MAZMUR 15:4 - KITAB NU TUMPU ALLA LELE MA'IMAI'

⁴ anu monsangka madi'mo ko angga'nyo na mian, de madi'mo nukali-kalinga nu Tumpu, panyo mongadati mian anu mohongo-hongo Tumpu; anu madi' toho' mombaleko'i apaa na anu jinanji'mo, maumo ahi' lugi'

MAZMUR 15:4 ပူးပေါင်းရင်းမြစ်များ

2 TAWARIKH 36:13

I tomundo Nebukadnezar nompakisamo i Zedekia da basumpa'mo i uno nu sanggo nu Tumpu Allah tukoonyo da ia tulu-tulutanmo hi Nebukadnezar. Panyo mamanga ahi i Zedekia notomuhukmo hi Nebukadnezar. I Zedekia pinanggagamo hi Tumpu, Tumpu Allah Israel. Ia madi'mo mongka'oho' mompala'i dosa'nyo ka' madi'mo poule' palesaya hi Tumpu.

ESTER 3:2

I tomundo nompalentahmo iwi-iwi' na anu ko pangkatnyo da moholomati i Haman ka' toka mae tolodadupu hi ahopnyo. Iwi-iwi' nombaumo apaa na anu pinalentahkonnyomo aijo', ola i Mordekhai na madi' tinoka mae nonsosa' hi Haman.

MAZMUR 101:4

Aku madi'mo mombau anu tageo' ka' madi'mo maninggalum i kalakuan anu ma'idek.

MAZMUR 101:6

Ku ka'ima'i na mian anu tulu-tulutan hi Tumpu; aha timbali jojoong i laiganku. Mian anu tumuu' madi' ko kasala'annyo atina' na timbali mombau anu ku palentahkon.

MAZMUR 119:63

Aku mobela' tiba iwi-iwi' mian anu tulu-tulutan, iwi-iwi' na mian anu mombau palentah nu Belento.

MAZMUR 16:3

Ku angga'i hondo na to mia-mian anu susi' i lipu' aiya; anu ku ka'ima'i hondo aijo'mo jojoong hingga-hinggat tiba aha.

MATIUS 5:33

“Komiu monsumbu' saba' mompolee'to daagi' ko pangajalan sumo uuka: Boli mombaleko'i janji'. Apaa na anu jinanji'umo tiba sumpa' i ahop nu Tumpu, tionyo nu bau.

SISIKON NU TO RASUL-RASUL 24:25

Panyo salatan i Paulus nolausakonmo potataenyo mongkona hal madi' timbali baleko' ka' tionyo ahi montahan napisu ka' mongkona hukuman i Sinaa Kakiamatan, i Feliks nabuhukmo, lantas notatae, “Beleyum timbalimo minsusule' sinaa uuka. Aku molagaje mule' beleyum de ko kasampatanmo.”

SISIKON NU TO RASUL-RASUL 28:10

Aha nombee'i kami manjoo' na palasen, ka' salatan kami kahanda'mo talabut, aha nomboai kami nokiijo' i kapan iwi-iwi' na anu opalalui mami i jalan.

1 YOHANES 3:14

Sinumbu'tomo, saba' kita nosabatmo i kapatean, ka' nolalinmo i kantumuu'an. Sinumbu'tomo na aijo', kalana kita mongkalibosi to Utu-utus bubu' kita. Mian anu madi' mongkalibosi, alati'nyo daagi' nu kuasai nu kapatean.

TO MIA-MIAN KOPIAN 11:35

Salatan tinoa i Yefta, i Yefta talalomo hondo nolibos sahingga binea-beaknyomo na baju'nyo ka' notatae, “Paya' na anakku madi'mo ku poko tahan na kinyonyoa! Kadaka' tionyoje oko na mompolibos kinyonyoangku? Aku binasumpa'mo hi Tumpu, ka' madi'mo ku poko ala na mompojalo janji'ku!”