MATIUS 23:23 - KITAB NU TUMPU ALLA LELE MA'IMAI'

²³ Silaka na komiu to gulu-gulu' agama ka' to mia-mian nu Farisi! Komiu ola ahi' mombau pula-pula! To lampa-lampa sumo solasi, adas manis, ka' suele jintan, komiu mombee'i, de sampulu' na bahagian sambahagian hi Tumpu. Padahan hahan anu palalu hondo i uno nu to atu-atulan nu agama, sumo umpamanyo: Ka'adilan, mompahakali-kalibosi, ka' mohongo-hongo, madi' o palahatikan miu. Padahan aijo'mo na tionyo o bau miu, tiba madi' timbali mompojohok anu toto sangga'at.

MATIUS 23:23 ပူးပေါင်းရင်းမြစ်များ

AMSAL 21:3

Palabuatan anu adin ka' totu'u lebe momposanang Tumpu molingkudui iwi-iwi' na anu opalasombahkon.

YESAYA 28:25

De tano'nyo aijo' na'ima'mo na nomposadia, nu saumo na bine', umpamanyo jintan mo'itom ka' jintan mopute'. Ia montuganmo ohua' nangahannyo nu gandum opojiji' ka' isohipi'nyo osu' ani sosu'anon sangga'at.

YEREMIA 22:3

“Tionyo ahi' adin ka' hodi' na kinyonyoa. Pobebasmo na mian anu me saja' o ala na tenaganyo nu aha anu balakuasa anu saja' mongala tenaga nu mian. Boli mombee'i kasansala'an kabai mombau anu ma'idek hi aha mian anu isalipu'an mae, hi aha anak anu madi'mo ko tinanyo ka' tuumanyo, kabai hi aha anu binalumo. Boli mompatei mian anu madi' ko sala'nyo itampat aiya.

HOSEA 6:6

Lebe Ku ka'ima'i, hi belemiu da monsumbu' mae Aku, ka' saja' ahi' mongkalibosi mae Aku, nulingkudui na mompapui ka' monsombahkon koloban hi beleng-Ku.

IMAMAT 27:30

Sampulu' na bagian na hasinnyo nu ale', sambagian na o ala pa' aijo' gandum kabai to bua-bua' nu kau', aijo' na obee' hi Tumpu.

MIKHA 6:8

Madi'! Tumpu nompoto'imo hi kita han anu ma'ima'. Anu nu tuntut hi kita aijo'mo: da kita mingkalakuan ahi' adin, ka' saja' ahi' balaniat mompahakali-kalibosi ka' mule' madi' ahi' ko bubun ka' tumuu' ahi' mosa'angu' tiba Tumpunto.

MATIUS 12:7

I uno nu Kitab nu Tumpu tinulis: Pongkalibosi ahi' na anu Kukahanda'i, misa' koloban nu binatang. De maluannyo komiu totu-totu'u mangalati' i potatae aijo', tantu komiu madi' momposala' to mia-mian anu madi' ko sala'nyo.

MATIUS 23:13

“Silakamo na komiu to gulu-gulu' agama ka' to mia-mian nu Farisi! Komiu saja' mombau pula-pula. Komiu ola monsaduakon da mian madi' totu-totu'u timbali mian anu palesayamo hi Tumpu Allah. Posi komiu pe'e madi' mongka'oho' mian anu palesayamo hi Tumpu, ka' mian sangga'at anu oka'oho', miu da boli palesaya. [

MATIUS 9:13

Soba selidiki' apaa na alati'nyo ayat nu Kitab nu Tumpu Allah: ‘Aku mongkahanda'i pongkalibosi ka' misa' koloban binatang’. Kalana Aku toka misa' da molaga mian anu monsanggo butongnyo ma'ima'mo, panyo mian anu o sangka madi' talakana'.”

LUKAS 11:42

Silakamo na komiu to mia-mian nu Farisi! Hasin sosu'anonum sumo solasi, ka' inggu, ka' lampa-lampa sangga'at, sampulu' na bahagian obee' miu sambahagian hi Tumpu, panyo ka'adilan ka' liibos hi Tumpu madi' okalinga komiu. Padahan aijo'mo na anu tionyo obau miu, ka' boli momadi'akon anu sasangga'atannyo.

LUKAS 18:12

Aku bapuasa' pinduan saduminggu, ka' monsombahkon hi kita iwi-iwi' apaa na anu i humpakku, sampulu' na bagian, sambagian na anungku.’

1 SAMUEL 15:22

Panyo notatae na i Samuel, “Iya na anu talalo nu ka'ima'i nu Tumpu, tulu-tulutan hi Tumpu kabai koloban anu osombahkon? Montuluti Tumpu na lebe ma'ima' nu lingkudui na monsombahkon koloban. Tulu-tulutan hi Tumpu na lebe ma'ima nu lingkudui na lompo'nyo nu domba.