KOLOSE 3:14 - KITAB NU TUMPU ALLA LELE MA'IMAI'

¹⁴ Ka' anu talalo hondo penting, aijo'mo: Komiu tionyo ahi' mompaha kali-kalibosi, kalana kalibosan aijo' na momposa'angu' to Utu-utus iwi-iwi' sahingga timbali mian anu sahondo-hondonyo.

KOLOSE 3:14 ပူးပေါင်းရင်းမြစ်များ

YOHANES 13:34

Palentah bu'ou Kubee' hi komiu: Pompaha kali-kalibosi samian ka' samian. Sumo Aku mongkalibosi komiu, sumo aijo' suele na komiu tionyo mompaha kali-kalibosi.

YOHANES 15:12

Aiya na palentah-ngKu: Kalibosi na samian ka' samian, pokakana sumo Aku mongkalibosi komiu.

YOHANES 17:23

Aku tiba aha, ka' kita Tuuma tiba Aku, da aha totu-totu'u sa'a-sa'angu'. Sahingga dunia monsumbu' taalu' kita Tuuma na nonsai mae Aku, ka' taalu' kita Tuuma mongkalibosi aha, sumo kita Tuuma mongkalibosi Aku.

ROMA 13:8

Boli basamaya' apa-apaa mau mule' pa' hi he. Boli mompiakon basamaya' nu liibos hi samian ka' samian. Kalana mian anu mongkalibosi sangko mian nontulutimo atulan iwi-iwi' i Musa.

EFESUS 1:4

Ma'isa pe'e dunia aiya pinotimbali, Tumpu nompile'imo kita kalana pinalesayamo hi Kristus ko kahanda' da kita timbalimo samata-mata iamo na tumpu-Nyo, ka' madi' ko ideknyo i ahop-Nyo. Kalana kalibosan nu Tumpu.

EFESUS 4:3

O'usahakon totu-totu'u da tumuu' saja' dame, da posa'angu'an anu pinodaagi'mo nu Roh nu Tumpu tataap ma'ima'.

EFESUS 5:2

Kantumuu'anum maunyo ahi' okinyonyoai nu kalibosan susumo pongkalibosi i Kristus kita. Ia nongkulubanakonmo butong-Nyo kalana kita, salaku palasombahan anu manohong ka' momposanang kinyonyoa nu Tumpu.

KOLOSE 2:2

Iwi-iwi' aijo' ku bau da kinyonyoa nu aha timbali mahoson ka' aha mompaha kali-kalibosi, sahingga aha mahoson na mosa'angu'. Tiba jalan anu sumo aijo' aha totu-totu'u mangalati'mo ka' palesayamo hondo-hondo ka' monsumbu'mo lahasia nu Tumpu, aijo'mo i Kristus.

1 TESALONIKA 4:9

Madi'mo daagi' palalu na kami montulis sulat toka hi komiu mosia na komiu tionyo mongkalibosi to Utu-utus anu sa'a-sa'angu' na kapalesaya'an. Komiu suele ingajanmo nu Tumpu da mompaha kali-kalibosi.

1 TIMOTIUS 1:5

Kahanda' nu pokinde'ku aijo', atina'mo da mian timbali ko kinyonyoa anu ma'ima' ka' kinyonyoa anu ma'ima' ka' susi', tiba mule' totu-totu'u palesaya hi Tumpu, ka' tiba jalan anu sumo aijo' yo aha timbali mongkalibosi sangalunyo.

IBRANI 6:1

Kalana aijo', imbo' da kita mondensu'akonmo i panga-pangajalan anu lebe tongkohimona mongkona kantumuu'an nu mian Kristen anu sinsumbu'mo, da lebemo mangalati', ka' boli ola mongkamata pu'u-pu'unyo momona nu pangajalan nu agamanto. Boli kita po'ule' mule' mongulit pu'unyo nu pangajalan au'aitu mian madi'mo timbali mombau hahan anu madi'mo mingguna ka' tionyomo ahi' palesaya hi Tumpu,

1 PETRUS 4:8

Mompaha kali-kalibosi totu-totu'u samian ka' samian, aijo' na lebe molingkudui iwi-iwi' kalana de mompaha kali-kalibosi belemiu suele timbali mompaha ampu-ampuni.

2 PETRUS 1:7

Ka' tumuu' mombatuki pongka'oho' nu Tumpu tionyo ahi' otiwai nu mongkalibosi to utu-utus anu pokakana na iman. Ka' mule' de komiu mongkalibosi to utu-utus anu pokakana na iman tionyo ahi' otiwai nu mongkalibosi iwi-iwi'na mian.

1 YOHANES 3:10

Aiya na pompaha sala'annyo, to ana-anak nu Tumpu tiba to ana-anak nu Ibilis; ihehe na madi' mombau pongka'oho' nu Tumpu, kabai madi' mongkalibosi Utusnyo, ia misa' anak nu Tumpu.

1 YOHANES 3:23

Anu pinalentahkon-Nyomo hi kita atina'mo: Kita tionyo ahi' palesaya hi Anak-Nyo, aijo'mo i Yesus Kristus ka' kita tionyo ahi' mompaha kali-kalibosi, susumo anu pinalentahkonmo i Kristus hi kita.

1 YOHANES 4:21

Kalana aijo', aiyamo na palentah anu binee'mo i Kristus hi kita: Ihe na mongkalibosi Tumpu tionyo ahi' suele mongkalibosi utusnyo.