MATIUS 7:15 - KITAB NU TUMPU ALLA LELE MA'IMAI'

¹⁵ “Opoko piani na mongahopi to nabi-nabi anu madi' totu'u. Aha toka hi komiu mimbalu-balu' domba, panyo aha sabenannyo sumo pojek anu baani.

MATIUS 7:15 ပူးပေါင်းရင်းမြစ်များ

1 TOMU-TOMUNDO' 13:18

Sahingga nabi anu i langkai'mo aijo' lengkat mae i Betel nombaleko'imo ia, ia notatae “Aku suele nabi susumo Belento. Tumpu nompalentahmo mae malaekat da mompokau aku molabot ka' mombee'i mongkaan Belento i laiganku.”

YEREMIA 29:21

Tumpu Anu Mahakuasa, Tumpu Allah Israel nonsisikmo mongkona i Ahab anak momo'ane i Koloya ka' mongkona i Zedekia anak momo'ane i Maaseya anu nompakemo atas sanggo nu Tumpu na nompoto'i hi belemiu hahan anu madi' totu'u. Tumpu notataemo tukoo-Nyo Ia mombee'mo aha hi kakuasa'an i Nebukadnezar tomundo' nu aha Babel, anu saidi' mae mompateije aha i ahop nu mata nu belemiu.

YEREMIA 29:32

ka' mule' kalana ia nompokaumo belemiu da madi' montuluti mae Aku, sahingga Ku hukumo na ia tiba lee'nyo. Madi' ko samian na anu aijo' hi aha na jojoong aiya hi kami da montoa hahan anu ma'ima' anu saidi' mae Ku bau hi aha ingko-ingkot na mian anu palesayamo hi beleng-Ku. Aku, Tumpu notataemo.”

YEHEZKIEL 13:16

o, to nabi-nabi anu madi' totu'u! Belemiu nongkila-kilamo saba' Yerusalem madi'mo momosia ka' na'ima'mo, padahan imadi' ahi'!” Sumo aijo' na koonyo nu Tumpu Anu Matangkas na Kuasanyo.

YEHEZKIEL 13:22

To mia-mian anu manonong na kinyonyoanyo anu madi' Ku poposia jinadimo na ambang na aha kalana kabaleko'an nu belemiu. To mia-mian anu ma'idek na kinyonyoa nu aha jinadimo tataap baladosa' ka' madi'mo oposalamat.

YEHEZKIEL 22:25

To pola-polaya' nu aha sumomo ahi' singa molohu'mo salatan nonsa'umo kaanonnyo. Aha nompateimo mian da'isan, nongagoimo iwi-iwi' na halata' tiba kakaya'an anu nu humpak nu aha ka' nonsaduakonmo manjoo' na to bou-boune anu binalumo.

YEHEZKIEL 22:27

To pama-pamalentahnyo sumomo ahi' serigala anu nombente-bentekmo kaanonnyo. Aha sola'mo nompatei mian ola kalana da molio ka untungan.

DANIEL 11:34

Hau-haunyo lewa' mompatei, mian anu palesayamo hi Tumpu mohumpakmo bantuan sangkiding panyo manjoo' na mian manintuangmo hi aha pada han ola kalana molio kapentingan nu aha.

MIKHA 3:11

Anu balakuasa i kota' lewa'mo nompalentah da mohumpak doi ponsogo', to ima-imam lewa' mompogulu'atulan nu Tumpu da mohumpak gaji, ka' to nabi-nabi momoita pokinde' hi Tumpu da mohumpak doi – lantas aha iwi-iwi' monsangka Tumpu daagi' monsangaja'i mae aha. Aha notatae, “Tumpu saja' daagi' aiya hi kita; kita madi' nukona mae nu balaa'.”

ZAKHARIA 13:4

I sinaa aijo' to nabi-nabi ma'ambangmo na mombau apa-apaa susumo nabi. Aha madi'mo mompusok baju' nu nabi bau-bau pongakali ka' mombuulakon anu tinoa nu aha.

