MATIUS 21:12 - KITAB NU TUMPU ALLA LELE MA'IMAI'

¹² Lapas aijo' i Yesus ninsoop nokiijo' i Laigan nu Tumpu ka' nolaa' iwi-iwi' na mian anu mobalu-baluk i kiijo'. Ia nombalikakon to meja-meja' anu pontolosian doi, ka' to bangku-bangku nu anu mompobaluk tomonsi' malapati'.

MATIUS 21:12 ပူးပေါင်းရင်းမြစ်များ

NOSABATMO 30:13

Toto samian na anu obilangmo de pombilanganmo aijo' tionyo ahi' momboa mae doi bau pombayan konjoo'nyo susumo anu tinantukanmo na olinyo anu bau pombayan Kemah-Ku salaku kasanangan anu obee' samata-mata hi beleng-Ku.

IMAMAT 1:14

De anu osombahkon sa'angu' na tomonsi', tionyo ahi' sapatau kabai malapati' bata'nyo.

IMAMAT 12:6

De lapasmo na tempo'nyo momposusi' kalana nompohampemo anak mo'ane kabai anak boune, boune aijo' tionyo ahi' momboa anu osombahkon hi imam i ahop nu sabatan nu Kemah nu Tumpu. Anu osombahkon aijo', aijo'mo sa'angu' na anak nu domba umunnyo sataunmo bau koloban anu opotunu, ka' sa'angu' na tomonsi' malapati' anu daagi' bata'nyo kabai tomonsi' sapatau anu daagi' bata'nyo bau koloban pongampuni dosa'.

IMAMAT 12:8

De boune aijo' madi' moko ala mompotouka sa'angu' na anak nu domba, yo ia tionyo ahi' momboa ohua' na tomonsi' malapati' anu daagi' bata'nyo kabai tomonsi' sapatau anu daagi' bata'nyo; sa'angu' bau koloban anu opotunu ka' sa'angu' mule' na koloban bau pongampuni dosa'. Imam tionyo ahi' sabole-bole mombau adatnyo bau pompobelesi'i humimi' nu boune aijo', sahingga ia timbalimo belesi'.

IMAMAT 14:22

Ia tionyo ahi' momboa ohua' na tomonsi' malapati anu daagi' bata'nyo kabai sapatau anu daagi' bata'nyo: sa'angu' bau koloban pongampuni dosa' ka' sa'angu' mule' bau koloban anu opotunu.

IMAMAT 14:30

Lapas aijo' imam tionyo ahi' monsombahkon sa'angu' na tomonsi' malapati bata'nyo kabai sapatau bata'nyo,

IMAMAT 15:14

Toka i sinaa ko ialunnyo ia tionyo ahi' momboa ohua' na tomonsi' malapati' bata'nyo kabai tomonsi' sapatau bata'nyo i ahop nu sabatan nu Kemah nu Tumpu lantas obee'mo hi imam.

IMAMAT 15:29

Toka i sinaa ko ialunnyo ia tionyo ahi' momboamo ohua' na tomonsi' malapati' bata'nyo kabai tomonsi' sapatau bata'nyo hi imam i ahop nu sabatan nu Kemah nu Tumpu.

IMAMAT 5:11

De mian anu ko sala'nyo madi' moko ala momposadia tomonsi' sapatau behenyo tiba lakinyo kabai tomonsi' malapati' bau koloban pongampuni dosa', ia tionyo ahi' momboamo labu sa'angu' na kilogram. Labu aijo' madi' timbali ogalo'i nu lanya' nu zaitun kabai tiba kamangian, kalana koloban aijo' te koloban bau pongampuni dosa', misa' koloban kaanon anu osombahkon.

IMAMAT 5:7

Panyo de mian anu ko sala'nyo madi' moko ala momposadia domba kabai mee' bau pontobus dosa'nyo, ia tionyo ahi' momboa tomonsi' sapatau lakinyo tiba behenyo kabai tomonsi' malapati' anu daagi' bata'nyo, sa'angu' bau koloban pongampuni dosa' ka' sa'angu' mule' bau koloban anu opotunu.

MARKUS 11:11

Ahennyo i Yesus tinoka i Yerusalem, lantas ninsoop i Laigan nu Tumpu. I kiijo' Ia nompalahatikan titikub-Nyo. Panyo kalana ohanimo pikat, Ia nambamo nokiijo' i Betania nohingga-hinggat tiba aha sampulu' ka' ohua' na anu saja' mombatuki Ia.

LUKAS 2:24

Aha mule' ko niat monsombahkon koloban, atina'mo beheenyo ka' lakinyo, tomonsi' sapatau, kabai ohua' na tomonsi' malapati' anu daagi' bata'nyo, sumo anu tinantukanmo nu Atulan nu Tumpu.

YOHANES 2:13

Tempo'nyo Sinaa Daka' Paskah nu Yahudi malia'mo toka, i Yesus namba i Yerusalem.