KOLOSE 1:29 - KITAB NU TUMPU ALLA LELE MA'IMAI'

²⁹ Da timbali moko ala montokai han aijo', aku nokalajamo juku-jukut. Aku binala usahamo nu kahosonanku iwi-iwi' anu binee'mo i Kristus hi belengku ka' anu nokalajamo totu-totu'u nu kuasanyo i uno nu butongku.

KOLOSE 1:29 ပူးပေါင်းရင်းမြစ်များ

LUKAS 13:24

“Bala usaha da minsoop montulu sabatan anu soki. Kalana, inau'! Da'isan na mian bala usaha minsoop, panyo madi' timbali.

ROMA 15:20

Anu ku kahanda'i aijo'mo mompolele Lele Ma'ima' anu lengkat mae hi Tumpu i tampat-tampat iya na anu ma'isa nohongo mongkona i Kristus. Kalana aku madi' mongka'oho' mombau kalaja opotinjo i mesen anu binau nu mian sangga'at.

ROMA 15:30

Tiba sanggo nu Tumpunto i Yesus Kristus, ka' tiba kalibosan anu binee' mae nu Roh nu Tumpu, kupoita sabole-boleh hi komiu da aku tiba komiu mondo'akon mae totu-totu'u aku hi Tumpu Allah.

1 KORINTUS 12:11

Iwi-iwi' aijo' kalaja nu Roh anu sa'a-sa'angu'nyomo aijo'; toto samian pinosi bee'anmo balakat anu madi' pokakana, iyaje ahi' pongka'oho' nu Roh aijo'.

1 KORINTUS 12:6

Manjoo' na ngangahannyo mombau kalaja nu Tumpu, panyo anu mombee'i kahosonan aijo' hi toto samian, aijo'mo Tumpu anu sa'a-sa'angu'nyomo!

1 KORINTUS 15:10

Panyo kalana balakat nu Tumpu aku tinimbalimo susumo tinuu'ku uuka aiya. Ka' madi' pinalasuma na Tumpu nongampunimo aku. Pakalaus aku ahi' na mokalaja lebe makeke molingkudui rasul kanjoo'annyo sangga'at. Panyo sabenannyo aijo' misa' usahangku; aijo' usaha nu Tumpu anu mongkalibosi aku ka' mokalaja hingga-hinggat ka' aku.

2 KORINTUS 11:23

To posa-posaihon i Kristus ugaat na aha? De ohongo aku sumo anu i ningkotmo na pikilan, panyo aku memang posaihon anu lebe ma'ima' molingkudui aha iwi-iwi'! Aku mokalaja lebe makeke, aku lebe saja' oposoop i uno nu talungku', aku lebe saja' hondo sinakisa, ka' toto minsan mompai patemo.

2 KORINTUS 13:3

Sahingga ohumpakje miu iwi-iwi' na bukuti' anu o kahanda'i miu taalu' totu-totu'u potataengku nolengkat mae hi Kristus. De i Kristus mompalentahmo komiu, ia madi' mompalentah ola yayamo, panyo ahi' nu potoaje na kuasanyo i tina' hi komiu.

2 KORINTUS 5:9

Kalana aijo' kami bala usaha totu-totu'u da momposanang kinyonyoa-Nyo, maumu kami daagi' hau-haunyo jojoong i laigan mami aiya, kabai pe'e i kiita'mo mae.

2 KORINTUS 6:5

kami sinakisa, tinalungku', ka' opatei; kami nokalajamo make-makeke, toto minsan madi' hoyot ka' toto minsan madi'mo ko anu okaan.

EFESUS 1:19

ka' palias na kodaka'nyo na kuasa nu Tumpu mokalaja hi kita anu palesayamo. Kuasa nu Tumpu aijo' pokakanamo sumo kuasa anu madi' ko gampanyo.

EFESUS 3:20

Kalana kuasa nu Tumpu anu saja' mokalaja i uno nu butongto, Tumpu timbali mombau anu lebe manjoo' molingkudui apaa na anu opoitanto kabai anu opopikinakonto.

EFESUS 3:7

Tumpu nombee'imo balakat aku – aiyamo kalaja – da mompolele Lele Ma'ima' aijo'. Aku nontalima balakat aijo' nontului kuasa nu Tumpu anu nokalaja i uno nu butongku.

