MATIUS 5:22 - KITAB NU TUMPU ALLA LELE MA'IMAI'

²² Panyo uuka Aku motatae hi beleyum, ihe na pusa hi mian sangga'at, tionyo o putusi na palakalanyo; ka' ihehe na monguduli mian sangga'at, tionyo o putusi na palakalanyo i ahop nu Mian Kopian Daka' nu Agama. Ka' ihehe na montaloakon hi mian sangga'at, ‘Talalo ponga'’, patut o alin i uno nu apu nalaka.

MATIUS 5:22 ပူးပေါင်းရင်းမြစ်များ

KAJADIAN 37:4

Salatan to utu-utus tu'a i Yusuf nontoa taalu' tuuma nu aha talalo mongkalibosi i Yusuf, panyo aha na madi' ahi' talalo okalibosi, kina'idekanmo nu aha na i Yusuf, sahingga madi'mo monsampo sisik ima-ima' ia.

KAJADIAN 37:8

“Nu sumbu' beleyum timbalimo tomundo ka' mompalentahmo kami?” tinaloakon nu to utu-utusnyo tu'a. Lantas nompaka ka'idekimo mule' na aha ia, kalana ipionnyo ka' kalana apaa na anu sinisiknyomo.

2 SAMUEL 16:7

I Simei nontotobi'akon nu potatae sumo uuka, “Tula' lamba! Anu lewa' mompatei! Anu lewa' mombau anu ma'idek.

2 SAMUEL 6:20

Tempo'nyo i Daud ninsusule'mo ilaigan nu tomundo' kaka jojoongannyo ka' nonsalando'aimo bengkele' tiba to ana-anaknyo, i Mikhal nosabatmo mae nolalabot i Daud ka' notatae, “Sinaa uuka tomundo' nu Israel totu-totu'u nombaumo butongnyo da o adati! Ia nilanggomo susumo mian anu ponga' anu madi'mo na ambang i ahop nu to bou-boune aijo'mo to posa-posaihon nu aha mian anu ko pangkatnyo anu mokalaja ilaigan nu tomundo'!”

1 TOMU-TOMUNDO' 21:4

Kinyonyoanyo madi'mo sinanang ka' notambuha'mo kalana nohongomo apaa na anu tinaloakon i Nabot hi ia, i Ahab ninsusule'mo ka' nale'mo i kahoyotannyo ohupnyo pinsonggilingnyo ka' madi'mo mongka'oho' mongkaan.

2 TAWARIKH 16:10

Potatae i Nabi Hanani aijo' nonsaduakonmo da i Asa pinusamo hondo, sahingga pinosoopnyomo na nabi aijo' i uno nu talungku'. Tempo'nyo aitu suele nonsakisamo na i Asa pa' aha sangkuka na miannyo anu nu palentah.

2 TAWARIKH 19:5

Toka i toto sa'angu' na kota anu ko bentengnyo i da'erah Yehuda ia mohangkat to mia-mian kopian,

NEHEMIA 5:8

ka' pinoto'ingkumo, “Kita binala'usahamo hondo totu-totu'u nontokongi to utu-utusto mian nu Yahudi anu paya bemanau' nompobalukmo butongnyo hi bansa anu i salipu'an. Panyo uuka aiya belemiumo mule' ahi' na mompakisa aha da mompobaluk butong nu aha hi belemiu, padahan belemiu suele bubu' mian nu Yahudi!” To pola-polaya' haha aijo' madi' noko ala nontaami maumo pe'e ola santaa'.

MAZMUR 109:3

Aha lewa'mo montaloakon mae hi belengku potatae anu soa'nyo mongka'ideki mae, ka' mompahampateakonmo mae aku mau madi' ko sababnyo.

MAZMUR 14:1

Anu mongkapalai panyanyi. Mazmur i Daud. Mian anu ponga' motatae i uno nu kinyonyoanyo, “Madi' ko Tumpu.” Palabuatan nu aha ma'idek ka' okahegati madi'mo ko anu mombau anu ma'ima'.

MAZMUR 25:3

Anu madi' montapali Belento, na opopo'ambang panyo anu palesaya hi Belento na madi' ahi' ise-ise' na kinyonyoa.

MAZMUR 35:19

Boli opojohok na aku opopo ambangmo nu mian anu monsampobali' mae aku padahan madi' ko sababnyo. Boli opojohok na aku okokojoi nu mian anu mongka'ideki mae aku padahan madi' ko sababnyo.

MAZMUR 37:8

Boli motambuha' kabai ka' mapanas na kinyonyoa, aijo' ola momboa kasilaka'an.

