KOLOSE 1:9 - KITAB NU TUMPU ALLA LELE MA'IMAI'

⁹ Mokonyo aijo' kami saja' mondo'akon komiu salatanmo pe'e kami nohongo komiu. Pinoita mami hi Tumpu, da Roh nu Tumpu Allah mombee'i kapandean ka' da mangalati', sahingga komiu monsumbu' totu-totu'u kahanda' nu Tumpu.

KOLOSE 1:9 ပူးပေါင်းရင်းမြစ်များ

MAZMUR 119:99

Anu ku pangalati'i molingkudui anu nu pangalati'i nu to gulu-gulu'ku, kalana aku saja' montutugi palentah iwi-iwi' nu Belento.

MAZMUR 143:10

Potiju'akon mae na aku mombau pongka'oho' nu Belento, kalana Belentomo na Tumpungku. Belento manonong, ka' molaya'mo aku i jalan anu mahata.

YOHANES 7:17

Mian anu montuluti pongka'oho' nu Tumpu, monsumbu' pa' pangajalan-Ku lengkat mae hi Tumpu kabai posi lengkat mae hi beleng-Ku.

SISIKON NU TO RASUL-RASUL 12:5

Jadi i Petrus pinosoop i uno nu talungku'; panyo to jama-jama'at ola ahi' saja' nondo'akon i Petrus totu-totu'u hi Tumpu.

ROMA 12:2

Boli mombatuki sonto' nu dunia aiya. Bee' da nupotimbali nu Tumpu na butongum timbali bu'ou, da komiu mongabali'. Tiba jalan aijo' yo komiu moko ala monsumbu' pongka'oho' nu Tumpu Allah – aijo'mo apaa na anu ma'ima' tiba anu momposanang kinyonyoa-Nyo ka' anu talakana'.

1 KORINTUS 1:5

Kalana komiu i Kristusmo na tumpunyo, sahingga kantumuu'an miu kaya i uno nu iwi-iwi' na han. Kapandean miu mongkona iwi-iwi' na han talalo matangkas, ka' komiu pande na mompogulu' kapandean aijo'.

EFESUS 1:8

Binau-Nyo na aijo' kalana Ia talalo hondo mongkalibosi kita, ka' pongkalibosi-Nyo aijo' binee'-Nyo hi kita mola-molabi montului jalan anu ko angga'-Nyo, ka' anu minsoop i akan.

EFESUS 5:10

O usahakon da monsumbu' apaa na anu momposanang kinyonyoa nu Tumpu.

EFESUS 5:17

Boli ponga', panyo oselidiki apaa na anu nukahanda'i nu Tumpu.

EFESUS 6:6

Boli mombau sumo aijo', ola de tempo'nyo komiu ojagai, ola da mohumpak pompuji' nu mian. Panyo tionyo ahi' obau miu na aijo' susumo posaihon i Kristus anu nontulutimo nu kinyonyoa totu-totu'u mosia na pongka'oho' nu Tumpu.

FILIPI 1:4

Ka' de aku mondo'akonmo komiu Utus iwi-iwi', sanang na kinyonyoangku balado'a.

KOLOSE 1:6

Lele lengkat mae hi Tumpu aijo' tinogilelemo i songko-songko na dunia, ka' kantumuu'an nu mian lajangmo binalakatan nu lele aijo', pokakana sumo kantumuu'an miu binalakatanmo salatan pe'e tempo'nyo komiu nohongomo balakat nu Tumpu, ka' totu-totu'u ingoa'anmo.

KOLOSE 3:16

To panga-pangajalan i Kristus anu nobuke'mo nu balakat tionyo ahi' oposoop i uno nu kinyonyoa miu. Komiu sabole-bole ahi' mompaha pogu-pogulu' ka' mompaha bebee'i pokinde' da pande. O nyanyi na mazmur ka' anu bau pompuji-puji' tiba to elo-elok nu rohani; o nyanyiakon hi Tumpu bau pontalima kase i uno nu kinyonyoa miu.

KOLOSE 4:12

Salan do'a lengkat mae hi Epafras. Ia suele lengkat mae atina' i gampa miu. Ia posaihon i Kristus Yesus anu saja' tapakun mondo'akon komiu. Ia nompoitamo hi Tumpu sabole-bole da kapalesaya'an miu timbali mahoson ka' komiu totu-totu'u timbalimo otaha'imani, da sahondo-hondonyo na kinyonyoa miu tulu-tulutan i pongka'oho' nu Tumpu.