FILIPI 1:27

Jadi, anu penting uuka aiya aijo'mo da komiu tumuu' pokakana tiba apaa na anu nukahanda'i nu Lele Ma'ima' mongkona i Kristus aijo'. Tiba jalan anu sumo aijo' pa' aku moko ala singkabot tiba komiu, kabai madi'mo, ku hongoje na kahosonan nu posa'angu'an miu ka' mogogia' hingga-hinggat i sa'angu' na kahanda' ka' sa'angu' na tanga'an; aijo'mo kapalesaya'an anu pokakana tiba Lele Ma'ima' anu lengkat mae hi Tumpu aijo'.

FILIPI 1:30

Uuka aiya komiu singkona hingga-hinggat tiba aku i uno nu usaha anu pokakana; aijo'mo anu toho'mo tinoa miu ingusahakonku u'utu mae, ka' anu daagi' saja' ku usahakon sampe tempo' uuka aiya, sumo anu uuka aiya i hongomo miu.

FILIPI 2:13

kalana Tumpu na mokalaja i uno nu butong miu da mompotimbali komiu halala' ka' moko ala momposanang kinyonyoa nu Tumpu.

KOLOSE 2:1

Ku kahanda'i da osumbu' miu mosia na koboatnyo aku nongusahakonmo kapentingan miu ka' kapentingan nu aha i Laodikia tiba iwi-iwi' anu madi' mompahasumbu' aku.

KOLOSE 2:12

Kalana salatan komiu pinalamandikanmo, komiu i lamunmo hingga-hinggat tiba i Kristus; ka' tiba palamandian aijo' mule', komiu po'ule'mo pinotumuu' suele hingga-hinggat tiba i Kristus, kalana komiu pinalesayamo i kuasa nu Tumpu anu nompo'ule'mo nompotumuu' i Kristus sinilaka.

KOLOSE 4:12

Salan do'a lengkat mae hi Epafras. Ia suele lengkat mae atina' i gampa miu. Ia posaihon i Kristus Yesus anu saja' tapakun mondo'akon komiu. Ia nompoitamo hi Tumpu sabole-bole da kapalesaya'an miu timbali mahoson ka' komiu totu-totu'u timbalimo otaha'imani, da sahondo-hondonyo na kinyonyoa miu tulu-tulutan i pongka'oho' nu Tumpu.

1 TESALONIKA 2:9

Tantu komiu daagi' tonginau' mosia na kosigonyo na kami bala usaha ka' bakalaja. Sinaa ka' pihi kami mokalaja da kami madi' monsusa'i mau ola samian anu itina' hi komiu, tempo'nyo kami nompolele Lele Ma'ima' anu lengkat mae hi Tumpu aijo' toka hi komiu.

2 TESALONIKA 3:8

Kami madi' mongkaan kaanon nu mian de madi' o bayan mami. Panyo mule' sinaa ka' pihi, kami mokalaja totu-totu'u, da kami madi' monsusa'i maumo pa' ihe itina' hi komiu.

2 TIMOTIUS 2:10

Mokonyo aijo', aku sabaan na montanggung iwi-iwi' aijo' kalana kapentingan nu to mia-mian anu pinile'anmo nu Tumpu, da suele aha mohumpak kasalamatan anu obee' kalana palesayamo hi Kristus Yesus tiba mule' talasanggomo sampe toka sidu-sidutu'.

IBRANI 12:4

Kalana i uno nu usaha nu beleyum mongewa dosa', komiu ma'isa toho' kino iman sumo aijo' sampe baso' tionyo jinujuhakonmo.

IBRANI 13:21

O amalakon da Tumpu anu pinolengkatan mae nu kabilahian aijo' momposukup hi komiu iwi-iwi na han anu ma'ima' anu opalalui miu da moko ala mombau apaa na anu Nu kahanda'i. O amalakon da kalana i Yesus Kristus, Tumpu na mokalaja i uno nu butongto apaa na anu Nu kahanda'i. Tionyo ahi' i Kristus o puji' sampe toka sidu-sidutu'! Amin.

ANU PINOTO'I HI YOHANES 2:3

Komiu sabaan, ka' komiu nongoa'imo sansala kalana Aku, ka' komiu madi' mongoa'i mompele-pele.