MAZMUR 49:10

da ia madi' silaka ka' daagi' timbali tumuu' sampe toka sidu-sidutu'.

MAZMUR 69:4

Aku lewa'mo nomoita tulung sahingga aku nalawemo ka' mule' gogohongku pinakamo hondo. Matangku naposmo hondo na lewa' montanda'i Tumpungku pa' hipian mae na montulungi aku.

MAZMUR 7:4

O Tumpu-ngku, de aku nombaumo anu tageo' na palabuatan, nombaumo anu ma'idek hi sangalungku, kabai nompolugi'mo anu mongewa mae, padahan madi' kosababnyo, de bisuannyo aku nombaumo sumo aijo',

MAZMUR 92:6

Talalo hondo daka' na hahan anu binaumo nu Belento, O, Tumpu, talalo hondo maleeng na pikilan nu Belento!

AMSAL 14:16

Mian anu manonong saja' balajaga-jaga ka' mati kojo'on ipalabuatan anu ma'idek; panyo mian anu ponga' pusing na ubaknyo lapas mae sanangje na kinyonyoanyo.

AMSAL 18:6

De mian anu ponga' na motatae, ia monsaduakon painggagan ka' opoita da odoke.

YEREMIA 17:11

Sumomo ahi' tomonsi' mongokobi anu misa' nggalau'nyo, sumo aijo'mo na mian anu tageo' na kinyonyoanyo nohumpak halata'nyo. Toka ipohintonga'anmo nu umunnyo mingkotmo na halata'nyo aijo' iwi-iwi'. Ipupuusnyomo nu kantumuu'annyo, onyata'je taalu' ia mian anu ponga' ahi' hondo.

MOHAANGI 3:52

Sumomo tomonsi', na aku iloloi' nu sampobali' anu madi' ko saba-sababnyo mongka'idekimo aku.

DANIEL 3:13

Nohongo lele aijo' i tomundo' pinusamo hondo, lantas nompalentahmo da aha totototolu' na mian haha aijo' oboa mae mangadap hi ia.

DANIEL 3:19

Sahingga talalomo hondo pinusa na i Tomundo' Nebukadnezar hi Sadrakh, hi Mesakh, tiba hi Abednego, kalana aijo' ohupnyo nomehamo hondo. Ia nompalentahmo da mombaumo apu, obau pimpitun lipat na ko panasnyo nu lingkudui na panasnyo biasa.

OBAJA 1:10

“Beleyum talalomo binuhingi son hi to utu-utus nu beleyum lee' i Yakub. Kalana aijo' beleyum opateimo ka' nu alumo nu mian toka sidu-sidutu'.

OBAJA 1:12

Madi' pantas na beleyum ola sanang na montoa nasib anu sinoe'mo hi aha mian nu Yehuda ka' ola mule' lame' de tokamo isinaanyo utus nu beleyum aijo' osilakaimo. Madi pantas na beleyum manjoo' na potatae de ia susa'mo.

MATIUS 10:17

Balajaga-jaga kalana komiu o hakop ka' opopangadap hi to Mia-mian Kopian. Komiu tionyo o sakisa i to lai-laigan pogalejaan.

MATIUS 10:28

Boli mabuhuk hi aha anu mompatei butong, panyo madi' ko kuasa mompatei santuu'. Pabuhuk hi Tumpu anu ko kuasa monsilakai mau mule' butong mau mule' santuu' i uno naraka.

MATIUS 12:24

Salatan to mia-mian Farisi nohongomo aijo', aha nontaami, “Mian aiya timbali molaa' roh anu ma'idek, kalana i Beelzebul kapala nu to roh-roh ma'idek, nombee'mo kuasa aijo' hi aha.”

MATIUS 17:5

Hau-haunyo i Petrus daagi' motatae, sehu' anu majingka hondo nohohungimo aha, ka' lengkat i sehu' aijo' tolohongo na potatae anu nontaloakon, “Aiyamo na Anak-Ku anu Kuku kalibosi. Ia momposanang kinyonyoang-Ku. Hongo na Ia!”

MATIUS 18:21

Lapas aitu, i Petrus tinoka hi Yesus ka' nompokilawa, “O Tumpu, de utusku baladosa' hi belengku, sampe piangkuka na aku tionyo mongampuni ia? Sampe to pimpitun?”

MATIUS 18:35

I Yesus nompomingkot sisik-Nyo nu potatae sumo uuka, “Sumo aijo'mo na Tuumang-Ku i suluga' mombau komiu toto samian, de madi' sanang na komiu mongampuni utusum.”

