MAZMUR 103:17 - KITAB NU TUMPU ALLA LELE MA'IMAI'

¹⁷ Panyo Tumpu sabole-boleh mongkalibosi mian anu tulu-tulutan hi Ia, kanonongan-Nyo saja' sabole-boleh sampe molundu-lundu na tulunan

MAZMUR 103:17 ပူးပေါင်းရင်းမြစ်များ

MAZMUR 100:5

Kalana Tumpu aijo' manonong; kalibosannyo sampe toka sidu-sidutu' ka' kanonongannyo aijo' sampe molundu-lundu na tulunan.

MAZMUR 111:3

Pakalaja'an nu Tumpu talasanggo hondo ka' talalo o puji', ka'adilan-Nyo sampe toka sidu-sidutu'.

MAZMUR 118:1

Pontalima kaseh hi Tumpu kalana Ia manonong, kalibosan-Nyo sampe toka sidu-sidutu'.

MAZMUR 22:31

To mia-mian anu tumuu' aiya mae i ahop tionyo monsombah Tumpu, Ia obebakonmo nu aha molapi-lapis mae na tulunan.

MAZMUR 25:6

Boli okolilimi na kanonongan ka' kalibosan nu Belento, o Tumpu, anu pinotoamo nu Belento salatanmo pe'e momonanyo mae.

MAZMUR 90:16

Potoamo mae hi kami to posa-posaihon nu Belento na anu binaumo nu Belento ka' kakuasa'an nu Belento anu talasanggo hondo hi to lelee' mami.

NOSABATMO 20:6

Panyo Ku potoa na kalibosan-Ku hi mada-madala na lee' nu to mia-mian anu mongkanonongi Aku ka' tulu-tulutan hi Palentah-ngKu.

YESAYA 41:8

Panyo beleyum Israel posaihon-Ku, mian anu pinile'an-Kumo beleyum lee' mae i Abram, sampobela'-Ku.

YESAYA 46:13

Ku polia'mo mae na katokaan nu sinaa anu baumo pompo bebasan, kasalamatan anu Kubee' madi'mo daagi' otunda. Ku posalamatmo na Yerusalem ka' mombee'imo kaholomatan hi Israel.”

YESAYA 51:6

Tonto'i mokiita' na langit ka' toa na tano'; langit madi'mo otoa-toa susumo tibuk ka' tano' luso'mo susumo baju' anu pininmo na saja' pinusok, iwi-iwi' na anu monjojoongi silakamo susumo momot. Panyo kasalamatan anu Ku bee'mo na tataap ahi' sampe toka sidu-sidutu', ka' kamanangan-Ku na madi' ahi' kokamingkotannyo.

YEREMIA 31:3

itampat anu majo'on mae aku nompotoamo butong-Ku hi aha. O mian nu Israel, naipuan pe'e mae Aku memang ahi' mongkalibosi belemiu ka' memang Aku saja' ahi' sabole-bole mompotoa saba' Aku na saja' ahi' mongkalibosi belemiu.

DANIEL 9:24

Pimpitun lipat na pitumpulu' na taun, aijo'mo na tempo' anu pinotataapmo nu Tumpu mompobebas bansa nu belemiu tiba kota' nu belemiu anu susi' aijo' da bolimo baladosa' ka' bolimo mombau palabuatan anu ma'idek. Iwi-iwi' na dosa' o'ampunimo ka' mule' ka adilan anu sampe toka sidu-sidutu' aijo' sabole-bolemo ahi' opake sahingga anu lewa' tinoa ka' mule' anu lewa' okila-kila aijo' onyata'mo ahi', ka' Laigan nu Tumpu anu susi' aijo' po ule'mo ahi ponsomban Tumpu.

MIKHA 6:5

O, mian-Ku anu palesayamo boli okolilimi apaa na anu tinanga'anmo i Balak tomundo' nu aha Moab kona hi belemiu ka' mosia na i Bileam anak i Beor nontaami hi ia. Boli okolilimi apaa na anu jinadimo i jalan olot nu pinombauan kemah kiijo' i Sitim tiba Gilgal. De madi' okolilimi nu belemiu iwi-iwi' aijo' tantu osumbu'je nu belemiu apaa na anu binaung-Kumo kahanda' momposalamat belemiu.”

ROMA 1:17

Kalana tiba Lele Ma'ima' aijo', Tumpu nompotiju'mo mosia na bau-baunyo pompahasumbu'an nu mian tiba Tumpu po'ule'mo na'ima'; baunyo aijo'mo palesaya hi Tumpu lengkat pe'e imoonanyo toka-toka i kahimpusannyo. Aijo' pokakana sumo anu tinulismo i uno nu Kitab nu Tumpu, “Mian anu palesayamo hi Tumpu sahingga pompahasumbu'an tiba Tumpu po'ule'mo ma'ima', mian aijo' tionyo tumuu'!”

ROMA 15:8

Kalana, o inau', i Kristus nongajanmo mian nu Yahudi bau pomposumbu' saba' Tumpu madi' baleko' nongganapimo iwi-iwi' na janji'-Nyo hi mompolee'to.

PO'ULE' INGULIT 10:15

Panyo kalibosan anu taha-tahahumo nu Tumpu Allah hi mompolee' miu, sahingga mau manjoo' na bansa panyo belemiu na pinile'an-Nyo, ka' sampe tempo' uuka aiya belemiu mian-Nyomo anu pinile'anmo.

2 TIMOTIUS 1:9

Tumpu momposalamat kita ka' molaga kita da timbali mian-Nyo anu palesayamo. Binaunyo na aijo' misa' mintoong i apaa na anu binauntomo, panyo mintoong i posi kahanda'-Nyo tiba balakat-Nyo. Ia mombee'i kita balakat-Nyo nontulu hi Kristus Yesus ma'isa pe'e dunia aiya pinotimbali.

2 PETRUS 1:1

To Utu-utus anu totu-totu'u pinalesayamo sumo kami! I Yesus Kristus, aijo'mo Tumpu ka' Tomundo anu Momposalamat kita, nompotimbalimo kita palesaya hi Ia, kalana Ia nombaumo anu totu'u. Sulat aiya lengkat mae hi Simon Petrus, samian na posaihon ka' rasul i Yesus Kristus.