KOLOSE 4:5

I uno nu poboboan miu tiba to mia-mian anu madi' palesaya pande-pande ahi' na komiu tumuu', ka' opake iwi-iwi' na kasampatan ma'i-ma'ima'.

1 TESALONIKA 5:17

ka' saja' balado'a.

2 TESALONIKA 1:11

Mokonyo aijo' kami saja' mondo'akon komiu. Kami balado'a da Tumpu mompotimbali komiu moko ala tumuu' mombatuki pongka'oho'-Nyo, kalana makisut aijo' sahingga Ia nolagamo komiu. O amalakon da Tumpu mongkuasai komiu mombatuki pongka'oho'nyo da mombau anu ma'ima' ka' mompokopiani iwi-iwi' na kalajanyo anu binaumo miu kalana pinalesayamo hi Kristus.

FILEMON 1:4

De aku balado'amo ku sanggo na sanggo nu kita Utus ka' montalima kase hi Tumpu.

FILEMON 1:6

Aku balado'a mongamalakon da poto utusanto salaku to mia-mian anu pinalesayamo mohasinakon pangalati'an lebe daka' i iwi-iwi na balakat anu daagi'mo hi kita kalana nosa'angu'mo tiba i Kristus.

IBRANI 10:36

Komiu palalu sabaan, da komiu moko ala mombau anu nukahanda'i nu Tumpu, sahingga mohumpak anu jinanji'-Nyomo.

IBRANI 13:21

O amalakon da Tumpu anu pinolengkatan mae nu kabilahian aijo' momposukup hi komiu iwi-iwi na han anu ma'ima' anu opalalui miu da moko ala mombau apaa na anu Nu kahanda'i. O amalakon da kalana i Yesus Kristus, Tumpu na mokalaja i uno nu butongto apaa na anu Nu kahanda'i. Tionyo ahi' i Kristus o puji' sampe toka sidu-sidutu'! Amin.

YAKOBUS 1:5

De daagi' ko samian itina' hi komiu anu madi' talalo pande, tionyo ahi' ia mongkakase hi Tumpu, sahingga Tumpu mombee'i kapandean hi ia; kalana toto samian sanang na Tumpu Allah mombee'i kalana kanonongannyo ka' kalana kalibosannyo.

YAKOBUS 3:17

Panyo mian anu daagi' ko kapandean anu nolengkat mae kiita' i bawo, ia na anu momona hondo lomas, lapas mule' mongka'ima'i dame, ma'ima' na kinyonyoa hi sangko mian, mohongo-hongo. Ia saja' mongkalibosi ka' kalakuannyo saja' ma'ima'. Ia madi' montinjohi sangga'at ka' madi' mimpula-pula.

1 PETRUS 2:15

Kalana Tumpu mongkahanda'i da anu toto ima-ima' na binau miu, belemiu monggintumimo nganga' nu mian anu basisik ponga'.

1 PETRUS 4:2

Kalana aijo', saja' ahi' komiu tumuu' i dunia aiya mombatuki pongka'oho' nu Tumpu, ka' misa' mombatuki pongka'oho' nu manusia.

1 YOHANES 2:17

Dunia ka' iwi-iwi na apaa anu i unonyo anu nuka'ima'i nu mian, hau-haunyomo lanyap. Panyo mian anu tulu-tulutan i pongka'oho' nu Tumpu tataap tumuu' sampe toka sidu-sidutu'.

1 YOHANES 5:20

Osumbu'to saba' Anak nu Tumpu tinokamo ka' nompopangalati'mo kita, da kita monsumbu' Tumpu anu totu'u. Kita tumuu' nosa'angu'mo tiba Tumpu anu totu'u, ka' tumuu' mosa'angu'mo tiba Anak-Nyo i Yesus Kristus. Aiyamo na Tumpu anu totu'u, ka' aiyamo na kantumuu'an anu kopian ka' sampe toka sidu-sidutu'.

1 SAMUEL 12:23

Mongkona butongku ku amalakon da aku boli sampe baladosa' hi Tumpu kalana madi' mondo'akon belemiu, panyo ola ahi' aku suele saja' sabole-bole mombee'i pokinde' hahan anu ma'ima' ka' anu totu'u.