MATIUS 7:25 - KITAB NU TUMPU ALLA LELE MA'IMAI'

²⁵ Tempo'nyo ujan tudun, ka' iaba' toka tiba mombun makansang montintip laigan aijo', laigan aijo' madi' motua' kalana pinotinjomo i bawo nu batu.

MATIUS 7:25 ပူးပေါင်းရင်းမြစ်များ

AMSAL 10:25

De ko tombusisi' montuda'mae mohopu' na mian anu ma'idek na kinyonyoanyo; panyo mian anu madi' tageo' na kinyonyoanyo tataap mahoson sampe toka sidu-sidutu'.

MALEAKHI 3:3

Ia toka mae da momputusimo, susumo mian anu mompobelesi'mo ka' mule' monsopu'mo salaka. Susumo samian na tukang logam monsopu'mo mosoni' tiba salaka, sumo aijo'mo na anu nu utus nu Tumpu monsopu'mo to ima-imam da aha monsombahkon iwi-iwi na koloban mombatuki ahi' apaa na anu nu situjui nu Tumpu.

MATIUS 16:18

Kalana aijo' osumbu'mo, beleyum atina' i Petrus, batu anu mahoson. Ka' aita' i batu, aiya na Aku mompotinjo Grejang-Ku, anu madi' opoko hungku'i; mau mule' anu monsilakai!

MATIUS 7:24

“Yoh, mian anu mohongo potataeng-Ku aiya, ka' montuluti, pokakana sumo mian pande anu mompotinjo laigannyo i bawo nu batu.

MATIUS 7:26

Ka' mian anu mohongo potataeng-Ku aiya, panyo madi' montuluti, ia pokakana sumo mian ponga' anu mompotinjo laigannyo i bawo nu bone'.

MATIUS 7:27

Tempo'nyo ujan tudun, ka' iaba' toka tiba mombun makansang montintip laigan aijo', laigan aijo' motua'. Ka' ka'idekannyo talalo hondo!”

SISIKON NU TO RASUL-RASUL 14:22

I kota-kota aijo' aha nompaka pohoson kinyonyoa nu anu saja' mombatuki Yesus ka' nompokinde'i anu saja' mombatuki aijo' da tataap palesaya hi Yesus. “Kita tionyo manjoo' na mongoa'i sansala i moonanyo, atina'je ka' kita mongoa'i ka'ima'an nu Dunia Bu'ou nu Tumpu,” sumo aitumo na to rasul-rasul aijo' mongajanakon hi anu saja' mombatuki Yesus i to kota-kota haha aijo'.

EFESUS 3:17

Ku'amalakon kalana komiu pinalesayamo hi Kristus, i Kristus jojoongmo i uno nu kinyonyoa miu, ka' kantumuu'an miu mompintoongimo ka' nu kuasaimo nu kalibosan.

KOLOSE 2:7

ka' mimbakatmo hi Ia. Tionyo ahi' komiu tumuu'mo hi Kristus salaku bau kahosonan. Tionyo ahi' komiu mompaka palesayamo hi Kristus, susumo apaa na ingajanakonmo hi komiu. Ka' tionyo ahi' kinyonyoa miu saja' montaloakon talima kase.

YAKOBUS 1:12

Mohumpak ka'ima'an na mian anu sabaan de ia monta'up soba'an. Kalana de ia moko alamo montahan soba'an aijo', ia mohumpakje tambonyo, aijo'mo kantumuu'an anu jinanji'mo nu Tumpu Allah hi to mia-mian anu mongkalibosi Tumpu.

1 PETRUS 1:5

Iwi-iwi' aijo' bau bagi miu, kalana komiu pinalesayamo hi Tumpu. Jadi komiu o jagai nu kuasa nu Tumpu da komiu mohumpak kasalamatan anu oponyata'je toka i tempo'nyo saidi' mae.

1 PETRUS 1:7

Anu nupatui aijo'mo kahanda' momponyata' pa' komiu totu-totu'u palesaya hi Tumpu kabai madi'. Mosoni' pe'e anu timbali ma'idek, o uji' nu apu. Jadi, palesaya miu anu totu-totu'u molingkudui oli nu mosoni', jadi tionyo ahi' o uji' suele da timbali mahoson. Ka' tiba jalan sumo aijo' komiu o puji' ka' o angga'i tiba opopodaka' toka i sinaa-Nyo de i Yesus Kristus po'ule'mo toka.

1 YOHANES 2:19

Anu monsampo Bali' i Kristus aijo', atina'mo to mia-mian anu nompala'imo kita, kalana aha memang misa' to mia-mian gampanto. De aha to mia-mian gampanto, tantu aha tataap hi kita. Panyo aha nompala'imo kita, da manasa saba' madi' ko samian pe'e anu aijo' hi aha na totu-totu'u tonsoop timbali gampanto.