MATIUS 23:15

Silakamo na komiu to gulu-gulu' agama ka' to mia-mian nu Farisi! Komiu ola ahi' mombau pula-pula! Komiu mamba majo-majo'on motaap i ambai, ka' lumajang monsongkohi katano'an ola ahi' mombau samian da minsoop i agamaum. Ka' salatan mian aijo' ninsoopmo i agamaum, komiu monsaduakonmo ia salon nu nalaka. Lipat pinduan lebe ma'idek molingkudui komiu!

MATIUS 23:33

Komiu ma'idek ka' lee' nu mian ma'idek! Mosia na komiu timbali momposalamat butong i hukuman nu nalaka?

MATIUS 25:41

Lantas Tomundo aijo' notatae hi to mia-mian anu i sasu kowi-Nyo, ‘Lako'mo pokiijo', anu kinutukanmo! Pinsoopmo i uno nu apu anu madi' toho' mate, anu pinosadiakonmo i Setan ka' hi to mala-malaikatnyo!

MATIUS 26:59

Kapala nu to Ima-imam, ka' iwi-iwi' Mian Kopian Daka' nu Agama bala usaha da mohumpak katalangan anu madi' totu'u, da timbali monabu'akon hukuman mate hi Yesus.

MATIUS 3:17

Lapas aitu hongomo na potatae nu Tumpu nontaloakon, “Aiyamo na Anak-Ku anu Kuku kalibosi. Ia momposanang kinyonyoang-Ku.”

MATIUS 5:34

Panyo uuka Aku motatae hi beleyum: Boli hondo-hondo basumpa', mau monsanggo langit, sabab langit aijo' Tumpu na anu mongkuasai,

MATIUS 5:44

Panyo uuka Aku motatae hi beleyum: Kanonongi na to sampo-sampo bali'um, ka' o sambayangakon na to mia-mian anu mongkabisa'i komiu,

MARKUS 14:55

Kapala nu to imam-imam, ka' iwi-iwi' na Mian Kopian Daka' nu Agama, mompagala molio to buku-bukuti' anu momposala' i Yesus da opokonai hukuman mate na Ia. Panyo aha madi' nohumpak sa'angu' pe'e na bukuti'.

MARKUS 15:1

Daagi' subu-subu hondo, iwi-iwi Mian Kopian nu Agama ka' kapala nu to imam-imam, to pola-polaya' nu Yahudi ka' to gulu-gulu' agama nombisalakon lia-lia'. Aha nompungumo i Yesus, lapas aijo' binoa nu aha na Ia ka' binee' hi Pilatus.

LUKAS 12:5

Sahanyo Ku potiju' hi belemiu ihe na tionyo okabuhuk miu. Pabuhuk hi Tumpu! Kalana nu poko patei, Ia ko kuasa mule' mongalin i uno nu nalaka! Palesayamo, Ia na anu tionyo okabuhuk miu.

LUKAS 22:66

Subu-subu, to pola-polaya' nu Yahudi, kapala nu to ima-imam, tiba gulu-gulu' agama sinilimu'mo, lantas i Yesus binoa pino'ahopakon hi Mian Kopian Daka' nu Agama nu aha.

YOHANES 11:47

Kalana aijo' to mia-mian nu Farisi tiba to Kapala-kapala nu imam nombau sale' tiba Mian Kopian Daka' nu Agama. Aha notatae, “Apaa na tionyo obaunto? Mian aijo' mombau manjoo' na anu okabangangi!

YOHANES 15:25

Panyo memang sumo aitumo, da timbali apaa na anu tinulis i uno nu Kitab nu Atulan nu aha, aijo'mo: ‘Aha mongka'ideki Aku, mau madi' ko sababnyo.’

YOHANES 7:20

Mian da'isan aijo' nontaami, “Beleyum motutuang! Ihe na kahanda'mo mompatei Beleyum?”

YOHANES 8:48

To mia-mian nu Yahudi aijo' nontaami, i Yesus, “Te misa' totu'u na potatae mami, Beleyum mian nu Samaria anu pininsoopanmo nu setan?”

SISIKON NU TO RASUL-RASUL 17:18

To gulu-gulu' anu mombatuki pangajalan i Epikuros ka' mombatuki pangajalan i Stoa pinainggaga suele tiba ia. To pia-piangkuka lengkat hi aha notatae, “Apaa na nusumbu' nu mian aiya? Kapandeannyo ola sangkiding, panyo ia manjoo' na potatae!” To pia-piangkuka anu sangga'atannyo notatae, “Kugantang ia mompolele mongkona to pilo-pilogot nu bansa sangga'at.” Aha notatae sumo aitu, kalana i Paulus monsisik mongkona i Yesus ka' mongkona anu mate po'ule' tumuu'.

