MATIUS 4:24 - KITAB NU TUMPU ALLA LELE MA'IMAI'

²⁴ Lele mongkona i Yesus aijo' tinolelemo i songko-songko na tano' Siria, sahingga manjoo' na mian tinoka hi Ia. Aha nomboamo mae to mia-mian anu mongoa'i manjoo' na lupa-lupa nu panyakit tiba kasusa'an. To mia-mian anu pininsoopanmo nu roh ma'idek, anu mongkingkimi ka' anu lupe, iwi-iwi' pina'alin i Yesus.

MATIUS 4:24 ပူးပေါင်းရင်းမြစ်များ

2 SAMUEL 8:6

Lapas aijo' i Daud nombaumo kemah da bau kajojoongan nu to sulu-suludadunyo i da'erah nu aha ka' aha mule' tinulutmo ka' nombayanmo hasin hi ia. I Daud saja'mo pino untung nu Tumpu na nahampate maumo pa' iyaya mae.

1 TOMU-TOMUNDO' 10:1

Kapandean i Salomo tinogilelemo tinoka-tokamo hi tomundo' boune nu lipu' Syeba. Sahingga ia nambamo mae i Yerusalem kahanda' monsoba-soba i Salomo, ia soba nompokilawa anu toto maha-mahan.

1 TOMU-TOMUNDO' 4:31

Ia totu-totu'u pande hondo molingkudui mian iwi-iwi'. Ia molingkudui i Etan mian nu Ezrahi, i Heman, i Kalkon ka' Darta to ana-anak i Mahol. Sanggo i Salomo tinalasanggomo iyaya mae na to lipu-lipu' anu montikubi kalaja'annyo.

1 TAWARIKH 14:17

Sahingga tinalasanggomo na sanggo i Daud iyaya mae, ka' binaumo nu Tumpu da iwi-iwi' na bansa nongkabuhukmo i Daud.

1 TAWARIKH 29:2

Pakakas anu obau laigan aijo' tibamo pakakas bau pongisinyo pinotoukamo totu-totu'u nu kamampuanku iwi-iwi'. Pinotoukangkumo na mosoni', salaka, tambaga, besak, kau', to batu-batu anu mahan na olinyo ka' to batu-batu mainan, to batu-batu anu monga-ngahan na buhitnyo anu bau pombunga-bungai, ka' manjoo' hondo na batu anu biasa opapu bau tiilon.

NOSABATMO 15:26

Tumpu nompoto'imo, “Tuluti na Aku totu-totu'u, ka' obau apaa na anu koong-Ku ma'ima', obau na aijo', tuluti iwi-iwi' na palentah-ngKu. De aijo' obau nu belemiu, belemiu madi' Ku hukum nu to panya-panyakit anu Ku pokona hi mian nu Mesir. Akumo na Tumpu anu nompo'alinmo belemiu.”

MATIUS 12:22

Lapas aitu binoa hi Yesus samian na anu mapisok ka' anu momo', kalana kinuasanmo nu roh ma'idek. I Yesus nompa'alin mian aijo', sahingga ia noko potataemo ka' nontoa.

MATIUS 14:1

Tempo'nyo aitu i Herodes mongkuasai lipu' nu Galilea, nohongo lele i Yesus.

MATIUS 15:22

Samian na boune nu Kana'an lengkat mae i da'erah aijo', tinoka hi Yesus ka' nolo-noloboo', “Anak i Daud, kalibosi na aku! Anakku boune pininsoopanmo nu roh ma'idek. Ka'ada'annyo masakit hondo.”

MATIUS 17:15

ka' notatae, “Kita Tuuma, kalibosiakon na anakku. Ia masakit nu kona nu kumikin. Pongkonanyo nu kumikin aijo' talalo ma'idek, sahingga ia totominsan tohampu i apu, ka' totominsan mule' nu kona i uee.

MATIUS 17:18

Lantas i Yesus nompalentah roh ma'idek anu i uno nu anak aijo' posabat. Lantas roh ma'idek aijo' nosabatmo, ka' anak aijo' na'alinmo tempo'nyo aitu.

MATIUS 4:23

I Galilea, i Yesus nonsongkohi iwi-iwi' na lipu' ka' nongajan i laigan pogalejaan. Ia nompolele Lele Ma'ima' tukoonyo Tumpu tionyo mompalentah. Ka' Ia mule' nompa'alin to mia-mian anu masakit ka' anu madi' sampa' na butongnyo.

MATIUS 8:28

I Yesus tinoka i santoa nu dowiwi i tano' nu Gadara. I kiijo' mae ua'aha na mian anu pininsoopan nu roh ma'idek tinokamo hi Ia. Ua-ua'aha aijo' baani hondo, sahingga madi' ko samian pe'e baani motulu i kiijo'.

MATIUS 8:33

Anu monjagai bau' aijo' nopadeka'mo namba i kota, ka' nonsisik iwi-iwi' anu tinimbalimo aijo', sumo aitu mule' apaa na anu tinimbali tiba mian ua'aha anu sinoku'on nu roh ma'idek aijo'.

MATIUS 8:6

“Kita Tuuma,” koonyo nu suludadu aijo', “Posaihonku masakit kiijo' i laigan. Ia male-male' i lupemo kiijo' male-male' talalo masakit hondo.”

