MATIUS 6:24 - KITAB NU TUMPU ALLA LELE MA'IMAI'

²⁴ “Madi' ko samian pe'e timbali mokalaja hi ohua' na tuan. Kalana ia lebe mongkalibosi samian molingkudui anu sangga'at. Kabai ia lebe mohongo-hongo hi tuan samian molingkudui sangga'at. Sumo aitu suele na komiu. Komiu madi' timbali mokalaja bau kapentingan nu Tumpu ka' bau kapentingan suele i halata'.

MATIUS 6:24 ပူးပေါင်းရင်းမြစ်များ

KAJADIAN 47:17

Lantas binee'mo nu aha na potuu'on nu aha hi Yusuf, ka' binee'annyomo na aha anu okaan salaku pontolosi ajahan, domba, mee', sapi' ka' keledai nu aha. I taun aijo' i Yusuf nombee'i anu okaan hi aha, ingoli nu aha nu potuu'on.

1 TOMU-TOMUNDO' 18:21

Lantas i Elia nokiijo'mo hi mian da'isan ka' notatae, “Sampe toka hipian na tempo'nyo belemiu daagi' sabole-bole tataap mompo'ohua' kinyonyoa? De Tumpu aijo', Tumpu Allah, osombah na Tumpu! De Baal aijo' Tumpu Allah, osombah na Baal!” Mian da'isan anu sinilimu' i kiijo' ola nomohokot.

2 TOMU-TOMUNDO' 17:41

Jadi aha monsombah Tumpu, panyo mule' monsombah ahi' to pilo-pilogot nu aha sampe sinaa uuka aiya lee' mae nu aha daagi' saja' mombau han aijo'.

YEHEZKIEL 20:39

Tumpu Anu Matangkas na Kuasanyo notataemo, “O, to mia-mian nu Israel, uuka aiya yayamo belemiu. Saboleh-bolehmo ahi' pombau dosa' monsombahmo pilogot nu belemiu haha atina'! Panyo jaga lapas mae na atina' belemiu tionyo ahi' montulutimo Aku ka' madi'mo ahi' daagi' mohumimi'i sanggong-Ku anu susi' kalana momboamo palasombahan hi pilogot nu belemiu haha atina'.

ZEFANYA 1:5

Ku sapuimo iwi-iwi' ihe na saja' moliba' aita' mae i atop ka' monsombah batu nu sinaa, bitu'on, ka' to manda-mandala'. Saidi' mae Ku hopu'imo na aha anu monsombah Aku ka' mule' binasumpa'mo da tulu-tulutanmo hi beleng-Ku, panyo mule' ahi' binasumpa'mo hi sanggo nu Tominuat Milkom.

MATIUS 4:10

I Yesus nontaami, “Lako' na oko anu Monggoda! I uno nu Kitab nu Tumpu tinulis: O sombah na Tumpu, Tumpuum, ka' ola Ia na hongo na palentah-Nyo!”

LUKAS 16:11

Jadi, de mongkona kakaya'an nu dunia aiya komiu madi'mo timbali palesaya, ihe na mongka'oho' mompalesayakon hi komiu kakaya'an nu santuu'?

LUKAS 16:13

Madi' ko samian moko ala mombau kalaja hi aha ohua' na tuan; kalana ia lebemo mongkalibosi samian lantas sangga'at madi'mo. Sumo aijo'mo mule' na komiu. Komiu madi' moko ala mombau kalaja nu Tumpu Allah ka' mule' halata' nu dunia aiya.”

LUKAS 16:9

Lantas i Yesus po'ule' notatae, tukoo-Nyo, “Hongo! Pakemo na kakaya'an nu dunia aiya da mohumpak sangalu, da de kakaya'an nu dunia aiya madi'mo ko olinyo, komiu otalimaje i tampat kajojoongan anu sidu-sidutu'.

GALATIA 1:10

Pa' tiba jalan aijo' aku otoa so'o-so'omo montaha'imani da nu puji' nu manusia? Totu-totu'unyo i madi'! Aku ola ahi' montaha'imani anu ingakuanmo nu Tumpu. Pa' ko anumo binaungku da bau pongala kinyonyoa nu manusia da nu kanonongi nu mian? De aku daagi' mombau sumo aitu, aku misa'mo posaihon i Kristus.

1 TIMOTIUS 6:17

Hi to mia-mian anu kaya i dunia aiya tionyo ahi' nupoita nu beleyum da aha boli kobubuun, ka' boli montaha'imani to paka-pakakas anu madi' tataap – sumo hannyo nu kakaya'an. Aha tionyo montaha'imani Tumpu anu nombee'imo molabi-labi iwi-iwi na apaa hi kita, da olasainto.

2 TIMOTIUS 4:10

sabab i Demas nompala'imo aku kalana mongka'ima'imo dunia aiya. Ia nambamo nokiijo' i Tesalonika. I Kreskes nambamo nokiijo' i Galatia, ka' i Titus nokiijo'mo i Dalmatia.

YAKOBUS 4:4

Komiu atina' mian anu madi' mohongo-hongo! Madi' osumbu' miu, de komiu mosangalumo tiba dunia, makia' komiu timbalimo sampo bali' nu Tumpu?

YOSUA 24:15

De belemiu madi'mo palesaya ka' mohongo-hongomo Tumpu poto'i mae nasa-nasa sinaa aiya ihe na anu opalesaya ka' o hongo-hongo nu belemiu; hi to pilo-pilogot sangga'at anu sinombahmo nu mompolee' miu kiijo' mae i Mesopotamia naipuan mae kabai hi to pilo-pilogot mian nu Amori anu lipu' nu aha kinajojoonganmo nu belemiu uuka aiya. Panyo kami – aku tiba kami salaigan – mompalesayamo ka' mohongo-hongomo samata-mata hi Tumpu.”

1 SAMUEL 7:3

Lantas notataemo na i Samuel hi aha mian nu Israel, “De belemiu po ule'mo monsombah Tumpu, ka' totu-totu'u ahi na kinyonyoa nu belemiu monsombah Ia, saba' tionyo ahi' belemiu mongalin iwi-iwi' na pilogot nu aha mian anu lengkat mae i salipu'an tiba patong nu Pilogot Boune Astoret. Bee'mo na butong nu belemiu totu-totu'u hi Tumpu ka' olamo Ia na osombah sahingga belemiu madi'mo opoposia nu aha mian Filistin.”