MATIUS 10:17

Balajaga-jaga kalana komiu o hakop ka' opopangadap hi to Mia-mian Kopian. Komiu tionyo o sakisa i to lai-laigan pogalejaan.

MATIUS 16:11

Kadaka' sampe komiu madi' mangalati', kalana Aku misa' notatae tiba komiu mongkona roti? Bala'ingati mae na ragi nu to mia-mian Farisi ka' Saduki!”

MATIUS 16:6

I Yesus notatae hi aha, “Bala'ingati mae na ragi nu to mia-mian Farisi ka' Saduki.”

MATIUS 24:11

Da'isan na to nabi-nabi anu madi' totu'u toka ka' mongakali da'isan na mian.

MATIUS 7:14

Panyo soki ka' susa' na sabatan ka' jalan anu momboa mian i kantumuu'an. Ka' ola sangkiding na mian anu mongkabot.”

LUKAS 12:15

Lapas aijo', kona hi mian iwi-iwi' anu daagi' i kiijo', i Yesus notatae, “Obala'ingati ka' bajaga-jaga, boli sampe komiu mangoa. Kalana kantumuu'an nu mian madi' ola taha'iman i kakaya'annyo mau mule' halata'nyo molabi-labi.”

LUKAS 6:26

Silaka na komiu de iwi-iwi' mompuji' belemiu; kalana sumo aitu suele na mompolee' nu aha nompuji'mo to nabi-nabi anu baleko' tempo'nyo u'utu mae.”

YOHANES 10:12

Mian anu mongala tambo anu misa' polaya', ka' misa' tumpu nu domba-domba aijo', saidi' mae malai mompala'i domba-domba de ia montoa serigala toka mae. Te domba-domba haha aijo' nu sa'u ka' nuposungkehet nu serigala.

SISIKON NU TO RASUL-RASUL 13:40

Aijo' na sababnyo komiu tionyo mompalahatikan ima-ima', boli sampe timbali hi komiu apaa na anu tinaloakon nu to nabi-nabi aiya,

SISIKON NU TO RASUL-RASUL 13:6

Songko-songko na togong aijo' i lajangan nu aha tinoka-toka i Pafos. Kiijo' mae aha nompahakabot tiba mian nu Yahudi samian sanggonyo i Bar Yesus. Ia monsumbu' ilimu' anu mongakui butongnyo nabi.

GALATIA 2:4

maumo daagi' ko to mia-mian anu mompakisa han aijo'. Aha to mia-mian anu minsoop hoko-hokot hi bubuu' kita montiho-tiho sumo utus. Aha minsoop hoko-hokot da mompinasa kabebasan anu daagi' hi kita, kalana kita nosa'angu'mo tiba i Kristus Yesus. Aha mongka'oho' monsule'akon kita i kabebasan anu susumo u'utu mae salaku botuan,

EFESUS 4:14

Sahingga kita madi'mo po'ule' mingana-anak anu sumo nupuuhi nu mombun oboa mokiijo' mo'uuka mae nu ngangahan nu solok nu pangajalan lengkat hi to mia-mian anu pande na mongakali. Aha mompotimbali mian ponga' nu kapandean nu aha mongakali.

EFESUS 5:6

Boli komiu nu akali nu to sisi-sisik anu madi' mimbatu. Kalana anu hahan aijo'mo na monsaduakon Tumpu montambuha'i to mia-mian anu madi' tulu-tulutan hi Ia.

FILIPI 3:2

Obala'ingati na to mia-mian anu mombau to hahan anu ma'idek, to mia-mian anu konamo na osanggohi ‘dedeng’. Aha mompakisa da to mia-mian o sunat.

KOLOSE 2:8

Tionyo ahi' obala'ingati miu, ihe na monsumbu' daagi' ko anu monggoda komiu nu to kapa-kapandean nu mian anu madi' ko kaliangannyo, panyo ola mompobingong da sala'. Kapandean haha aijo' misa' lengkat mae hi Kristus, panyo ola lengkat mae i pikilan nu mian ka' lengkat mae i to roh-roh ma'idek anu mongkuasai dunia.

