ

ESTER 5:14

Nohongo potatae aijo' bengkele'nyo ka' iwi-iwi' na to sanga-sangalunyo nombee'imo pikilan sumo uuka, “Pokaumo na mian mombau ohi' tangka-tangkas uampulu' ka' ohua' na meten. Lantas dodop subu-subu pomoitamo kaloasan hi tomundo da opokalayo'mo na i Mordekhai i ohi' aijo'. Tiba jalan anu sumo aijo' sanangmo na kinyonyoa nu beleyum mamba mongkaan.” Pikilan anu binee' nu aha aijo' ma'ima' hondo na tinutugan i Haman, kalana aijo' i sampamo nokibau ohi' bau pompokalayo'an aijo'.

ESTER 6:4

Lantas notataemo na i tomundo, “Ihe na anu ko pangkatnyo mokalaja hi belengku anu kiijo' i laigan nu tomundo uuka aiya?” I Haman sala'je ninsoop i popasan nu laigan i tomundo; ia ko kahanda' momoita kaloasan hi tomundo' da opokalayo'mo na i Mordekhai i ohi' anu pinotinjomo aijo'.

AYUB 15:16

Apaa mule' manusia anu palaganta ka' anu ko kasala'annyo, anu monggotup kalakuan anu ma'idek susumo uee.

MAZMUR 38:12

To sanga-sangalungku madi'mo mae ko anu mongohanii kalana panyakitku, pakalaus to julu-julungku mae nompolilitmo mae aku.

MAZMUR 52:3

O mian anu mahoson, kadaka' beleyum montakabunakonmo palabuatan nu beleyum ma'i-ma'idek, hi mian anu nu kalibosi nu Tumpu?

MAZMUR 97:10

O, belemiu mian anu mongka'ima'i Tumpu, ka'ideki na kalakuan anu ma'idek! Kalana Tumpu monjagai kantumuu'an nu mian anu palesayamo hi Ia, Ia nompobebasmo aha da madi' nukuasai nu mian anu palaganta.

AMSAL 24:2

Aha ola mompopikilakon kabuhingison ka' ola mombisalakon apaa na anu monsilakai.

AMSAL 24:23

To mia-mian anu pande hondo toho' notatae sumo uuka: Mian kopian madi' timbali maboat i sambiha'.

AMSAL 4:16

Mian anu ma'idek na kinyonyoanyo madi' to hoyot de ma'isa pe'e aha mombau anu ma'idek. Aha madi' matatundu' de ma'isa monsilakai mian sangga'at.

YESAYA 65:2

Aku saja' tataap sadia molabot miana nu palesayamo hi beleng-Ku, aha mongka'ima'i saja' panggaga. Bansa aijo' mombau palabuatan anu ma'idek ka' mombatuki posi tanga'an nu aha.

YEREMIA 4:22

Tumpu notatae, “Ponga' hondo na mian anu palesayamo hi beleng-Ku aijo' aha madi'mo nonsumbu' Aku. Aha sumomo ahi' to ana-anak anu mabongon hondo madi' ahi' ko anu nupisumbu-sumbu' maumo ola sangkiding. Pinandemo hondo ipalabuatan anu ma'idek, ka' madi'mo nonsumbu' palabuatan anu ma'ima'.”

YEREMIA 6:16

Tumpu notatae hi mian anu palesayamo hi Ia, “Tinjo' ipopanga'an-popanga'an nu jalan ka' palahatikan ima-ima'! Pokilawa na jalan anu naipuan mae, ka' iya na anu ma'ima'an hondo na jalan haha aijo'. Tuusakonmo na jalan aijo' da belemiu tumuu' madi' ko anu mompoposia.” Panyo aha notatae, “Madi', kami madi' mongka'oho' montuusakon jalan aijo'!”

YEREMIA 8:6

Aku nompotombihingmo ima-ima' panyo belemiu madi' motatae mae susumo ahi' anu sahondo-hondonyo. Madi' kosamian anu atina' hi belemiu na mompele-pele'mo ipalabuatannyo ma'i-ma'idek aijo'. Madi' ko anu motatae, ‘Apaa na kasala'anku?’ Belemiu iwi-iwi' montulumo posi jalan nu belemiu susumo ajahan montumbuhimo mokiijo' ipahampatean.

AMOS 5:15

Ka'ideki na anu ma'idek, ka'ima'i na anu ma'ima' ka' otoongi na ka'adinan. Ugaat Tumpu mongkalibosimo tuha'nyo nu to mia-mian bansa Israel.

MIKHA 2:1

Silakamo na to mia-mian anu nontanga'imo mombau anu ma'idek hau-haunyo male'-male' ikamale'an de pihimo lantas nu baumo subu-subu, kalana aha daagi' ko kamampuan de hahan anu sumo aijo'.

MIKHA 6:8

Madi'! Tumpu nompoto'imo hi kita han anu ma'ima'. Anu nu tuntut hi kita aijo'mo: da kita mingkalakuan ahi' adin, ka' saja' ahi' balaniat mompahakali-kalibosi ka' mule' madi' ahi' ko bubun ka' tumuu' ahi' mosa'angu' tiba Tumpunto.

MATIUS 27:1

Subu-subu hondo, iwi-iwi' na Kapala nu to Ima-imam, ka' polaya' nu Yahudi nombaumo sa'angu' na kaputusan da o pateimo na i Yesus.

SISIKON NU TO RASUL-RASUL 23:12

Subu-subu dodododopnyo, to mia-mian Yahudi nontampu'unimo nomposa'angu' tanga'an. Aha binasumpa'mo madi' mongkaan kabai monginum de aha ma'isa pe'e mompatei i Paulus.

ROMA 1:32

Nusumbu' nu aha, tukoonyo atulan nu Tumpu, mian anu mombau aijo' iwi-iwi' tionyo ohukum mate. Mau mule' sumo aijo' nubau ahi' nu aha na hahan aijo'; tiba mule' monsetujui mian sangga'at mombau.

ROMA 12:9

Kalibosi nu kinyonyoa sanang. Opimpali na anu ma'idek, ka' mintoong i anu ma'ima'.

ANU PINOTO'I HI YOHANES 2:2

Ku sumbu' apaa na anu binaumo miu: Belemiu mokalaja makeke ka' sabaan hondo na belemiu. Ku sumbu' saba' belemiu madi' sanang na kinyonyoa hi mian anu ma'idek. Ka' hi to mia-mian anu mongakui butongnyo rasul padahan misa', inguji'mo miu, ka' i humpakmo miu taalu' aha baleko'.

1 SAMUEL 19:11

Pihi-pihi aijo' i Saul nonsaimo mian tinopia-piangkuka namba hi laigan i Daud mondoyoni da opateimo daagi subu. Panyo i Mikhal bengkele'nyo nompoto'imo hi ia, “De beleyum madi' mopalai pihi uuka aiya, dodop subu-subu beleyum opateimo.”