MATIUS 9:26

Lele aitu tinolelemo i songko-songko na tano' aijo'.

MATIUS 9:35

Sumo aijo' na i Yesus namba nonsongkohi sa'angu' na kota, namba i kota sangga'at, ka' lengkat mae i sa'angu' na kampung namba i kampung sangga'at. Ia nongajan i to lai-laigan pogalejaan, ka' noleleakon Lele Ma'ima' mongkona mosia na Tumpu Allah mompalentah sumo Tomundo'. Ia nompa'alin to mia-mian anu mongepe iwi-iwi' na ngahan nu panyakit, ka' anu madi' sampa' na butongnyo.

MARKUS 1:28

Sahingga lele mongkona i Yesus tinogilelemo lia-lia' i songko-songko na tano' nu Galilea.

MARKUS 1:32

Mamalom salatan sinaa makakinsapmo, to mia-mian nomboa hi Yesus iwi-iwi' na mian anu masakit, ka' anu sinoku'onmo nu roh ma'idek.

MARKUS 2:3

Hau-haunyo Ia notatae, aha opat na mian nolemban mae samian anu lupe binoanyo hi Yesus.

MARKUS 2:4

Panyo kalana mian talalo da'isan, aha madi' noko ala nati ohani hi Ia. Jadi, aha nombukai atop i buannyo, pataknyo kiijo' na i Yesus. Lapas aijo', aha nonguluakon mian lupe aijo' tiba ampasnyo.

MARKUS 2:9

Iya na lebe dengke: montaloakon, ‘Dosa'um ingampunanmo,’ kabai montaloakon ‘Bulamo, hangkat na ampasum ka' lajangmo’?

LUKAS 2:2

Pombilangan anu momonanyo binau tempo'nyo i Kirenius tinimbali gubernur i lipu' nu Siria.

LUKAS 4:14

Lapas aijo', i Yesus ninsusule'mo nokiijo' i Galilea; Ia kinuasanmo nu Roh nu Tumpu. Lele mongkona butong-Nyo tinogilelemo i songko-songko na da'erah aijo'.

LUKAS 4:38

Pinala'ian i Yesus na laigan pogalejaan aijo', ka' i namba i laigan i Simon. Tina nu bengkele' i Simon hau-haunyo masakit nusihabi, ka' to mia-mian nompoto'imo han aijo' hi Yesus.

LUKAS 5:15

Panyo lele mongkona i Yesus kino togi-togi lelenyomo iyayamae, ka' manjoo'mo na mian toka da mohongo da o pa'alinakon na panyakit nu aha.

LUKAS 5:24

Panyo aiya Aku momponyata' hi belemiu saba', i bawo nu dunia aiya Anak nu Mian ko kuasa mongampuni dosa'.” Lantas i Yesus notatae hi mian anu lupe aijo', “Bulamo, hangkat na kahoyotanum ka' pinsusule'mo!”

LUKAS 7:17

Lele mongkona i Yesus aiya, tinolelemo i songko-songko na Yudea ka' i da'erah anu mompaha ohani.

YOHANES 10:21

Panyo daagi' mule' ko anu notatae, “Mian anu pininsoopanmo nu setan, madi' basisik sumo aijo'! Timbali na setan moko potimbali mian mapisok timbali montoa?”

SISIKON NU TO RASUL-RASUL 10:38

Komiu nonsumbu'mo saba' Tumpu nompile'imo i Yesus mian nu Nazaret aijo' ka' nombee' hi Ia Roh nu Tumpu ka' kuasa. Komiu mule' nonsumbu'mo saba' i Yesus namba iyaya mae da mombau anu ma'ima'; Ia nompa'alin iwi-iwi' mian anu kinuasanmo nu Ibilis, sabab Tumpu mongkalibosi Ia.

SISIKON NU TO RASUL-RASUL 15:23

Hingga-hinggat tiba anu sinai aijo', aha mule' nompakatumo sa'angu' na sulat anu onyi'nyo sumo uuka, “Toka hi iwi-iwi' na to utu-utus anu nolengkat mae i to bansa-bansa sangga'at anu misa' Yahudi, anu jojoong i Antiokhia, i Siria ka' i Kilikia. Salan do'a mami, to rasul-rasul, ka' to pola-polaya', aijo'mo to utu-utus miu.

SISIKON NU TO RASUL-RASUL 15:41

Aha nontikubi Siria ka' Kilikia; i kiijo' mae aha nompokododomo to jama-jama'at.

SISIKON NU TO RASUL-RASUL 28:9

Kalana han anu tinimbali aijo', iwi-iwi' na mian anu masakit i togong aijo' tinoka hi Paulus, ka' aha pina'alinnyo.

SISIKON NU TO RASUL-RASUL 8:7

Kalana to roh-roh ma'idek nosabatmo ka' naha kihisanmo nompala'imo mian da'isan anu pininsoopanmo nu setan. To mia-mian kapi' ka' pengko da'isan na anu pino'alinmo.

YOSUA 6:27

Tumpu saja' mombaya'i i Yosua, ka' sanggo i Yosua tinalasanggomo i songko-songko na lipu' aijo'.