SISIKON NU TO RASUL-RASUL 22:30

Kapala nu suludadu nu Roma aijo' kahanda' hondo monsumbu' apaa na sahondo-hondonyo anu monsabapi to mia-mian Yahudi mompisala'i i Paulus. Mokonyo aitu dodododopnyo ia nolaga to kapa-kapala nu imam ka' Mian Kopian Daka' nu Agama da sihuuk. Lantas i Paulus ilapasakonmo madi'mo pinungu, lapas aijo' binoamo mangadap hi aha iwi-iwi'.

SISIKON NU TO RASUL-RASUL 23:1

I Paulus nontonto'i to pangka-pangkat nu Mian Kopian Daka' nu Agama aijo', lantas notatae, “To Utu-utusku! Toka sinaa aiya aku madi' mongoa'i ko sala'nyo hi Tumpu i uno nu kinyonyoangku mongkona kantumuu'anku.”

SISIKON NU TO RASUL-RASUL 24:20

Kabai sahanyo mian haha aijo' na monsisik ka'idekan apaa na anu i humpak nu aha hi belengku, tempo'nyo aku binoa hi Mian Kopian Daka' nu Agama.

SISIKON NU TO RASUL-RASUL 4:15

Sahingga aha nonsai ua-ua'aha na rasul aijo' mosabat lengkat i uno nu Pongulusan Palakala, lapas aijo' aha nombisalakonmo.

SISIKON NU TO RASUL-RASUL 5:21

Sahingga to rasul-rasul aijo' nombatukimo potuunon nu Malaikat aijo'. Daagi' subu-subu hondo aha nambamo nokiijo' i Laigan nu Tumpu ka' mulai nongajan i kiijo'. Hau-haunyo aitu imam daka' ka' anu saja' mombatuki ia tinokamo, lantas nombaumo putusan na Mian Kopian Daka' nu Agama tiba to pola-polaya' nu Yahudi. Lapas aijo' aha nonsaimo mian mamba mongala to rasul-rasul aijo' i uno nu talungku' da oboa mangadap hi aha.

SISIKON NU TO RASUL-RASUL 5:27

To rasul-rasul haha aijo' binoa ninsoop mangadap hi Mian Kopian Daka' nu Agama. Lantas imam daka' nompalesa aha.

SISIKON NU TO RASUL-RASUL 6:12

Sumo aitumo na aha monsale'i to mia-mian, ka' to pola-polaya' nu Yahudi, tiba to gulu-gulu' nu agama. Lantas aha nambamo nohakop i Stefanus, lapas aijo' binoa na ia mangadap hi Mian Kopian Daka' nu Agama.

SISIKON NU TO RASUL-RASUL 6:15

Iwi-iwi' mian anu tinokamo i uno nu ulusan Mian Kopian Daka' nu Agama aijo' nontoa i Stefanus. Ka' tempo'nyo aitu ohup i Stefanus tinoa sumomo ohup nu malaikat.

SISIKON NU TO RASUL-RASUL 7:37

Iamo suele na i Musa anu notatae hi bansa Israel, ‘Tumpu Allah mombee'je hi beleyum samian na nabi anu pinile'an lengkat hi posi komi-komiumo atina', susumo Ia nompile'imo aku.’

ROMA 12:10

Tionyo to Utu-utus mompaha kali-kalibosi samian ka' samian nu kinyonyoa ma'ima' sumo to mia-mian anu moto utus i sa'angu' na auwan, ka' opai-pai lio komiu mompaha tabe-tabea'i ihe na tongkoimoona montabea'i.

1 KORINTUS 6:10

anu buling, anu mangoa, saja' malangu, anu saja' mongalu mian sangga'at, tiba anu mompolugi' mian sangga'at – iwi-iwi' na mian anu sumo aijo' madi' timbali mian anu palesayamo hi Tumpu Allah.

1 KORINTUS 6:6

Panyo ola mule' ko mian Kristen anu mamba hi anu misa' Kristen kahanda' mongkalaak palakalanyo mongkona Utusnyo anu Kristen!

PO'ULE' INGULIT 15:11

Hi aha mian nu Israel saja' ko mian to pia-piangkuka anu kasiasi ka' kasusa'an. Kalana aijo' Ku palentahkon hi belemiu da manonong hi aha.”

PO'ULE' INGULIT 16:18

“I toto sa'angu' na kota anu binee'mo nu Tumpu Allah nu belemiu hi belemiu, tionyo ahi' mohangkat to mia-mian kopian ka' to pangka-pangkat sangga'at da adin na momputusi palakala nu layat.