2 TIMOTIUS 3:13

sadangkan to mia-mian anu ma'idek ka' to mia-mian anu mongakali mompaka pa'idekmo. Aha mongakali mian sangga'at padahan posi aha suele o akali.

2 TIMOTIUS 4:3

Kalana tokaje na tempo'nyo, mian madi'mo daagi' mongka'oho' montalima pangajalan anu totu'u. Panyo ola ahi' aha montulutimo posi pongka'oho' nu aha, ka' momposihukmo manjoo' na to gulu-gulu' da o'ajanakon na hahan anu ma'ima' na ohongo nu bihing nu aha.

2 PETRUS 3:17

Panyo belemiu, to utu-utus anu okanonongi, nonsumbu'mo han aijo'. Kalana aijo', obala'ingati boli sampe belemiu mombatukimo kasala'an nu to mia-mian anu palaganta sahingga belemiu manabu'mo ka' madi'mo manintinjo i tampat miu aijo' anu mahoson hondo.

1 YOHANES 4:1

To Utu-utus anu okanonongi! Boli palesaya hi mian iwi-iwi' anu mangaku ko Roh nu Tumpu, panyo o uji' pe'e na aha da osumbu' pa' roh anu daagi' hi aha aijo' nolengkat mae hi Tumpu Allah kabai misa'. Kalana nabi anu madi' totu'u nanjoo'mo na namba noyaya.

YUDAS 1:4

Kalana madi' opoko ala osumbu-sumbu'to, daagi' ko to mia-mian anu madi' osumbu'to minsasuluk minsoop hi kita. Aha to mia-mian palaganta anu monggeo-geo'akon lele mongkona balakat nu Tumpunto, da mohumpak kasampatan pompotudunan nu aha napisu. Ka' aha madi' mongakui i Yesus Kristus, aijo'mo na anu Mongkuasai ka' Tumpunto. Salatanmo pe'e naipuan mae hukuman nu aha sinisikakonmo i uno nu Kitab nu Tumpu.

ANU PINOTO'I HI YOHANES 16:13

Lantas aku nontoamo totolu' na roh anu ma'idek sumo bahangkakak. Toto sa'angu' na bahangkakak haha aijo' nosabatmo mae i nganga' nu ulo anu talalo daka' hondo, lengkat i nganga' nu binatang ka' lengkat i nganga' nu nabi anu madi' totu'u.

ANU PINOTO'I HI YOHANES 17:6

Lantas tinoangkumo taalu' boune aijo' nalangumo nu baso' nu mian anu pinalesayamo hi Tumpu ka' baso' nu to mia-mian anu pinateanmo kalana tulu-tulutan hi Yesus. Salatan aku nontoamo boune aijo', aku kino banga-bangangmo.

ANU PINOTO'I HI YOHANES 19:20

Sahingga binatang aijo' i hakopmo hingga-hinggat tiba to nabi-nabi anu madi' totu'u anu nombaumo hahan anu okabangangi i ahop nu binatang aijo'. (Anu okabangangi haha aijo' atina'mo na binatang haha aijo' anu nongakalimo to mia-mian anu ko tandanyo binatang aijo', ka' to mia-mian anu monsombah patong nu binatang aijo'.) Lantas binatang aijo' ka' to nabi-nabi anu madi' totu'u aijo' ingalinmo tumu-tumuu' i uno nu ndalangon apu anu banyela-nyelak ka' ko belelangnyo.

ANU PINOTO'I HI YOHANES 20:10

Lapas aijo' Ibilis anu nongakalimo aha aijo', i lumbu'akonmo i uno nu apu anu sumo ndalangon ka' belelang. I kiijo'mo na tampatnyo nu binatang ka' nabi anu madi' totu'u aijo' ingalin momonanyo. Aha sinakisamo sinaa ka' malom sampe toka sidu-sidutu'.