1 TESALONIKA 4:6

I uno nu han anu sumo aijo' boli ko samian na mombau kasala'an hi utusnyo kabai mongakali ia. U'utu mae kami nompo'ingatmo totu-totu'u hi komiu, kalana Tumpu mohukumo to mia-mian anu mombau kasala'an-kasala'an anu sumo aijo'.

TITUS 3:2

Taloakon hi aha da boli mompitana' kabai painggaga mau mule' pa' hi he, panyo mingkalakuan manonong na kinyonyoa. Tionyo ahi' aha saja' tobos hi iwi-iwi' na mian.

IBRANI 12:25

Kalana aijo', balajaga-jaga da boli komiu madi' mongka'oho' mohongo Ia anu notataemo aijo'. Aha anu madi' mongka'oho' mohongo Ia anu tinokamo i dunia ka' nompotokamo lele lengkat mae hi Tumpu Allah, madi' timbali da madi' palesaya hi Ia. Apaa mule' kita aiya anu nohongomo Ia, anu notataemo lengkat mae i suluga'! De kita madi' mongka'oho' mohongo Ia, iya na kita timbali o ampuni i kasala'an!

IBRANI 5:9

Sahingga salatan Ia pinotimbalimo anu momposalamat totu-totu'u, Ia tinimbalimo pinolengkatan nu kasalamatan anu sampe toka sidu-sidutu' kona hi iwi-iwi'na mian anu tulu-tulutan hi Ia,

YAKOBUS 2:20

Komiu ponga' hondo! Pa' palalu opobukuti' hi komiu na iman anu madi' ko gunanyo, aijo'mo iman anu madi' kopalabuan.

YAKOBUS 3:6

Jila' pokakanamo sumo apu. I butongto, ia timbali polengkatan nu ka'idekan anu mompolele ka'idekan i songko-songko na butongto. Sumo aitumo na apu anu molengkat mae i nalaka, ia montoyo'i songko-songko na kantumuu'anto.

1 PETRUS 2:23

Tempo'nyo Ia inguda-udahan, Ia madi' suele nonguda-udahi. Tempo'nyo Ia nongoa'i sansala Ia madi' noto muhuk, Ia ola nonsimpalakon palakala-Nyo hi Tumpu, Mian Kopian anu adin aijo'.

1 PETRUS 3:9

Boli mombalosi ka'idekan tiba ka'idekan, kabai monguda-udahi tiba monguda-udahi; panyo ola ahi' obalosi nu momoitakon balakat hi Tumpu. Kalana Tumpu nolagamo belemiu, ko kahanda'nyo da belemiu mohumpak balakat hi Ia.

1 YOHANES 2:9

Mian anu motatae tukoonyo ia kiijo'mo i uno nu jingka, panyo mian aijo' daagi' mongka'ideki utusnyo, mian aijo' daagi' i uno nu kapintungan sampe tempo' uuka aiya.

1 YOHANES 3:10

Aiya na pompaha sala'annyo, to ana-anak nu Tumpu tiba to ana-anak nu Ibilis; ihehe na madi' mombau pongka'oho' nu Tumpu, kabai madi' mongkalibosi Utusnyo, ia misa' anak nu Tumpu.

1 YOHANES 5:16

De komiu montoa sala'samian sangko kita mian Kristen mombau dosa' anu madi' mongahenakon mian aijo' talakangkanan i kantumuu'an kopian ka' sampe toka sidu-sidutu', tionyo ahi' komiu mondo'akon hi Tumpu; ka' Tumpu mombee'je kantumuu'an aijo' hi ia. Aiya kona hi aha anu dosa'nyo madi' mongahenakon aha talakangkanan i kantumuu'an aijo'. Panyo daagi' ko dosa' anu mongahenakon mian talakangkanan i kantumuu'an aijo'. Mongkona han aijo' aku madi' notatae tukoongku komiu tionyo mondo'akon hi Tumpu.

YUDAS 1:9

I Mikhael pe'e, anu mongkapalai to mala-malaikat, madi' toho' nombau sumo aijo'. Tempo'nyo ia pinainggaga tiba Ibilis i uno nu pahantuda'an mompo'ago pa' ihe na anu mongala bangke' i Musa, i Mikhael madi' baani nompisala'i Ibilis nu potatae anu mompopo'ise'. I Mikhael ola notatae, “Nusegaije nu Tumpu na beleyum!”

ANU PINOTO'I HI YOHANES 20:14

Lapas aijo' Kapatean ka' Dunia Kapatean i lumbu'akonmo i uno nu apu anu sumo ndalangon. (Apu anu sumo ndalangon aiya, atina'mo na kapatean anu kopinduannyomo.)